Read Ngowili Yekpei Numu Kpɛlɛɛ Va 1 KƆLINTIBLƐISIA 9 Bible Online

1 KƆLINTIBLƐISIA 9 - Ngowili Yekpei Numu Kpɛlɛɛ Va bible

1 KƆLINTIBLƐISIA 9

¹Nya gbuangɔ nduwɔyɛi bu, nya tomɔ lɔ a nge tawao ngi Yesu mu Lemɔi lɔnga. Wu kpɛlɛɛ nya yengei Ndemɔi wɛ yeehuvɛi lɔ a wie.

²Kia bɛɛ nungaa wekangaa tii lani la kɛ tomɔ lɔ a nge, wua wu langɔe la vulii! Ji wu yɛnga a Kristimableisia Ndemɔi hu, wua vulii lɔ tɔmaseli a wue kɛ tomɔi lɔ a nge.

³Nungaa ti yaa nya magbuama, hii nga nya yekpe magao.

⁴Pɔɔnangɔ ii le kɔɔ mu mɛhɛɛ majɔɔ kɛɛ hani kpɔliva mu yengei va?

⁵Pɔɔnangɔe nya bɛɛ ngi ya li a nyahɛi na Kristimamɔ a ngie jiɛisiamii kia toblaa wekeisia kɛɛ Ndemɔi ndeengɛisia kɛɛ Pita-ni ta pie?

⁶Mua Banabasi felekpe ii le mahoungɔ mu yenge navoo ma nguava mu mahindeisia hu?

⁷Sojei yeegbɔɔ a ta yekpe ngi mapawɛi waa kɔɔ i yɛ ngi yengei hu? Kpalamɔi yegbɔɔ a tuhani hii ɛɛ yeenguɛi mɛ? Mbala lomɔi yeegbɔɔ ɛɛ ngi baalangɛisia ti nɔnɔi gboli?

⁸Ngii tɔmaseli jisia gbuama nɛmahu ajifa Sawei i yeenjɛpɛ yakpei ji lɔ leni.

⁹ Nyɛingɔe Mojisi Jawei hu tɛɛ, “Nikɛi i yaa bi bei yangama, baa ngi lɛi yili.” Ngewɔ ii gbeweni nikɛi na vulii va?

¹⁰Mua ii le ngi lii aa yɛ mu ma ji i na leni? Mɔlima ii ma, nyɛingɔ mua lɔ va ajifa mba-wumɔi a pulɔ, ngangamɔi i nganga, ta gili kɛ ta mbei majɔɔlɔ.

¹¹ Mu ngafa yekpei hinga wu liisia hu ji mu yɛ a ngowili yekpei le. Maa ii houni mu dunyama hanisia yeekpekpeyei majɔɔ a wue?

¹²Ina pɔɔnangɔe numu wekeisia va ti lii i yɛ wu ma kpekpeyei jisia majɔɔva a wue mu nda wɔnɛi ii leweni ti ndɛi ma? Na hu gbi mu yaa toni i pɔɔnɛi ji wooma. Kia ngaa na wie, ngi gunga hinda gbɔugbɔi gbi bu aako mu pie Ngowili Yekpei kɔlooni Kristi ma i vaya hu.

¹³ Wu kɔɔlɔ vulii pandawanda kɛ nungei nasia ta yenge Ngewɔ Wɛlei bu ta ti mɛhɛɛ jɔɔ a Ngewɔ Wɛlei lɔ tawao nasia ta yeesaaisia gbua saagbuamɛi, ta saahaniisia ti ndɛi majɔɔlɔ.

¹⁴Hii lɔɔ Ndemɔi i sawa langa kɛ nasia ta Ngowili Yekpei le ta ti jɔɔ hanisia majɔɔ Ngowili Yekpei hu lɔ.

