Read Ngowili Yekpei Numu Kpɛlɛɛ Va 2 KƆLINTIBLƐISIA 7 Bible Online

2 KƆLINTIBLƐISIA 7 - Ngowili Yekpei Numu Kpɛlɛɛ Va bible

2 KƆLINTIBLƐISIA 7

¹Nya liima ndiamɔisia, Ngewɔ i Lahei jisia wumbunga mu gama. Faale na, a mu mua yekpe yɛ sɛwɛ a ji ma gbele hindei nasia kpɛlɛɛ ma ta mu gbuhɛi kɛɛ mu lii nɔhɔ Ngewɔ yaama. Tawao aako mu mbɛlɛhei ve Ngewɔ wɛ, a mu mu lɛɛvui kpɛlɛɛ ve ngi wɛ.

²A ndii gole gɛ a mue wu liisiahu. Muii yaa nyamu gani a numu gbi; muii yaa numu gbi lalei a Ngewɔ hunyanini, tawao muii yaa hani gbi gbuani numu gbi yeya a kava.

³Ngii ji lema aako wu gili la kɛ wu nyamu lɔ wienga; ajifa kia ngi ndenga la ngovama, mu longɔe a wue hulewengɔ na hii gbɛogbɛ ɛɛ gu aa mua wueni luahu gɔlɛ, hee vulii bɛɛ ɔɔ hani weka gbi lekee ndɛvui ji hu.

⁴Nya langɔ waa le a wue tawao nga mata waa gbualɔ a wue! Kpalɛi ji kpɛlɛɛ i langa mu ma ii yaa pieni ngaa yɔkɔ; tawao nya goohu nɛngɔe watii gbi.

⁵ Kia bɛɛ mu foni Masidonia lɔlei hu muii lɛɛvuni kulo bɛɛ. Fawɔlisia ti yɛlɔ hu gbi, nungaa lɛɛnga ta wa a njiɛisia mu mahu, mu lii hɛlɛngɔ.

⁶Kɛɛ Ngewɔ na a ndiinyanimɔi nɛpɔ, i mu nɛpɔilɔ a ji Taitɔs i wani.

⁷Ngi walei lekee ii le aa mu lii nɛɛ, kɛ ji i gonani a nɛpɔyei na wu ngi lii nɛpɔni la. I hugɛilɔ a mue yɛ wu longɔ waa le wu nya lɔ gbɔma, yɛ wu lii mɔnɛngɔe na va wu pienga a nge, tawao yɛ wu magbatɛngɔ waa le nya mayialeva; famia nya goohunɛɛi maa i toilɔ waa.

⁸Gbamaile ina bɛɛ kɔlɛi na ngi nyɛini wu gama i wu mamanuilɔ, kɛ nya lii ii nyanini nyɛiva. Nya lii aa nyanilɔ ji ngi tɔni kɛ yeekɔlɛi i wu mamanuilɔ kia bɛɛ watii wulo lekee vamia.

⁹Kɛɛ kiahuna na, nya goohu nɛngɔe, tii yɛma jifa ngi pieni wu maa i manu, kɛɛ jifa wu liinyani i pielɔ wu wu luvayiisia maluve. Wu guilɔ yeendinyanii bu a pelei na Ngewɔ longɔ la, faale muii hinda gbi hunyanini wu ma a kɔlɛi na nyɛila.

¹⁰Gbamaile ndiinyani na a nɛɛ Ngewɔ wɛ a pielɔ numu lii i wote pelei na hu a li a ngie kunafɔ lɛɛvui hu tawao ndiinyani ii na hu! Kɛɛ ndiinyani na a nɛɛ numu wɛ a wa hee lɔ ngi mahu.

¹¹A tɔ lɛɛ kia wu nda liinyani na nɛngɔ Ngewɔ wɛ i pienga wu maluvenga: i pielɔ wu maa i gbɛli kɛva kɛ wuii nyamu gbi wieni. Wu lii i leweilɔ na va i wieni, wu luwa na ma a gbua hu. I pielɔ nya lɔ-mani i wu lɔ; i pieilɔ wu maa i gbɛli nya magaova kɛɛ kpalɛ lava numui na ma i yeenyamui na gani. Yeehindei ji hu gbi wu kɛilɔ kɛ wu nda gbi ii na ma i wieni.

¹²Faale kia bɛɛ ngi kɔlɛi na nyɛini, numui na va ii le i nyamui gani ɔɔ numui na ti nyamui gani a ngie. Ngi nyɛilɔ ngi hugɛ gbalauŋ a wue kɛ Ngewɔ i ndoma wai na gɔɔlɔ wu piengɔ a mue.

¹³Faale mu lii i nɛɛilɔ waa, kɛɛ Taitɔs nda goohunɛɛi i mu lii nɛɛilɔ tewengɔ na ma. Ajifa i hugɛilɔ a mue yɛ wu pielɔ ndiihɛlɛi kpɛlɛɛ i gbua ngi ma.

¹⁴Ngi lawoeilɔ vulii Taitɔs gama a wu hinda tawao wuii nya yawufeni. Ma tɔnya yiɛi lɔ le wu ma watii gbi tawao ndawoei na bɛɛ mu pieni Taitɔs gama lekee i yɛnga a tɔnya.

¹⁵Famia ndomɛi na i piengɔ a wue maa lɔ toma lekee, ji i gilini a kuloi wu wua yekpe guloni la kɛɛ baagɔma wai na wu feni ngi wɛ kɛɛ ji wu kpɛlɛɛ wu valangɔ yɛla golova na gbi bu i wu gaani la.

¹⁶Nya goohu nɛngɔe jifa nga gulɔ ngi la a wue pandawanda.