Read Ngowili Yekpei Numu Kpɛlɛɛ Va 2 KƆLINTIBLƐISIA 12 Bible Online

2 KƆLINTIBLƐISIA 12 - Ngowili Yekpei Numu Kpɛlɛɛ Va bible

2 KƆLINTIBLƐISIA 12

¹Kpɔndangɔe nya ma lawova kia bɛɛ kpekpeya gbi ɛɛ gbua hu. Kɛɛ nga yɛpɛlɔ naa kɔloongɔ ndɔwuma hindei nasia ma Ndemɔi i kɛnga a nge.

²Ngi Kristimamɔ yila gɔɔlɔ na Ngewɔ i ngi jogbani i lɛ a ngie Aijɛnɛ yeemahuyei hu kungɔ na a foo puu maahu naani. Nya yekpe vulii mia ngi nya ma, kɛɛ ngii yaa kɔɔ ina ji i wieilɔ vulii ngi foo vulii aijɛnɛ ɔɔ ina hinda mia ngi hulɔni, Ngewɔ lekee lɔ i kɔɔngɔ.

³Gbɛɛ ngi nde gbɔma, ngi kɔɔlɔ kɛ Ngewɔ i nya jogbɛilɔ i lɛ a ngie aijɛnɛ. Ngii kɔɔ gbɔma ina i wieilɔ vulii ɔɔ ina hinda mia ngi hulɔni Ngewɔ lekee lɔ i kɔɔngɔ,

⁴tawao i hindangaa humɛniilɔ na numu ɛɛ gu aa hugɛ, hindangaa kpaya ii numu gbi wɛ yɛpɛva la.

⁵Faale nga lawolɔ a yeehindei jisia kɛɛ ngɛɛ lawo a nya yekpe, kɛlee hindei nasia ta nya vakaleweyii gɛ.

⁶Kia bɛɛ nga lolɔ ngi lawo, ngɛ yɛ a kpowamɔ, ajifa tɔnyɛi lɔ nga nde. Kɛɛ ngɛɛ lawo aako numu aa gili a nge tewengɔ na ma i tɔnga nya hu kɛɛ i mɛninga nga nde.

⁷Kɛɛ aako nya yaama aa lɛ kabande hinda gbotoi nasia va ngi hulɔni, Ngewɔ i kpalɛ nyamunyamu wɛlɛnga nya luwui ma. Yee kpalɛi lɔ a Seitana lutui yengei wie a ji a nya lewe aako kunafɔ nya yaama aa lɛ hulewengɔ.

⁸Heima sawa ngi yɛ Ndemɔi manɛnɛ ngɛɛ i kpua nya ma.

⁹Kɛɛ i ndeilɔ nya ma yɛ, “Ngauwanda wai ji ngi piengɔ a bie a gulɔ bi va, ajifa watii na ba yɛ nyɔngɛnyɔngɛ, yeewatii mia nya gbayei na i bi hu a yenge i lewe kpɛlɛɛ ma.” Kiahuna nya goohu nɛngɔ waa le lawova a nya yɛla nyɔngɛnyɔngɛ aako Kristi gbayei i yei nya ma nya mahugbeva.

¹⁰Faale nya goohu nɛngɔe ji kpalɛ a la nya ma Kristi va. Nya gbewe ii fakalewe hu ɔɔ mbɛlɛnyani ɔɔ hou nyamu ɔɔ hinda gbɔugbɔu ɔɔ fitini hu. Gbamaile watii na nga baa a nya nda gahui kpɛlɛɛ, ta lɔ Kristi gahui a wuaa nya hu.

¹¹Nya luvama kia kpowamɔ na, kɛɛ wua mia wu kpɔndanga nya ma pieva. Wua mia mahoungɔ wu nya lato. Gbamaile ngii yɛni bɛɛ a gbɛogbɛ, nasia wu ti wumbunga a Ngewɔ lutu waawangaa tii leweni nya ma a pele gbi.

¹²Kabande hinda waawaa gbotoi nasia ta kɛ kɛ Kristi loomɔ mia a nge, ngi ti wielɔ wu lia a ndiihou wa.

¹³Gbɔɔ ngi pienga sɔsiblaa wekangaa wɛ tamia ngi pieni wu wɛ, kɛlee ji lekee ngii loko heini wu wɛ navoo va nguava nya mahindeisia hu. A manu nya ma nyamui ji va ngi pieni a wue!

¹⁴Heima yeesawa lɔ na ngi nya magbatɛnga wava wu gama tawao ngɛɛ loko hei wu wɛ hani gbi va ajifa wu yeyahani ii le ngaa lo la kɛ wua vulii. Gbɛva sie ndeengaa ii le mahoungɔ ti ti leblɛisia gɔ, ndebleisia lɔ mahoungɔ ti ti leengeisia gɔ.

¹⁵Nya goohu a nɛɛlɔ nya yeyahani gbi veva kɛɛ nya gbuhɛi vulii gbɔva wu ma. Wa lolɔ a nge kulo hii jifa nya longɔ a wue hulewengɔ?

¹⁶Wa lumalɔ ma na kɛ ngii wani a navoo hinda yeekaha gbi wu maahu. Kɛɛ wu lɛɛnga wa ndelɔ wuɛɛ kaasoo mia ngi kulanga wu ma, ngi wu hounga kia mani a ndei.

¹⁷Kɛɛ nga yee na wie? Tutui nasia ngi ti loni wu gama ti hani gbi gbuɛilɔ wu yeya?

¹⁸Ji ngi Taitɔs manɛnɛni ngɛɛ i li wu gama, ngi pielɔ taa mu mbaa Kristimamɔ weka ti li, Taitɔs i hani gbi gbuɛilɔ wu yeya ta yekpe va? Mua ta ma yenge ngafa yakpei hu lɔ, mua ta ma jia mu nyɔunyɔ gɔɔwɔi hu, ma hinda gbi wie a pele yakpei.

¹⁹Tɛnga wuaa wɔɔ gba gilima kɛ mua mu magaoma wu gulɔ. Na ii le kulo bɛɛ. Ma tɔnyɛi lɔ le kia Kristi longɔ mu nde Ngewɔ gulɔ, tawao, nya liima ndiamɔisia, hindei gbi ma pie, mu piema gbɔva lɔ wu ma.

²⁰Nya liihɛlɛngɔe tɛnga ji nga wa wu gama nga male wu gba na ma nga lo la, tawao tɛngaa, wuɛɛ lo a na nga pie. Nya liihɛlɛngɔe tɛngaa nga male wa yianjia, wa tolo gbua wu nyɔunyɔ ma, wa liilewe wu nyɔunyɔ ma, wa gbewe wu gbekpeyei lekee va, wa yɛpɛ a wu nyɔunyɔ, wa mamani hindangaa wie, wa hindeisia huwu.

²¹Nya liihɛlɛngɔe vulii kɛ ji gbɔma nga wa, mu Yewɔɛi a nya yawufelɔ wu yaama tawao nga wɔlɔ nungei nasia kpɛlɛɛ va ti jumbui nasia wiema lekee ti piema wɔɔ ngovama, tawao tii yaa gbeni ngawufema hindei ma kɛɛ puegbuala hindeisia.