Read Ngowili Yekpei Numu Kpɛlɛɛ Va 1 KƆLINTIBLƐISIA 7 Bible Online

1 KƆLINTIBLƐISIA 7 - Ngowili Yekpei Numu Kpɛlɛɛ Va bible

1 KƆLINTIBLƐISIA 7

¹Nyaa na yɛpɛma kɔlooni hindei nasia ma wu kɔlɔ nyɛini nya gama fa. A nyandelɔ hindo va ina ii nyaha jɔni gbi.

²Kɛɛ jifa puegbua la gbotongɔ hu waa, mahoungɔe hindo gbi i ngi wuma nyahɛi jɔɔ, tawao nyaha gbi i ngi wuma hinii jɔɔ.

³Mahoungɔ hindoi i ngi mayengei wie ngi nyahɛi gama, nyahɛi i ngi mayengei wie ngi hinii gama, ti veenjɔɔ kpɛlɛɛ ti lapi ti ti nyɔunyɔ liima hindei wie.

⁴Nyahɛi ii le ngi woo aa yɛ a ngi gbuhɛi, ngi hinii lɔ ngi woo a ngie; hii lɔɔ hindoi bɛɛ ii le ngi woo aa yɛ a ngi gbuhɛi, ngi nyahɛi lɔ ngi woo a ngie.

⁵Waa ganga a wu nyɔunyɔ lava kɛlee wu pu ngooyila hu lɔwɔ wulo va aako wu Ngewɔ vɛli; kɛɛ i gbɔyɔngaa lekee wu yama lama. Wu ji wiengaa Seitana ɛɛ gu aa pie waa puegbua jumbu wie ajifa wue gbaha a wu huhoula.

⁶Sawa ii le ngaa yɛ fema wu wɛ ji wieva; ngi wu laahimaa lekee ngɛɛ wu pie.

⁷A tɔnya vulii ngaa lolɔ wu yilayee gbi i wie kia ngi na, kɛɛ Ngewɔ i numui gbi gɔni a kpaya ngilangila lɔ, numui ji ndɛi a ji, yeena ndɛi a na.

⁸Nyaa na ndema hindo-gbawui ma kɛɛ nyaha gbawui, kɛɛ ponyahɛi ngɛɛ a fesalɔ wu va wu lo kpawuyei hu kia ngi na.

⁹Kɛɛ ina wuɛɛ gu a wua yekpe huhoula kɛ hindoi i nyaha gɔli, nyahɛi i hini jɔɔ. Ji fesangɔ i lewe ji sɔɔ-manii a wu gbalɛ.

¹⁰ Sawa lɔ nya yeya nyahableisia tia hinibleisia va, nya ii le ngaa nda, Ndemɔi le. Nyahɛi aa gbele ngi hinii ma,

¹¹kɛɛ i gbelenga ngi ma, i lo kpawuyei hu, ina na ii le, i yama ti taa ngi hinii luahu gbatɛ tawao hinii aa gbele ngi nyahɛi ma.

¹²Nyaa ndema yeemɔniisia ma, nya vulii, Ndemɔi ii le, Kristimamɔi yeehindoi i longaa a nyaha na Kristimamɔ ii le, tawao yeenyahɛi i lumangaa taa ta ti heilaa ma, maa ii houni hiindoi na i gbele ngi ma.

¹³Tawao Kristimamɔi yeenyahɛi i longaa a hindo na Kristimamɔ ii le, tawao yeehindoi i lumangaa taa ta ti heilaa ma, maa ii houni nyahɛi na i gbele ngi ma.

¹⁴Ajifa hindoi na Kristimamɔ ii le a yɛlɔ a Ngewɔ woo jifa taa ngi nyahɛi na Kristimamɔ a ngie ti wilingɔ hu, tawao nyahɛi na Kristimamɔ ii le a yɛlɔ a Ngewɔ woo jifa taa ngi hinii na Kristimamɔ a ngie ti wilingɔ hu. Ina ji ii yɛ hii, ti leengeisia taa yɛ a ndeengɛi nasia lɔ tii Ngewɔ gɔɔ; kɛɛ kia i hii, ti yɛngɔe a Ngewɔ woo.

