Read Ngowili Yekpei Numu Kpɛlɛɛ Va 1 KƆLINTIBLƐISIA 6 Bible Online

1 KƆLINTIBLƐISIA 6 - Ngowili Yekpei Numu Kpɛlɛɛ Va bible

1 KƆLINTIBLƐISIA 6

¹Wu yilayee ngi mbaa Kristimamɔi i hinda nyamu wiengaa a ngie, gbɛe a li a yeenjiɛi nasia gama tii Ngewɔ gɔɔ ti Kotii hu kia aa pie Ngewɔbleisia ti nde?

²Wuii kɔɔ kɛ Ngewɔbleisia lɔ ti wama dunyei gbɛmboma? Kɛ ina wua lɔ wu wama dunyei gbɛmboma, wuɛɛ gu a njia mumuisia lela?

³Wuii kɔɔ kɛ mua lɔ mu wama malikeisia gbɛmboma? Mahoungɔ le mu bɛɛ a kiahuna yiɛisia lela?

⁴Njia bondɛi nasia ti gulangaa, wa li a tie nungei nasia lɔ gama toma ii ti yeya Ngewɔmableisia lia?

⁵Wuɛɛ wufe? I gbɔu bɛɛ nɛmahulewemɔ yila a yɛlɔ wu lia a gu a njia lela Kristimableisia luahu.

⁶Kia waa ji wie, Kristimamɔi lɔ lima a ngi mbaa Kristimamɔi nasia gama tii Ngewɔ gɔɔ, ta yeenjiɛi le.

⁷Ji vulii Kotii yiangaa ta gula wu luahu a kɛlɔ kɛ wu gbuanga Kristi welei ma. Ɛɛ fesa wu va ti hinda nyamu wie a wue i lo wu ma? Ɛɛ fesa wu va ti wu gapu i lo wu ma?

⁸Kia waa na wie, wua vulii wa nyamui lɔ wie a wu nyɔunyɔ tawao wa wu nyɔunyɔ gapu wu mbaa Kristimableisia vulii bɛɛ.

⁹Wu kɔɔlɔ vulii pandawanda kɛ nasia ta nyamu wie tɛɛ Ngewɔ mahayɛi majɔɔ. Waa wua yekpe gbowa; nungei nasia ta ngawufema hindei wie ɔɔ ta hɛɛ nɔmɔliisia ma ɔɔ ta pueigbua ɔɔ ta ti mbaa hingeisia jɔɔ,

¹⁰ta humɛi wie, ɔɔ ta mani nyamu wie nungaa ti yeya-hanisia ma, ɔɔ ndɔhoubleisia a tie, ɔɔ njafablaa, ɔɔ humablaa, jisia kpɛlɛɛ yeengila bɛɛ ɛɛ Ngewɔ mahayɛi majɔɔ.

¹¹Hii wɔɔ wu lɛɛnga wu yɛ na. Kɛɛ Kristi i jumbui wuanga wu ma wu yɛnga sɛwɛ, wu yɛnga a Ngewɔ woo; tawao wu yɛnga a pɔnablaa Ngewɔ gama, Ndemɔi Yesu Kristi kɛɛ Ngewɔ Yafei biyei hu.

¹² Nungaa ta ndelɔ tɛɛ, “Sawei ɛɛ mu maabali hinda gbi wieva.” Tɔnya le, kɛɛ hindei gbi ii le aa nyande. Nga gulɔ a ndela ngɛɛ Sawei lumangɔe nya wɛ hinda gbi wieva, kɛɛ ngɛɛ luma hinda gbi i nya yɛ a ngi luwɔ.

¹³Numu wekei a ndelɔ yɛ, “Mɛhɛɛ i numu goi va lɔ, numu goi i mɛhɛɛ lɔ va.” Tɔnya le, kɛɛ folo yila Ngewɔ a ti veenjɔɔ kpɛlɛɛ nyanilɔ. Numu gbuhɛi ii na ngayengeva puegbua hinda va, i na yengeva Ndemɔi lɔ wɛ; tawao Ndemɔi lɔ mahɛi le numu gbuhɛi maahu.

¹⁴Ngewɔ i Ndemɔi vuliilɔ i ngi wumbu hee hu, tawao ngi gbayei a mua bɛɛ vululɔ ndɛvu ninɛi va.

¹⁵Wu kɔɔlɔ kɛ wu gbuhɛisia ti yɛni a Kristi gbuhɛi yeembekengaa lɔ. Mahoungɔe ngi Kristi gbuhɛi yeembeke yila wumbu ngi pote a puegbua nyahɛi gbuhɛi yeembeke? Na ɛɛ gu a wiela kulo bɛɛ!

¹⁶ A tɔnya wu kɔɔlɔ kɛ numui na a ngi luwui wili puegbua nyahɛi ndɛi hu i pienga tia ta ti yɛnga a kpuha yila. Ngewɔ Gɔlɛi i ndeilɔ leiŋ yɛ, “Hindoi taa ngi nyahɛi ti veenjɔɔ ta yɛ a numu yila lɔ.”

¹⁷Kɛɛ numui na a ta yekpe wili Ndemɔi hu tia ta ta yɛlɔ a yakpe.

¹⁸A gbele puegbua hinda ma. Jumbu hinda weka gbi numu a pie ɛɛ hinda wie a ngi gbuhɛi kɛɛ numui na a puegbua hindei wie i jumbu wulinga ngi gbuhɛi vulii ma.

¹⁹ Wuii kɔɔ kɛ wu gbuhɛi i yɛni a Ngewɔ Yafei wɛlei lɔ, na i wu hu tawao Ngewɔ i feni wu wɛ? Wu woo yaa wua yekpe, Ngewɔ lɔ ngi woo a wue;

²⁰i wu yeyani a hani lɔ. Faale a wu gbuhɛisia yayenge Ngewɔ wɔlɔva.