Read Ngowili Yekpei Numu Kpɛlɛɛ Va 1 KƆLINTIBLƐISIA 15 Bible Online

1 KƆLINTIBLƐISIA 15 - Ngowili Yekpei Numu Kpɛlɛɛ Va bible

1 KƆLINTIBLƐISIA 15

¹Kiahuna na, nya mbaa Kristimableisia, nya longɔ ngi Ngowili Yekpei hitɛ wu wɛ, na ngi ndeni wu ma, na wu majɔɔni, tawao wu langɔ la kpauŋ.

²Tia mia a Ngowili Yekpei na ngi ndeni wu ma ngɛɛ a wu yafeisia bawolɔ ina wu houilɔ mba kpaŋ, kɛlee wu lalei a Kristi i yɛ a baaba hinda.

³ Na ngi majɔɔni ngi teweilɔ wu gama, tawao ta lɔ bagɔma i ma i lewe hindei gbi ma, a ji: kɛ Kristi i haailɔ mu jumbuisia va, kia nyɛingɔ la Ngewɔ Gɔlɛi hu;

⁴ kɛ ti ngi gbɔwuilɔ tawao kɛ Ngewɔ i ngi vuluilɔ i ngi wumbu hee hu lɔwɔi yeesawei ma, kia nyɛingɔ la Ngewɔ Gɔlɛi hu;

⁵ kɛ i gɛilɔ a Pita, na wooma i gɛ a toblaa puu maahu feleisia kpɛlɛɛ.

⁶Na wooma i gɛilɔ a ngi woomablɛisia ti lewengɔ hɔndɔ lɔɔlu ma a leenga, tawao ti gbotoma tiaa heini lɛ, kia bɛɛ ti lɛɛngaa ti haanga.

⁷Na wooma i gɛilɔ a Jemisi, i yama i gɛ a toblɛisia kpɛlɛɛ.

⁸ Kɛlɛmɛi gbɔma, i gɛilɔ a nya bɛɛ, kia bɛɛ nya gbuangɔ a numui na ti ngi leni watii na maa ii houni ti ngi le.

⁹ Gbamaile bagɔma i toblaa kpɛlɛɛ ma i lewe nya ma, nya maa ii houni bɛɛ nya loliva a tomɔ ajifa ngi juwuya hitɛilɔ Ngewɔbleisia wooma.

¹⁰Kɛɛ Ngewɔ yauwandei va ngi yɛnga hii kia ngi na, tawao ngauwandei na i pieni a nge ii pilini. Ngi yengenga kpaukpaungɔ i lewe toblaa wekeisia kpɛlɛɛ ma kia bɛɛ ii yeni a nya vulii nya wiehinda kɛlee Ngewɔ yauwandei na yengema nya hu.

¹¹Faale na, i yɛ a nya ngi Ngowili Yekpei le wu ma ɔɔ tia, Ngowili yakpei mia mu gbi ma nde tawao tamia wu langɔ la.

¹²Kiahuna, ina mu wowili i yɛni a ji lɔ kɛ Ngewɔ i Kristi vuluilɔ i ngi wumbu hee hu, wu lɛɛngaa wa yee gu wu nde wuɛɛ haablɛisia tɛɛ vulu taa hiye hee hu?

¹³Ina haablaa tɛɛ hiye hee hu, kɛ Ngewɔ ii Kristi wumbuni hee hu,

¹⁴tawao ina Ngewɔ ii Kristi wumbuni hee hu, kɛ mu wowili lelei i yɛni a baaba gbama lɔ tawao kɛ wu lala la i yɛni a gbama hinda lɔ.

¹⁵Tewengɔ na ma, kɛ mua ndɛɛ gulama Ngewɔ ma, ajifa mu ndeilɔ muɛɛ i Kristi vuluilɔ i ngi wumbu hee hu; kɛɛ ina tɔnya le kɛ haablɛisia tɛɛ vulu taa hiye hee hu, kɛ ii Kristi wumbuni hee hu.

¹⁶Gbamaile ina haablɛisia tɛɛ hiye hee hu, kɛ Ngewɔ ii Kristi bɛɛ wumbuni.

¹⁷Tawao ina Ngewɔ ii Kristi wumbuni hee hu, kɛ wu lalei a Kristi i yɛni a baaba gbama lɔ tawao kɛ wuaa lekee jumbui luwɔyɛi hu.

¹⁸A gɛlɔ gbɔma kɛ nasia ti lani a Kristi kɛɛ ti haanga, ti jukulunga.

¹⁹Ina ndiiloi na mu piengɔ Kristi ma kpekpengɔ ndɛvui ji va lekee lɔ, peka gbi ii poma, kɛ mu mamanungɔe i lewe numu weka gbi ma dunya.