¹⁵Na hu gbi, numui na Kristimamɔ ii le i longaa i gbele ngi mbaa na ma Kristimamɔ le, i wie hii. Yeehinda bondɛi na hu, numui na Kristimamɔi a ngie yeehinii ɔɔ nyahɛi, nyaha-jɔɔ jawei ɛɛ gula ngi ma lumava sɔɛi na vayala ma. Ngewɔ i wu lolingalɔ heiva ndiilɛli hu.

¹⁶Kristimamɔi yeenyahɛi, bɛɛ gu baa kɔɔ kɛ ba bi hinii bawolɔ? Ɔɔ Kristimamɔi yeehinii, bɛɛ gu baa kɔɔ kɛ ba bi hinii bawolɔ?

¹⁷Wu yilayee gbi i luva a pelei na Ndemɔi i kɛnga a ngie kɛɛ yɛyii na wɔɔ i yɛ hu Ngewɔ i ngi lolini. Ji lɔ sawa le nga nungaa gaa la sɔsii kpɛlɛɛ hu.

¹⁸Numui na ngi heingɔ biliya i Ngewɔ loli gulungaa, aa lapi bili yeekpoi gbuava ta yekpe ma; numui na ngi heingɔ ii le bili ya i Ngewɔ lolii gulungaa, aa pie ti ngi hei bili ya.

¹⁹Gbamaile numu heingɔ i yɛla bili ya-o, ngi heingɔ ii le nga-o, gbɛogbɛ yaa na; na hindei yeembawa le tamia a Ngewɔ jaweisia houle.

²⁰Numu gbi i yɛ ngi yɛyii na hu i yɛ hu wɔɔ pɛiŋ i yaa Ngewɔ loli gulu.

²¹Nduwɔ lɔ yɛla a bie ji Ngewɔ i bi lolini? Na aa gbewe bi ma, kɛɛ ina pele i yaa bi wɛ gbuava nduwɔyɛihu, bi yeepelei hou.

²²Gbamaile nduwɔi na Ndemɔi a ngi loli ii yɛni a nduwɔ Ndemɔi gulɔ; hii lɔɔ na, numu na nduwɔ ii yɛni a ngie piɛŋ na Kristi a ngi loli i yɛni a ngi luwɔ lɔ.

²³Ngewɔ i wu yeyani a hani lɔ, waa yɛ a nuuvungaa ti luwɔ.

²⁴Nya mbaa Kristimableisia, numu gbi i vɛfɛ Ngewɔ ma kpaŋ tawao i lo ngi yɛyii hu kia lee i yɛ na wɔɔ Ngewɔ i ngi lolini.

²⁵Nyaa na yɛpɛma kɔlooni kɔlɛi na ma wu nyɛini nya gama ndalongɔ nasia ma nyaha ɔɔ hini ii ti yeya. Sawa ii nya yeya a gbua Ndemɔi gama kɛɛ nyaa nya nda nɛmahui gɛma jifa Ndemɔi i manunga nya ma, wa gulɔ a lala a nge.

²⁶Kpundɛi nasia va ti na kiahuna, nya langɔ la fesangɔe numu gbi i lo kia i na.

²⁷Ina nyaha lɔ bi yeya, kɛ baa lapi gbeleva ngi ma. Ina nyaha ii bi yeya; kɛ baa nyaha gɔli.

²⁸Kɛɛ bi nyaha jɔnga, jumbu hinda yaa na baa pie; tawao kpawu nyahɛi i hini jɔngaa, jumbu hinda yaa na aa pie. Kɛɛ ngaa lolɔ vulii fawɔli nasia ta nyahablaa kɛɛ hiniblaa male folo gbi aa wu male.

