Read Ngowili Yekpei Numu Kpɛlɛɛ Va 2 KƆLINTIBLƐISIA 8 Bible Online

2 KƆLINTIBLƐISIA 8 - Ngowili Yekpei Numu Kpɛlɛɛ Va bible

2 KƆLINTIBLƐISIA 8

¹ Mu mbaa Kristimableisia, mu longɔ wu kɔɔ gbɔɔ Ngewɔ yauwandei i pienga Kristimablei nasia lia ti Masidonia lɔlei hu gbi.

²Mu mbaa Kristimablei nasia ti Masidonia, hinda gbɔugbɔu gboto i langa ti ma kɛɛ ti goohu nɛngɔe kpele gbi. Ti nyaningɔ waa le gbɔma kɛɛ ta hani gboto waa lɔ ve.

³Nga gulɔ a ndela wu ma kɛ a ti nyɛkɛ ti na veilɔ ta gu ma, tawao tewengɔ bɛɛ na ma ta gu ma.

⁴Ta mu manɛnɛ tɛɛ mu pie ti gbɛɛ nasia ma ti gbɔma Ngewɔblei nasia ma ti Judia.

⁵Ti wiehindei ji lewengɔ yɛla na ma mu lii yɛ ma! Ti tia yekpe yese veni Ndemɔi wɛ; na wooma ti tia yekpe ve mua bɛɛ wɛ kia i nɛni Ngewɔ wɛ kɔɔ ti pie.

⁶Taitɔs lɔ i navoo gboto ve-yengei ji lɔtoni wu lia, faale mu ngi manɛnɛilɔ muɛɛ i madi hou i gbɔ wu ma wu yeendoma yengei ji yakpua.

⁷Hindei kpɛlɛɛ hu wu lewengɔe Kristimablaa wekeisia ma: wu layii hu a Kristi, Ngowili Yekpei lelei hu, tɔnyɛi gɔɔlɛi hu, wu lumayii hu kpɔma wieva kɛɛ wu loyii hu a mue. Faale nya longɔ wu lewe pekeisia ma ndoma yengei ji bɛɛ hu.

⁸Sawangaa ii le ngaa yɛ ndama. Kɛ ngi laalilɔ Masidoniableisia ti magbɛliyii ma kpɔma wieva aako ngi pie wu kɛ kɛ wu lomɛi tɔnya le.

⁹Wu hugɔɔlɔ vulii pandawanda kia mu Lemɔi Yesu Kristi yauwandei i na; i pielɔ kia bɛɛ i yɛ Ngewɔyɛi yeekpatɛi hu, i wailɔ dunyei hu i wote a nyanimɔ wu va, yeenyanii ji va wu gbatɛ Ngewɔ gɔla hu.

¹⁰Kpɔma navoo velei va, nya langɔ la mahoungɔe wu na yakpua wu tɔtoni voonu. Ii gɛlɛni felei lekee ma, wua yese wu lii nɛni feva.

¹¹A madi hou na wu yeengengei na wie! Wu maa i gbɛli kpɔyɔva kia wu maa i gbɛlini hugbatɛva, tawao a pie a na i wu yeya kiahuna.

¹²Wu maa i gbɛlingaa hani veva, Ngewɔ goohu a nɛɛlɔ na va bi gbayei a gu a fela kpoto. Ngewɔ lii ii wu ma na veva ii wu yeya.

¹³Ngii lapima kaha minimini lava wu wumba, ngi yee powopowoisia la pekeisia wumba;

¹⁴kɛɛ kia hani i wu yeya sɛmbɛngɔ kiahuna, mahoungɔ wu gbɔ nasia ma hinda gbɔungɔ ti laa. Na wooma hinda i gbɔungaa wu laa tawao hani gbotongɔ ti yeya, ta gbɔlɔ wua bɛɛ ma, kɛ wu maa i hɔɔnga.

¹⁵ Kia nyɛingɔ la Ngewɔ gɔlɛi hu, “Nasia ta mɛhɛɛ lɛma kpoto, hani gbi ɛɛ mɔnu ti yeya, tawao nasia ta tɛma kulohii ɛɛ gbɔyɔ ti yeya.”

¹⁶A mu siɛgboto gbua Ngewɔ ma jifa i pienga Taitɔs maa i gbɛlinga gbɔva wu ma kia lɔɔ mu na.

¹⁷Ajifa ii gɛlɛni na ma i lumani gbɔva wu ma ji mu ndeni ngi ma; ngi maa gbɛlingɔ yɛla pɛiŋ gbɔva wu ma tawao ngi magbɛlingɔ yɛla a ngi nyɛkɛ liva wu gama.

¹⁸Mua ta kɛɛ mu mbaa Kristimamɔi na yoyoma Kristimableisia gbi gama ti bagɔnga ngi ma Sɔsiisia gbi hu Ngowili Yekpei vayava hu.

¹⁹Ii gɛlɛni na ma Kristimableisia gbi ti ngi gɔɔngɔ pandawanda ti gbi ti loko longa ngi ma kɔɔ mua tieni mu ya a lewetewe. A gbɔlɔ mu ma ndoma navoei ji hugbatɛva ma tɛma, wava a ngɔlɔya mu Lemɔi gama, kɛɛ kɛva kɛ mu magbɛlingɔe gbɔva mu mbaa Kristimablei nasia ma hinda gbɔungɔ ti laa.

²⁰Mua mua yekpe mahugbeema vulii aako maa pie numu gbi i gbonyɛ a mue pelei na va mu navoo gbotoi ji yayengema.

²¹ Na mu kɔima tamia a pɔɔna wiela Ndemɔi yaama kɛɛ nuuvungaa bɛɛ.

²²Faale mua gbɔma mu mbaa Kristimɔ weka yoyoma. Mu ngi hugɔnga kpoto tawao mu tɔnga kɛ watii gbi ngi magbɛlingɔe kpɔma wieva. Tawao kia na i langa waa hii a wue, ngi magbɛlingɔe tewengɔ yeengovei ma gbɔva wu ma.

²³Taitɔs ta, nya mbaa mia tawao mua tamia ma yenge gbɔva wu ma; mu mbaa Kristimablei felei nasia taa tieni ti lima tia lɔ Kristimablei nasia kpɛlɛɛ ti yaamɛi a tie tawao ti yengei a walɔ a ngɔlɔya Kristi ma.

²⁴A ndoma gɛ a tie aako Kristimableisia kpɛlɛɛ ti mɛni ti la la kɛ muii ndawoo gbama wieni a wue.