²⁰Kɛɛ tɔnyɛi a ji lɔ kɛ Ngewɔ i Kristi vuluilɔ i ngi wumbu hee hu kɛva kɛ nasia ta haa Ngewɔ a tia bɛɛ wumbulɔ hee hu.

²¹Ajifa kia lɔɔ numu yila i pieni hee i wani numui gbi va, hii lɔɔ numu yila lɔ a pie haablaa ti hiye hee hu.

²²Gbamaile kia lɔɔ numui kpɛlɛɛ ta haa jifa ti wilingɔ Adam hu, hii lɔɔ ti kpɛlɛɛ ta vulu ti hiye hee hu jifa ti wilingɔ Kristi hu.

²³Kɛɛ numu a hiye hee hu a ngi nda hiye-gbelei lɔ, Kristi yese pɛiŋ, na wooma kpemɛi a wa, nasia ngi woo a tie ta hiyelɔ.

²⁴Na wooma, dunyei gɛlɛ-gbelei a hitilɔ; Kristi a ngafa nyamuisia yeemahangeisia nyanilɔ kɛɛ yeemahublɛisia kɛɛ yeekpayablɛisia, i mahayɛi loko wuaa ngi Kɛkɛ Ngewɔ yeya.

²⁵Gbamaile mahoungɔ Kristi i lo mahayɛi ma haaŋ Ngewɔ i wɛlɛ juwuisia kpɛlɛɛ maahu, i ti wuaa ngi bu.

²⁶Ngewɔ juwui yeekɛlɛmayei a wɛlɛ maahu talɔ a hee.

²⁷Ajifa Ngewɔ Gɔlɛi yɛ, “Ngewɔ i hani kpɛlɛɛ wuaailɔ ngi gɔwɔ bu.” I laailɔ ke kɛ kia i ndeni yɛ “Hani Kpɛlɛɛ,” na ii gbɛlɛni Ngewɔ ma, na i hani kpɛlɛɛ wuaani Kristi bu.

²⁸Kɛɛ watii na Ngewɔ a hani kpɛlɛɛ wuaa Kristi mahayɛi bu, yeewatii mia ta vulii, Ngewɔ Hindoloi a ngie, a ta yekpe wuaa Ngewɔ bu, na i hani kpɛlɛɛ wuaani ngi bu; kɛ hani kpɛlɛɛ i wuaanga Ngewɔ mahayɛi bu.

²⁹Ɔɔ gbɛe vamia ta nungei nasia wua a Ngewɔ yei a haablɛisia ti jɔngɔ? Gbɔɔ ti lii i ma pieva? Ina tɔnya le, kia nungaa lɛɛngaa ta nde la, kɛ Ngewɔ ɛɛ haablɛisia wumbu hee hu, gbɛe ti nungei nasia wuama haablɛisia va?

³⁰Kɛɛ mua ta gbɛe vamia kpundɛ i hɛlɛni mu maahu kpele gbi?

³¹Nya mbaa Kristimableisia, hee lɔ hɛlɛni nya maahu folo gbi! Matɛi na nga kpua a wue jifa mua mu Lemɔi Yesu Kristi-ni mu wilingɔ hu, famia nga ji le.

³² Ina nyɔkɔ mua “fulahuangaa” mia mu lapinga mbei Ɛfisɔs lɛi hu kia nuuvu gbama i na, kɛ gbɛ nafa lɔ ngi sɔɔnga? Kɛɛ ina Ngewɔ ɛɛ haablɛisia wumbu hee hu, kɛ kia nungaa ta nde la, “A mu mɛhɛɛ mɛ, mu ndɔ gboli, ajifa mu haamaa sina.”

³³Waa wua yekpe hubaa. Kia nungaa ta nde la, “Hukpɔva a jumbu wieblaa a wu wiehindeisia hunyanilɔ.”

³⁴Wu nɛmahu yekpei i yama wu ma wu gbua jumbu weleisia ma. Gbɛɛ ngi nde wu wufe kɛ wu lɛɛnga wuii Ngewɔ gɔɔ.

³⁵Tɛnga numu yila a mɔlilɔ yɛ, “Haablɛisia ta yee gu ti hiye hee hu? Nduwui yeegbɛ nyɔkɔ lɔ a yɛ ti ma?”

³⁶Bi kpowamɔi! Bi tuhani galei hiingaa ndɔmei, ɛɛ vale kɛlee i haa pɛiŋ.

³⁷Tawao na ba hii i yɛni a tuhani galɛ gbasangɔ yakpe lɔ, tɛnga ketei ɔɔ tuhani gaalɛ weka, a yɛ gba tuhani yeefalei na ma i wama lakpama.

³⁸Ngewɔ lɔ a tuhani galei na gɔ a nduwui na a nɛɛ ngi wɛ feva; a tuhani gaalɛ gbi gɔlɔ a nduwui na mbɛngɔ ma.

