Read Ngowili Yekpei Numu Kpɛlɛɛ Va 1 KƆLINTIBLƐISIA 5 Bible Online

1 KƆLINTIBLƐISIA 5 - Ngowili Yekpei Numu Kpɛlɛɛ Va bible

1 KƆLINTIBLƐISIA 5

¹ Kiahuna tiaa vulii ndema tɛɛ puegbua hindeisia lɔ wiema wu lia, maluwangɔ wa na hii nasia vulii bɛɛ tii Ngewɔ gɔɔ tɛɛ pie. Ti hugɛnga a nge kɛ numui tia ngi kɛkɛ nyahɛi lɔ lama.

²Kɛ wa yee na gu wu mata wie? Kia waa mata wie, mahoungɔ wu lii i nyani, tawao numui na a na nyɔkɔ wie, mahoungɔ wu ngi gbɛ wu wooma.

³Tawao kia bɛɛ nya gbuhɛi maguhangɔ a wue, nyaa gilima a wue; tawao ji piengɔe bi tɔaa bɛɛ nya gbuhɛi lɔ miando wu lia tawao mu Lemɔi Yesu gbayei hu ngi wilanga a numui na lɛɛla i hinda maluwangɔi ji wienga. Ji wa gomɛ hinda yila piengɔ bi tɔaa bɛɛ nyaa wu lia, mu Lemɔi Yesu gbayei hu,

⁵wa yeenumui ji loko wuaalɔ Seitana yeya ngi gbuhɛi waava aako ngi yafei i bawo Kpɛmbo Volei na ma mu Lemɔi Yesu a wa.

⁶ Ii wɔnani wu va wu mamani wie! Wu njɛpɛwoi ji gɔɔlɔ: “Yisti wulo hii a pielɔ bledii gbi i ve i yɛ buufa.”

⁷ Mahoungɔ wu jumbu yisti wovei gbi wua wu ma aako wu yɛ vulii sɛwɛsɛwɛ. Na wiengaa kɛ wu wienga kia lɛwɛ lɔgbɔngɔ nina na yisti gbi ii hu, kia ngi kɔɔngɔ la vulii kɛ hii vulii wu na. Ajifa mu Lewema Gomɛi hugbatɛngɔe, kia na ti Kristi, mu Lewema Gomɛi yeembalɛi gbuanga a saa.

⁸ Faale a mu mu Lewema Gomɛi ga, kɛɛ muɛɛ ka a bledii na yisti wovei, jumbui kɛɛ pienyamui, i hu; ma ka a bledii na lɔ yisti gbi ii hu, sɛwɛsɛwɛi kɛɛ tɔnyɛi yeebledii.

⁹Kɔlɛi na hu ngi nyɛini wu gama ngi ndeilɔ wu ma ngɛɛ waa gbɛɛ ngawufemablɛisia ma.

¹⁰Ngii yɛpɛma nasia va tii Ngewɔ gɔɔ ta puegbua hindei wie, ɔɔ ta maninyamu wie nungaa ti yeya-hanisia ma, ɔɔ ta humɛi wie, ɔɔ ta hɛɛ nɔmɔliisia ma. Wua tieni waa gbɔ hinda gbi ma, kɛɛ ngii ndema ngɛ wu gbua dunyei hu feu.

¹¹Na nya lii i ma ji ngi kɔlɛi nyɛini tamia ngɛɛ waa gbɛɛ numui na ma a ta yekpe loli a wu mbaa Kristimɔ kɛɛ a puegbua hindei wie, ɔɔ a mani nyamu wie nungaa ti yeya-hanisia ma, ɔɔ a hɛɛ nɔmɔliisia ma, ɔɔ a njafɛi wie, ɔɔ ndɔhoumɔɔ a ngie, ɔɔ a humɛi wie. Waa hei wua yeenumu bondɛi na waa mɛhɛɛ mɛ.

¹² Nya yenge ii le kiti leweva nasia ma Kristimablaa yaa a tie, Ngewɔ lɔ a kiti lewe ti ma. Kɛɛ mahoungɔ wu kiti lewe wu mbaa Kristimableisia ma kia Ngewɔ Gɔlɛi i ndeni la yɛ, “A numu nyamui gbɛ i gbua wu lia.”