Read Ngowili Yekpei Numu Kpɛlɛɛ Va 2 KƆLINTIBLƐISIA 2 Bible Online

2 KƆLINTIBLƐISIA 2 - Ngowili Yekpei Numu Kpɛlɛɛ Va bible

2 KƆLINTIBLƐISIA 2

¹Faale ngi nya lii huyiliilɔ ngɛ ngaa wa wu gama wu lii aa gbɔma nyani.

²Ajifa ina nya wala wu gama yeehuvɛi a yɛ lekee a ndiinyani lɔ, numu weka gbi ɛɛ yɛ na nya lii nɛpɔva kɛlee wua ngi wu lii nyaninga.

³Na vamia ngi kɔlɛi na nyɛini ngii yɛ loni ngi wa wu gama ngi ndiinyani majɔɔ a nungei nasia vulii mahoungɔ ngi kohunɛ majɔɔ a tie. Ajifa nya langɔe vulii la kɛ nya goohu i nɛngaa, kɛ wua bɛɛ wu gbi wu goohu i nɛnga.

⁴Gbamaile watii na ngi kɔlɛi na nyɛini nya lii mɔnɛngɔ yɛla hulewengɔ gbo, ngayɛi a yei nya yaama; nya lii ii yɛ ma pieva wu lii i nyani, kɛɛ aako wu kɔɔ kia nya longɔ a wu gbi.

⁵Numui na i wani a kpalɛi na, ii pieni a nge kɛ wua ɔɔ, i gbɔu bɛɛ, wu lɛɛngaa. Ngi ndeilɔ a kɛyii ji hu we kɔɔ ngaa ngagbalɛ hulewengɔ wie a yeenumui na i wani la.

⁶Kpalɛi na wu gbotoma wu ndanga ngi ma i lo hii.

⁷Na hu gbi mahoungɔ wu manu ngi ma, wu ngi lii gba, aako ngi lii aa nyani hulewengɔ.

⁸Faale nyaa wu manɛnɛma aako wu pie i kɔɔ kɛ wu longɔe a ngie.

⁹Ngi kɔlɛi na nyɛilɔ wu hugɔɔva aako ngi kɔɔ ina wu woloilɔ ndahii ma ngi feni wu wɛ.

¹⁰Wu manungaa numu gbi ma na va i pienga, nya bɛɛ nga manulɔ ngi ma. Ajifa ngi manungaa numu ma kɛ ngi pienga wu va lɔ, nya jeli a Kristi lɔ,

¹¹aako Seitana aa gu aa wɛlɛ mu mahu; ajifa mu kɔɔlɔ gbɔɔ i ngi nɛmahu.

¹² Ji ngi foni Toasi leihu Ngowili Yekpei leva kɔloongɔ Kristi ma, ngi tɔilɔ kɛ Ndemɔi i pele lawonga nya wɛ yeengengei ji wieva na.

¹³Kɛɛ nya liihɛlɛngɔ waa yɛla ajifa ngii mu ndee Taitɔs maleni na. Faale ngi vɛlilɔ ti ma ngi lewe ngi li Masidonia lɔleihu.

¹⁴Kɛɛ a mu siɛgbua Ngewɔ ma! Ajifa i temayɛi venga Kristi wɛ jumbui gbayei maahu tawao mu toblɛisia mua Kristi-ni mia ma yeekɔ-vaya-gomɛi ga. Ngewɔ a yenge a mu loko lɔ kɔɔ Kristi hindei hugɔɔlei i vaya hu gbi kia hani gu nɛnɛɛ.

¹⁵Gbamaile mu wiengɔe kia hani gu nɛnɛɛ Kristi i kpuani a saa i fe Ngewɔ wɛ faya va nasia lia ti bawoma kɛɛ nasia ti jukuluma.

¹⁶Nasia va ti jukuluma, i yɛni a hani gu nyamunyamu waa lɔ a gu a numu waala; kɛɛ nasia va ti bawoma, i yɛni a hani gu nɛnɛɛ waa lɔ a wa a ndɛvui. Ye lɔ na hɔɔ a gu a ngenge bondɛi ji wiela?

¹⁷Ajifa muii wieni kia numu gboto ti na, tɛɛ gu yeengengei ji ma. Ta Ngowili Yekpei lelɔ bi tɔaa bɛɛ feehani na ta majia ta ti mɛhɛɛ jɔɔ hu. Kɛɛ mua mu wɔnangɔe mu yengei hu; ma Ngowili Yekpei le a pelei na lɔ Ngewɔ kɛni a mue kia tutungaa i ti loni kɛɛ kia Kristi yengeblaa.