³⁹Tawao nduwu laasi yakpei ii le aa yɛ ndɛvu-hani kpɛlɛɛ ma. Nduwu laasi yila mia i nuuvuisia ma, fuuhanisia ti ndɛi i gba, ŋɔningɛisia ti ndɛi i gba, nyɛngɛisia ti ndɛi i gba.

⁴⁰Tawao ngelema hakeisia lɔ na kɛɛ dunyama hakeisia; ngelema hakeisia ti nyandei i gba dunyama hakeisia ti nyandei ma.

⁴¹Foloi nda nyandei i gba, ngalui nda nyandei i gba, tumbekeisia ti ndei i gba; tawao tumbekeisia vulii bɛɛ ti nyandei i gba ti nyɔunyɔ ti ndɛi ma.

⁴²Hii a yɛ na ji haablɛisia ta hiye hee hu. Ti nduwui gbɔwungaa, a yɛ a nduwu lɔ a haa; i hiyengaa hee hu, a yɛ a nduwu lɔ ɛɛ haa.

⁴³Nduwui nyamungɔ a yɛla watii na ta kpɔwu tawao kpaya gbi ɛɛ yɛ hu; kɛɛ watii na a hiye, nyandengɔ a yɛla, tawao kpayangɔ.

⁴⁴Watii na ta nduwui gbɔwu nuuvu luwu a yɛla; watii na a hiye, ngafa luwui a yɛla. Nuuvu luwui lɔ na, faale ngafa luwui a yɛlɔ na huɛɛŋ.

⁴⁵Ajifa Ngewɔ Gɔlɛi yɛ, “Ngewɔ i haala hindoi Adam gbatɛni ngi vulungɔ;” kɛɛ Adam yeekɛlɛmayei, i yɛni a Kristi lɔ.

⁴⁶Ngafa luwui yese ii le aa loo kulɔ, kɛ nuuvu luwui, ngafa luwui i poma.

⁴⁷Adam yeehaalayei, ngi gbatɛngɔ a pɔlɛi, i gbuani pɔlɛi hu lɔ; Adam yeefelei i gbuani ngelegoohu lɔ.

⁴⁸Nasia dunyei woo a tie, ti gbuangɔ a numui na lɔ ngi gbatɛngɔ a pɔlɛi; nasia ngelegoohublaa a tie ti gbuangɔ a numui na lɔ i hiyeni ngelegoohu.

⁴⁹Kia lɔɔ numui na ti kpatɛni a pɔlɛi ngi gbuayei a mue, hii ma gbua a Hindoi na i gbuani ngelegoohu.

⁵⁰Nya mbaa Kristimableisia, na nya lii i ma ta lɔ a ji: na kpatɛngɔ a nduwui kɛɛ ŋamɛi ɛɛ gu aa wuaa Ngewɔ mahayɛi hu, tawao na kpatɛngɔ a haa-luwui ɛɛ gu aa yɛ na hu a yɛna kunafɔ.

⁵¹A wolo tɔnya lɔwungɔi ji ma: mu kpɛlɛɛ muɛ haa, kɛɛ watii na kɛlɛma bulii a vɛ, mu gbi ma maluvelɔ fulo

⁵²kia numu a yaama yali gbamaile bulii i vɛngaa, haablɛisia ta hiyelɔ hee hu, tɛɛ yaa haa gbɔma, tawao mu kpɛlɛɛ mu maa a luvelɔ.

⁵³Gbamaile na a lula, maa a luvelɔ huɛɛŋ a na ɛɛ lula; na a haa, maa a luvelɔ huɛɛŋ a na ɛɛ haa.

⁵⁴Faale ji wiengaa, na a haa i maluve a na ɛɛ haa, kɛ Ngewɔ layie na i ngi Gɔlɛi hu i longa ma ji i ndeni yɛ, “Temayɛi i hee gbolinga!”

⁵⁵“Hee, bi lemayɛi lɔ mi? Hee, bi gbayei na ba numu gbalɛ la taa mindo?”

⁵⁶Hee a ngi gbayei majɔɔ a jumbui lɔ a numu gbalɛ la, tawao jumbui a ngi gbayei majɔɔ a Sawei lɔ.

⁵⁷Kɛɛ a mu siɛgbua Ngewɔ ma na i temayɛi venga mu wɛ hee maahu mu Lemɔi Yesu Kristi sabui hu!

⁵⁸Faale na, nya mbaa Kristimableisia, a lo kpaŋ waa jɛɛjia. Kpele gbi a wu wugbakpa ngengei na hu wu piema Ndemɔi wɛ, ajifa wu kɔɔlɔ kɛ hinda gbi wu pieni Ndemɔi yengei hu bagɔma lɔ ma.