¹⁵Kɛɛ ngii yaa toni nya lɔnyɛi ji wooma tawao ngii kɔlɛi ji nyɛima yeekpekpeyei jisia majɔɔva nya yekpe va. Ajifa mahoungɔ ngi haa kia numu aa nya baa a hani na nga lawoo la.

¹⁶Sabu gbii na ngi lawo jifa lekee nga Ngowili Yekpei le; ajifa kpa lɔ nya ma ndeva. Gbamaile kpundɛ maluwangɔ waa a gulalɔ nya ma ina ngii Ngowili Yekpei leni!

¹⁷Ina ngi yeengengei ji wiema a nya wuma we lɔ, nya lii aa yɛlɔ nya pawala ma; kɛɛ ngi piemaa jifa kpɔndangɔ nya ma, ajifa Ngewɔ i yeengengei ji loko wuaanga nya yeya.

¹⁸Gbɔɔ nya pawɛi le? Tamia a ji ngi sabu majɔɔnga Ngowili Yekpei leva ngɛɛ hani gbi mɔli fa tawao ngɛɛ gbewe kpekpeyei nasia va mahoungɔ ngi majɔɔ Ngowili Yekpei leva.

¹⁹Nduwɔ yaa nge, numu gbi luwɔ yaa a nge; kɛɛ ngi nya yekpe yɛnga a numui gbi ti luwɔ aako ngi yɛ a nungaa mato majɔɔ ti yɛ a Kristimableisia.

²⁰Ngi yaa Ngowili Yekpei lema Juuisia ma nga pielɔ bi tɔaa bɛɛ Juumɔi mia a nge aako ngi gu ti ma; tawao kia bɛɛ nya vulii ngii Mojisi Jawei bu, nga pielɔ bi tɔaa bɛɛ ngi mbu lɔ ji nga yɛ Ngowili Yekpei lema nasia ma ti mbu, aako ngi gu ti ma.

²¹Hii lɔɔ nga pie ji nga yɛ yengema nasia Juu yaa tie ti lia, nga pielɔ bi tɔaa bɛɛ Juumɔ yaa nge, ngii toni Juuisia ti Jawei wooma, aako ngi gu nasia ma Juumɔ yaa tie. Ji ii kɛni kɛ ngɛɛ Ngewɔ Jawei hou; ngi Kristi jawei bu lɔ vulii a tɔnya.

²²Ji nga yɛ nasia lia ti layii a Kristi ii gbayani, nga hawalɔ kia ti yilayee gbi i na, aako ngi gu ti ma. Faale nga wotelɔ a hani gbi numu gbi gama, aako ngi ti lɛɛnga bawo a pele gbi lekee nga gu la.

²³Nga ji gbi wielɔ Ngowili Yekpei vayava hu gbi, aako ngi yeelubɛi kulo majɔɔ.

²⁴Wu kɔɔlɔ kɛ piimɛblaa gboto lɔ ta wiimɛ mawali ma kɛɛ numu yakpe lɔ a gu yeemawaai ma. Mahoungɔ wu wiimɛi aako wu gu yeemawai ma.

²⁵Numu gbi lekee ngi longɔ i wili kaahu-looli nasia hu ta pie mawali ma, a makɛ kpaukpau waa lɔ wie aako i lewe ngi mbaangɛisia gbi ma. I lewengaa numui gbi ma, ta maha-bɔlɔ wɛlɛlɔ ngi wumba na ɛɛ lɛmbi panda. Kɛɛ mua ma pielɔ aako mu maha-bɔlɔ majɔɔ na ɛɛ nyani kunafɔ.

²⁶Famia nga piimɛi wie yakpe pɔɔnangɔ ngi fo kalɛi ma; famia nya wiengɔ kia bɔɔtani wilimɔi na ngi bɔɔtani ɛɛ gbula numu ma.

²⁷Nga nya magbatɛlɔ pandawanda pɛiŋ aako ngi ngowili yekpei leengaa nungaa wekeisia gama, taa nya vulii gbɛ na yeesawei nyaniva.