Read Ngowili Yekpei Numu Kpɛlɛɛ Va 2 KƆLINTIBLƐISIA 1 Bible Online

2 KƆLINTIBLƐISIA 1 - Ngowili Yekpei Numu Kpɛlɛɛ Va bible

2 KƆLINTIBLƐISIA 1

¹ Nya nya Pɔɔl, Ngewɔ i loko loni nyama yɛva a tomɔ Yesu Kristi va, mua mu mbaa Kristimɔi Timoti mia mu kɔlɛi ji nyɛima Ngewɔblei nasia gama ti Kɔlinti kɛɛ Ngewɔblei nasia kpɛlɛɛ ti Akaya lɔlei luwuma gbi.

²Nyaa mu Kɛkɛ Ngewɔ vɛlima kɛɛ Ndemɔi Yesu Kristi ti wu gɔ a ngauwaundei kɛɛ ndiilɛli.

³A mu siɛgbua mu Lemɔi Yesu Kristi ngi kɛɛ Kɛkɛ Ngewɔ ma, manuma Kɛkɛi na a gbɔ mu ma kpelema gbi.

⁴Ngewɔ na a gbɔ mu ma mu hinda gbɔugbɔi kpɛlɛɛ hu aako mu gu a gbɔla nasia ma hinda gbɔugbɔu laasi gbi i ti ma; mu yeekpɔma yakpei na yayenge mu majɔɔnga a Ngewɔ.

⁵Kpalɛ gboto i lailɔ Kristi ma, tawao kpalɛ a lalɔ mua bɛɛ ma kia i lani la ngi ma; tawao kia Ngewɔ i gbɔni la Kristi ma, hii Kristi sabui hu Ngewɔ a gbɔ mu ma hulewengɔ gbo.

⁶Watii gbi lekee kpalɛ i langaa mu ma, wu gbɔmi vamia, aako wu kpɔma majɔɔ wu lanayei i gbaya; tawao mu kpɔma majɔɔnga a Ngewɔ, wa yeekpɔma yakpei na majɔɔlɔ a pie wu gu kpalɛ laasi yakpei nasia bu a ndiilo ta la mu ma.

⁷Faale mu layii a wue mahu ɛɛ gbua; mu kɔɔlɔ kɛ kia lɔɔ kpalɛi na i langa mu ma i langa wu ma, kpɔmɛi na ma majɔɔ wa majɔɔlɔ.

⁸ Mu mbaa Kristimableisia, mu longɔ wu hinda gbɔugbɔi na gɔɔ i lani mu ma Esia lɔlei hu. Kahɛi nasia ti ndani mu wumba ti wɔlɔyii kɛɛ ti miniyii i pielɔ mu la la kɛ mu lɛɛvui i gbɔyɔmaa.

⁹Mu langɔ yɛla la vulii kɛ mu haamaa fɔ; kɛɛ na wieilɔ aako maa liivala mua yekpe ma, mu liivala Ngewɔ yakpe ma, na a haablaa vulu i ti wumbu hee hu.

¹⁰I mu gbuɛilɔ haa maluwangɔi na nyɔkɔ hu, mu langɔ la kɛ a mu bawolɔ tawao mu liivalanga ngi ma kɛ a mu bawolɔ gbɔma,

¹¹ji wua bɛɛ wa gbɔ mu ma a Ngewɔ vɛlila mu va. Wu Ngewɔ vɛlingaa mu va na gbotongɔ, Ngewɔ a mɛnilɔ tawao a mu lubalɔ; tawao nungaa wekangaa gboto ta siɛgbualɔ Ngewɔ ma mu luba va.

¹²Ma mata gbualɔ ajifa mu lii yekpei lɔ selima kɛ mu jianga panda dunyei hu, wua vui wu gama, a pɔɔnɛi kɛɛ ndiigolei na Ngewɔ longɔ la. Nuuvu nɛmahulewe ii le maa jia la kɛlee Ngewɔ yauwandei yeekpayei.

¹³Na wa gu a kaala tawao wa mbugɔɔ, ta lekee lɔ ma nyɛi wu gama. Na hu gbi, wuɛɛ mu wiehindei kpɛlɛɛ hugɔɔ pandawanda kiahuna, kɛɛ nya lii lɔ ma kɛ wa mu wiehindei hugɔɔlɔ gbalauŋ, aako Foloi na ma mu Lemɔi Yesu a yama mbei nuuvunga gbɛmbova, wa mata gbualɔ a mue kia ma kpua a wue.

¹⁵Nya langɔ waa yɛla a ji kpɛlɛɛ famia ngi hugbatɛni haala fova wu ma aako wu kohunɛ fele majɔɔ.

¹⁶ Nya longɔ yɛla ngi foo wu ma ji nga yɛ lima Masidonia lɔleihu kɛɛ ji gbɔma nga yɛ yamama aako wu gbɔ nya ma ngi yama Judia lɔleihu.

¹⁷Ji ngi yɛ hugbatɛi ji wiema ngi pieni a sɔbɛ lɔ. Ji nga nya hugbatɛisia wie, ngii ti wieni nya yekpe lɔ nafava, ngɛ luma nga mawali a leenga?

¹⁸Kia lɔɔ Ngewɔ lɔnyangɔ, mu layie na ma nde wu ma ɛɛ ya a tuma kɛɛ mawali.

¹⁹ Gbamaile Ngewɔ Hindoloi Yesu Kristi na mua Silvanɔs kɛɛ Timoti mu ngi wowili leni wu ma, ii yɛ a tuma kɛɛ mawali, ta lɔ Ngewɔ lumawoi a ngie kpelema gbi;

²⁰jifa ta lɔ Ngewɔ Lahei kpɛlɛɛ yeetumawoi a ngie. Na vamia ji ma Ngewɔ vɛli ma nde muɛɛ “Amiina” Yesu Kristi biyɛi hu Ngewɔ wɔlɔ va.

²¹Ngewɔ vulii lɔ a pie mua wueni mu yɛ a Kristi woo; Ngewɔ vulii lɔ i mu gbuanga ma gba ngi yengei va;

²²i loko longa mu ma kɛva kɛ ngi woo lɔ a mue tawao i Ngewɔ Yafei venga mu wɛ mu liisia hu a kpɔmbɛi na kpɛlɛɛ va i ngi yeya mu va.

²³Ngewɔ lɔ nya jeli le, ta lɔ i nya lii huvaa gɔngɔ! Aako ngaa wu huyili, famia ngii wani Kɔlinti.

²⁴Ii mu lii hu ndeva wu ma a kpaya gbɔɔ mahoungɔ wu la la; mu kɔɔlɔ kɛ wu na gɔɔlɔ vulii wu langɔ la, faale mua wueni mu yengemaa aako wu goohu i nɛɛ.