Read Ngowili Yekpei Numu Kpɛlɛɛ Va 2 KƆLINTIBLƐISIA 13 Bible Online

2 KƆLINTIBLƐISIA 13 - Ngowili Yekpei Numu Kpɛlɛɛ Va bible

2 KƆLINTIBLƐISIA 13

¹ Heima yeesawa lɔ naa ngi wama wu gama. Ngewɔ Gɔlɛi yɛ, “Numu gbi i sawei nyaningaa, numu fele ɔɔ sawa ti seli tɛɛ ti tɔilɔ i pie.”

²Wu mbaangɛi nasia ti jumbu wieni ngovama kɛɛ yeepekeisia gbi, nya longɔ ngi ti laahii; ngi ti laahilɔ ji ngi pɛi yeefelei wieni wu gama, tawao nyaa ti laahiima gbɔma kiahuna lɛ nya maguhangɔ: kɛɛ watii wekei na nga wa nga kpalɛ lalɔ ti ma, ngɛɛ manu numu gbi ma.

³Tɔmaseli kpɛlɛɛ wu longɔ la nga felɔ wu wɛ kɛva kɛ Kristi mia i yɛpɛma nya hu. Kristi vakalewengɔ ii le ji wua tieni wa gbɔ hinda ma, a ngi gbayayii gɛlɔ wu lia.

⁴Tɔnya le kɛ Kristi vakalewengɔ yɛla ti ngi waani Krɔsii ma, kɛɛ Ngewɔ gbayei i pienga ngi vulungɔ kiahuna. Mua bɛɛ, ji mua Kristi-ni mu wilingɔ hu, mu vakalewengɔe. Kɛɛ kpelei na ma foo wu ma Kɔlinti, mua wueni mu hu i kpɔ, ma yɛlɔ mbɛya hu mua Kristi vulungɔi-ni, kɛ mu Ngewɔ gbayei majɔɔnga hinda wieva.

⁵A wua yekpe wogbɛ pandawanda aako wu tɔ ina wu langɔe vulii a Kristi. A tɔnya vulii wu kɔɔlɔ kɛ Yesu Kristi lɔ wu hu, ina ji wu wua yekpe wogbɛni wu tɔilɔ kɛ wu gbahailɔ.

⁶Nya langɔ la wu kɔɔlɔ kɛ ti mu wogbɛnga ti tɔnga kɛ toblaa mia a mue vulii a tɔnya.

⁷Kɛɛ mua Ngewɔ vɛlima kɔɔ waa hinda nyamu wie; kɛva ii le kɛ mu gungɔi, kɛɛ aako wu na wie pɔɔnangɔ, kia bɛɛ piengɔe bɛ kpahabublaa mia a mue.

⁸Jifa hindei nasia lekee ta Ngowili Yekpei lɛ gulɔma tia lɔ ma gu a ti wiela; muɛɛ gu a gbɛogbɛ wiela Ngowili Yekpei yamava wooma.

⁹Gbamaile mu goohu a nɛɛlɔ mua mu vakalewengɔ a yɛla kɛɛ wua wu gbayangɔ. Famia ma Ngewɔ vɛli aako wu li gulɔma a yɛla a Kristimablaa yekpengaa.

¹⁰Na vamia ngi ji kpɛlɛɛ nyɛima wu gama kia nya maguhangɔ a wue, aako watii na nga foo wu ma, ngaa sabu jɔɔ ngagbalɛ hinda wieva a wue ji nga yɛ kpayei na yayengema Ndemɔi i fenga mbɛ wu loova, wu wolova ii le.

¹¹Faale naa, nya mbaa Kristimableisia, a mu kpɔkɔ-o. A lapi wu yɛ a Kristimablaa yekpengaa; a nya laahiisia wumbu; wu wo i yɛ yila, wu hei ndiilɛli hu, tawao Ngewɔ na ngi longɔ a ndoma kɛɛ ndiilɛli a yɛlɔ wu lia.

¹²A va wu nyɔunyɔ ma a ndoma lii. Ngewɔbleisia gbi mbei tɛɛ ta va wu ma kaka.

¹³Mu Lemɔi Yesu Kristi yauwandei kɛɛ Ngewɔ lomɛi kɛɛ

¹⁴Kayema Yafa mbaayɛi ti yɛ wu kpɛlɛɛ ma.