Read Ngowili Yekpei Numu Kpɛlɛɛ Va 1 KƆLINTIBLƐISIA 14 Bible Online

1 KƆLINTIBLƐISIA 14 - Ngowili Yekpei Numu Kpɛlɛɛ Va bible

1 KƆLINTIBLƐISIA 14

¹Ndoma lɔ hɔɔ mahoungɔ wu lapi wu majɔɔ. A wu lii wu hani yekpei nasia hinda hu Ngewɔ Yafei a fe gbama, aako wu Ngewɔ wowili vulii le.

²Numui na a yɛpɛ kɛnyɛyia wekangaa hu, ɛɛ yɛpɛ nungaa wekeisia gama, a yɛpɛ Ngewɔ lɔ gama, ajifa numu gbi ɛɛ ngi layie mɛni. I tɔnya lɔwungɔi lɔ hugɛma Ngewɔ Yafei hu.

³Kɛɛ numui na a Ngewɔ wowili hugɛ a yɛpɛ nungaa lɔ gama a gbɔ ti ma, a ti lii gba, a ti nɛpɔ.

⁴Numui na a yɛpɛ kɛnyɛyia wekangaa hu a gbɔ ta yekpe lekee lɔ ma, kɛɛ numui na a Ngewɔ wowili le a gbɔ Kristimableisia kpɛlɛɛ lɔ ma.

⁵Nya longɔe wu kpɛlɛɛ wu yɛpɛ kɛnyɛyia wekeisia hu kɛɛ na vulii nya longɔ la tamia a ji wa kpaya majɔɔ Ngewɔ wowili hugɛva. Ajifa numui na a Ngewɔ wowili hugɛ, bagɔma lɔ ngi ma i lewe numui na ma a yɛpɛ kɛnyɛyia wekangaa hu kɛlee numu i yɛ ngaama a gu i ngi layieisia fasai aako Kristimableisia gbi ti kpɔma majɔɔ.

⁶Faale, nya mbaa Kristimableisia, ngi wangaa wu gama, kpekpeyei yeegbɔɔ nga pie a wue ina ngi yɛpɛilɔ kɛnyɛyia wekangaa hu? Ngɛɛ kpekpeya wulo bɛɛ wie, kɛlee ngi wa wu gama a hinda lɔwungɔ Ngewɔ i hugɛnga a nge ɔɔ nya hinda hugɔngɔ ɔɔ Ngewɔ wowili ɔɔ kaa.

⁷A gili lɛɛ a ngaihani nasia ndɛvu ii ti hu, kia nyɔkɔ koolei na ɔɔ mbakɛi numu a yee ngulei na gɔɔ ti ngaama kɛlee ti ngai vulii, hu yaa loke?

⁸Tawao ina bulu vɛmɔi ii kɔ-bulii vɛni hu yaa loke, ye lɔ a ngi magbatɛ kɔ va?

⁹Hii gbɔma, numu a yee hindei na gɔɔ bi yɛpɛma kɔlooni ma ina bi wowili na bi ndenga kɛnyɛyia weka hu lɔ numu ɛɛ gu i humɛi gbalauŋ? Fɛfɛi lɔ a li a bi layieisia!

¹⁰Kɛnyɛyia ngilangilɛi gbotongɔe dunyei hu, na hu gbi yeengila bɛɛ ii na nungaa tɛɛ humɛni.

¹¹Kɛɛ ina ngii kɛnyɛyiɛi na gɔɔ ti ndema, numui na i ndema a yɛ a kɛnyɛmɔ lɔ nya gama, nya bɛɛ kɛnyɛmɔ a nge ngi gama.

¹²Jifa wu haamingɔ waa hani nasia va Ngewɔ Yafei a fe gbama, a lapi vulii wu yenge waa a yeenasia ta gbɔ Kristimableisia ma.

¹³Numui na a yɛpɛ kɛnyɛyia wekeisia hu, mahoungɔ i Ngewɔ vɛli i kpaya jɔɔ ngi layieisia fasaiva.

¹⁴Ajifa ngi Ngewɔ vɛlingaa kɛnyɛyia weka hu kɛ nya yafei lɔ Ngewɔ vɛlima vulii kɛɛ nya nɛmahui nda gbi ii ma.

¹⁵Gbɔɔ hɔɔ mahoungɔ ngi pie? Nga Ngewɔ vɛlilɔ a nya yafei, kɛɛ nga ngi vɛlilɔ gbɔma a nya nɛmahui bɛɛ; nga wulelɔ a nya yafei kɛɛ nga wulelɔ gbɔma a nya nɛɛmahui bɛɛ.

¹⁶Bi siɛgbuangaa Ngewɔ ma a bi yafei lekee, numu gbamɛi na wua tieni wu gomɛnga a yee nde yɛ Amiina bi jiɛgbua Yewɔ vɛlilei ma? Pele gbii na kɔɔva gbɔɔ bi ndema.

¹⁷Kia bɛɛ bi jiɛgbua Yewɔ vɛlilei nyandengɔ waa le, ɛɛ gbɔ numu wekei na ma kulo bɛɛ.

¹⁸Ngi siɛgbua Ngewɔ ma ajifa nga yɛpɛ pɛɛpɛ kɛnyɛyia weka hu i lewe wu gbi ma.

¹⁹Kɛɛ mu gomɛngaa Sɔsiihu, nga yɛ loni ngi njɛpɛ lɔɔlu le na nungaa ta gu a humɛnila aako ngi nungaa wekangaa gaa la kia ngaa njɛpɛ tauji puu le kɛnyɛyia wekangaa hu.