²⁹Nya mbaa Kristimableisia, na nya lii i ma ta lɔ a ji: lɔwɔi ii yaa gbotoni i longa, faale, i hiye watii ji ma mahoungɔ nyahableisia ti luva bi tɔaa bɛɛ nyaha ii ti yeya;

³⁰nasia ta wɔɔ, ti pie bi tɔaa bɛɛ ti mamanungɔ ii le; nasia ta yɛlɛ, ti pie bi tɔaa bɛɛ ti goohu nɛngɔ ii le; nasia ta hani yeya, ti pie bi tɔaa bɛɛ ti woo yaa hani na ti ngeyani;

³¹nasia ta dunyama gbateisia yayenge, ti pie bi tɔaa bɛɛ tii gbeweni fa. Ajifa kia dunyei yɛyii i na kiahuna, i gbɔyɔmaa hugutungɔ.

³²Nya longɔ ndiihɛlɛ gbi aa yɛ wu ma. Kpawu hindoi gbewengɔ Ndemɔi yengei lɔ va, ajifa a na gbi lɔ wie a gu ma Ndemɔi liilɛliva.

³³Kɛɛ nyahamɔi a gbewe dunyama hindei nasia lɔ va ta wie folo gbi, ajifa ngi longɔ i ngi nyahɛi liilɛli;

³⁴faale ngi lii yablangɔe. Kpawu nyahɛi ɔɔ mbɛlɛhu nyahɛi ta, Ndemɔi yengei lekee lɔ kpewengɔ a yɛla ngi ma ajifa ngi longɔ i ngi gbuhɛi kpɛlɛɛ ve Ndemɔi yengei wɛ; kɛɛ hinimɔi a gbewe dunyama hindei nasia lɔ va ta wie folo gbi ajifa ngi longɔ i ngi hinii liilɛli.

³⁵Ngi ji lemaa ajifa nya longɔ ngi gbɔ wu ma. Ngii lapima wu huyiliva a sawangaa. Kia ngaa na wie, nya longɔ wu na wie pɔɔnangɔ, a wu lii gbi Ndemɔi gama.

³⁶Hindoi taa nyahɛi ti Lahei wumbungaa heiva kɛɛ ti ndea tɛɛ taa sɔɔ wie, na wooma hindoi i kɔɔ kɛ taa hinda nyamu wiema a nyahɛi tawao i tɔ kɛ ta vulii ɛɛ yaa gu a ta yekpe huhoula faale mahoungɔ ti sɔɛi wie, kɛ ti pie, kia ngi longɔ la. Jumbu gbi ii ji hu.

³⁷Kɛɛ ina hindoi na, tii kpɔndani gbi ngi ma, i ngi lii huyilinga yɛ ɛɛ nyaha majɔɔ tawao i gu vulii a ta yekpe huhoula, i ngi nɛmahu gbatɛ gbɔɔ i piema, kɛ a nyandelɔ aa nyahɛi na jɔɔ.

³⁸Faale hindoi na a nyahɛi jɔɔ, i kpekpe lɔ wieni; kɛɛ hindoi na ɛɛ nyaha gbi jɔɔ i kpekpe lɔ wieni tewengɔ nyaha-jɔmɔi ma.

³⁹Hinimɔi gbɛɛngɔ ngi hini ma ina lekee ngi hini lɔ ndɛvu hu. Kɛɛ ngi hinii i haangaa, kɛ ngi hu i yɔkɔnga hini weka gbi jɔva ngi longɔ la, ina lekee ta bɛɛ Kristimamɔ lɔ a ngie.

⁴⁰Na hu gbi, i longaa ponyahayɛi hu ngi goohu a nɛɛlɔ i lewe na ma. Nya nɛmahuvɛi lɔ a ji tawao nya langɔe la kɛ nya bɛɛ Ngewɔ Yafei lɔ a nya hitɛ pele ma.