Read Ngowili Yekpei Numu Kpɛlɛɛ Va 2 KƆLINTIBLƐISIA 9 Bible Online

2 KƆLINTIBLƐISIA 9 - Ngowili Yekpei Numu Kpɛlɛɛ Va bible

2 KƆLINTIBLƐISIA 9

¹Maa ii houni bɛɛ ngi yɛ a kɔlɔ nyɛi wu gama kɔloongɔ kpɔmɛi ji ma wa njoyo mu mbaa Kristimablei nasia wɛ ti Judia lɔlei hu.

²Ajifa ngi kɔɔlɔ kɛ wu lumangɔe kpɔma wieva tawao ngi lawonga a wue Kristimableisia kpɛlɛɛ gama ti Masidonia ngɛɛ, “Mu mbaa Kristimablei nasia ti Akaya lɔlei hu ti magbatɛngɔe kpɔma wieva i hiye voonu ma.” Kpɔma lii na i wu goohu i ti gbi lii wɔlɔnga nyɔkɔ wieva.

³Faale nyaa na mu mbaa Kristimablei jisia looma wu gama aako ndawoei kpɛlɛɛ mu pieni a wue yeehindei ji hu aa yɛ a njɛpɛ gbama. Kɛɛ kia lɔɔ ngi ndeni la Kristimableisia ma Masidonia, wu magbatɛngɔ a yɛla a kpɔma navoo.

⁴Na hu gbi, ina mua Masidoniableisia mu wailɔ wu gama kɛɛ muii maleni kpɔma navoo aa yɛ wu yeya, maa a wufe kpa, wu nda wufei va lee yana, kɛ mua bɛ va, jifa mu lani a wue.

⁵Faale ngi tɔilɔ kɛ mahoungɔe ngi mu mbaa Kristimablei jisia manɛnɛ liva wu gama nya gulɔ aako wu kpɔma navoei na lɛma wu yɛ Lahei wumbuni feva; aako wu tɛma pɛiŋ mu yaa foo. Wa fe a wu nyɛkɛ lɔ, tɛɛ kpua wu yeya a kpaya.

⁶I hitɛ wu wɛ kɛ numui na a tuhani hii kulo hii, a tewe kulo hii; kɛɛ numui na a tuhani hii kpotongɔ, a tewelɔ kpotongɔ waa.

⁷Numu gbi i na ve hɔɔ a wu ngi lii hu feva; aa fe a ndiinyani ɔɔ bi tɔaa bɛɛ ngi magba le, gbamaile Ngewɔ longɔ a numui na lɔ a hani ve a kohunɛ.

⁸Ngewɔ a gulɔ a wu gɔla a na wu gbewengɔ fa yeemaalema aako na wa gbewe fa wua yekpe va a yɛlɔ wu yeya kpele gbi kɛɛ yeemɔnu gboto hinda yekpe gbi wieva la.

⁹ Ngewɔ Gɔlɛi yɛ, “A hani velɔ kpotongɔ waa nyanibleisia ti wɛ; ngi hindawanda wielei ɛɛ gɛlɛ kunafɔ.”

¹⁰ Ngewɔ lɔ a tuhani galɛi ve numu wɛ hiiva, i ngi gɔ a mɛhɛɛ mɛva. Faale Ngewɔ a tuhani galɛi na kpɛlɛɛ velɔ wu wɛ wa gu a hiila tawao a pielɔ yeetuhani i yekpe, i wua. Ji wiengaa kɛ kpɔma-hani na wa fe i gbotonga kia tuhani a wua.

¹¹Ngewɔ a pielɔ wu gbatɛngɔ i yɛla kpele gbi kpɔma-hani waawaa veva watii gbi aako numu gboto ti siɛgbua Ngewɔ ma wu gbɔma-hani va ma li la ti wɛ.

¹²Gbamaile ngengei ji wu piema ɛɛ haani lekee gbua wu mbaa Kristimableisia ma kɛɛ a pielɔ numu gboto ti siɛgbua Ngewɔ ma kaka.

¹³Gbamaile ngengei ji wu piema a kɛlɔ ina yeelɔ a wue, tawao a pielɔ ti Ngewɔ lato, wu goloyii va Kristi Wowili Yekpei na bu wu langɔ la. Ta gbɔma Ngewɔ latolɔ wu gbekpeyei va ti gama kɛɛ mu mbaa Kristimablaa wekeisia.

¹⁴A ndomɛi ti pieni, ta Ngewɔ vɛlilɔ wu va, jifa Ngewɔ i ngauwanda wai na gɛngɔ a wue.

¹⁵A mu siɛgbua Ngewɔ ma ngi gbekpeyei na va mue gu a hugɛla.