²⁰Nya mbaa Kristimableisia, waa gili kia ndopo mumungaa ta pie. A yɛ a ndopo mumungaa jumbu wielei hu kɛɛ a yɛ a kpakolongaa kilii nasia hu wa pie.

²¹ Nyɛingɔe Ngewɔ Gɔlɛi hu tɛɛ Ndemɔi ndeilɔ yɛ, “Nga lalɔ kɛnyɛblaa wekangaa hu ta kɛnyɛyia wekangaa le, ngi yɛpɛ nya nungeisia gama, kɛɛ na hu gbi nya nungeisia tɛɛ wolo nya ma,”

²²Faale na, kpayei na a pie numu i gu a kɛnyɛyia wekangaa lela i yɛni a seli lɔ nasia va tii Ngewɔ gɔɔ, Kristimableisia va ii le, tawao kpayei na a pie numu i gu a ngowili yekpei lela i yɛni a seli lɔ Kristimableisia va, nasia tii Ngewɔ gɔɔ ti va ii le.

²³Faale na Kristimableisia ti gomɛngaa hinda yila numui gbi ti tɔtoo a yɛpɛla kɛnyɛyia wekangaa hu, tawao ina numu wekangaa ɔɔ nasia tii Ngewɔ gɔɔ ti wuaailɔ na, tɛɛ nde taa yɛma wu kpɛlɛɛ wu gbowangɔe?

²⁴Kɛɛ numui gbi ti yaa Ngewɔ wowili lema watii numui na ii lani a Ngewɔ i wuaa na, na a mɛni a pielɔ i la la kɛ jumbumɔ lɔ a ngie. Na kpɛlɛɛ a mɛni a pielɔ ngi lii i ngi gbɛmbo.

²⁵Kili malɔwungɔi nasia ti ngi liihu ta gbualɔ foofo ya, tawao a mawɛɛlɔ i Ngewɔ vɛli, a gaye yɛ, “A tɔnya, Ngewɔ lɔ mbei wu lia!”

²⁶Ji mia nya lii i ma, nya mbaa Kristimableisia. Wu gomɛngaa Ngewɔ vɛliva, ngulei a yɛ numu yila lɔ yeya kpuava, kaai i pekei yeya, hinda gɛngɔi yila i yeepekei yeya, ngowili lelei kɛnyɛyia wekeisia hu i yeena ma, fasailei i yeepekei ma. Mahoungɔ kpɛlɛɛ i yɛ a kpɔma Kristimableisia gbi va.

²⁷Ina numu i yɛpɛmaa kɛnyɛyia wekangaa hu, numu fele ɔɔ sawa lɔ ta yɛpɛ a ngilangila, aa lewe na ma, tawao numu weka a yɛlɔ na a na fasai ta nde.

²⁸Kɛɛ ina numu gbi ii na aa gu a na fasaila ta nde kɛ mahoungɔ numui na a yɛpɛ kɛnyɛyia wekangaa hu i londo, i yɛpɛ ta yekpe gama kɛɛ Ngewɔ.

²⁹Mahoungɔ tutungaa fele ɔɔ sawa ti yɛpɛ, kɛ yeepekeisia ti kiti lewe na ma ta nde.

³⁰Kɛɛ Ngewɔ i ngowili yeingaa numu yila ma komɛi na hu, mahoungɔ numui na i yɛpɛma, i gbe a yɛpɛla.

³¹Wu kpɛlɛɛ wa Ngewɔ wowili hugɛlɔ a ngilangila aako numui gbi ti gaa tawao ti kpɔma majɔɔ.

³²Ngewɔ wowili lela yeekpayɛi a yɛ Ngewɔ lutuisia ti gbayei bu lɔ,

³³ajifa Ngewɔ ii loni a ji mu woo a vaya hu Sɔsiihu kɛ ji ma yɛ ndiilɛli hu. Kia a wie la Ngewɔbleisia kpɛlɛɛ lia hinda gbi,

³⁴mahoungɔ nyahangɛisia ti maa i yɛ louŋ Ngewɔ vɛli gomɛisia hu. Maa i houni ti yɛpɛ, kia Juuisia ti jawei ndeni la, maa ii houni ti yɛ komɛ maahu.

³⁵Hinda i yɛngaa na ti longɔ ti kɔɔ, ti ti hinii mɔli pɛleibu. Ngufema hinda le nyaha va kɔ i yɛpɛ Ngewɔ vɛli gomɛ hu.

³⁶Kɛ Ngewɔ wowili i gbuani wua lɔ gama? Ɔɔ wua lekee lɔ i fonga wu ma?

³⁷Numu gbi i gilingaa yɛ Ngewɔ lutu lɔ a ngie ɔɔ Ngewɔ Yafei i kpaya venga ngi wɛ, mahoungɔ i kɔɔ kɛ ji ngi nyɛima wu gama i yɛni a Ndemɔi jawei lɔ.

³⁸Kɛɛ ii woloilɔ ji ma ngi nyɛima, waa wolo ngi ma.

³⁹Faale na, nya mbaa Kristimableisia, a wu lii wu Ngewɔ wowili lela hu kɛɛ waa nungaa maabali ji ta yɛ yɛpɛma kɛnyɛyia wekangaa hu.

⁴⁰Mahoungɔe hindei gbi i wie panda tawao ndangɔ pele ma.