Read Ngowili Yekpei Numu Kpɛlɛɛ Va GALESIABLƐISIA 1 Bible Online

GALESIABLƐISIA 1 - Ngowili Yekpei Numu Kpɛlɛɛ Va bible

GALESIABLƐISIA 1

¹Nya Pɔɔl, tomɔ lɔ a nge, nuuvu ii le aa loko lo nya ma tawao nuuvu sabu hu ii le, kɛ Yesu Kristi taa ngi Kɛkɛ Ngewɔ, na i ngi wumbuni hee hu.

²Mua nya mbaa Kristimableisia kpɛlɛɛ mu mbei mua fama gboto yoyoma Galesia lɔlei yee sɔsiisia gama.

³Nyaa mu Kɛkɛ Ngewɔ vɛlima kɛɛ Ndemɔi Yesu Kristi ngɛɛ ti wu gɔ a ngauwanda kɛɛ ndiilɛli.

⁴Aako i mu bawo nyamu hinda yeya kiahuna, Kristi i koloya gbatɛilɔ mu Kɛkɛ Ngewɔ lima hindei wieva i ta yekpe gbua a saa mu gbuava jumbui yeya.

⁵Ngɔlɔyɛi kpɛlɛɛ i yɛ Ngewɔ ma kunafɔ kɛɛ kunafɔ. Amiina.

⁶Wu hinda gualangɔe nya ma ajifa hinda hugutungɔi ji wuaa gbelema Ngewɔ na ma i loko loni wu ma ngauwandei na wooma Kristi i pieni a wue, wa ngowili weka gulu.

⁷A tɔnya vulii, “Ngowili yekpe” weka ii na, kɛɛ ngi ji lemaa ajifa nungaa lɛɛngaa lɔ wu wuhu wuma a ji ti lapima Ngowili Yekpei kɔloongɔ Kristi ma maluveva.

⁸Kɛɛ mua ɔɔ malika bɛɛ i gbua ngelegoohu i ngowili le wu ma na i gba na ma mu ndeni wu ma, Ngewɔ i ngi wuaa jahama.

⁹Mu ndenga ngovama tawao nyaa na ndema gbɔma: numu gbi i ngowili lengaa wu ma na i gba na ma wu kuluni, Ngewɔ i ngi wuaa jahama.

¹⁰Ji ngi ndenga a kɛlɔ kɛ ngi lapimaa kɔɔ nuuvunga ti nya lato? Sawo, ii hii kulo bɛɛ! Na nya longɔ la ta mia a Ngewɔ latoi! Ngi lapimaa aako nya hinda i nɛɛ nuuvungaa wɛ? Sawo, ina na mia lɛ ngi lapimaa pieva, ngɛ yɛ a ngengemɔ Kristi va.

¹¹Gbɛɛ ngi hugɛ a wue gbalauŋ, nya mbaa Kristimableisia, kɛ Ngowili Yekpei na ngi ndeni wu ma ii gbuani nuuvu gama.

¹²Ngii majɔɔni a nuuvu gbi tawao numu ii le aa nya gaa la. Yesu Kristi vulii lɔ i kɛni a nge.

¹³ Wu mɛninga kia ngi yɛ luva watii na ngi yɛ Ngewɔ vɛli a Juubleisia ti nda welei, kia ngi yɛ a Juwuya gbakpa la Ngewɔblɛisia wooma, ngɛɛ manu ti ma kulo bɛɛ, nga lapi a nya sɔbɛi gbi yee Ngewɔ hindei na hunyaniva.

¹⁴ Nya mbaa Juublei nasia mua tieni mu mahɔngɔ yɛla ngi yɛ leweni ti gbotoma ma Juublaa ti Yewɔ hindei wiela hu kɛɛ kaai nasia maadani ti ndoni a mue.

¹⁵Kɛɛ Ngewɔ i ngauwanda wieilɔ a nge a ji i nya gbuani ma gba pɛiŋ ti yaa nya le, i loko lo nya ma yengeva ngi wɛ. Tawao watii na i nɛni ngi wɛ

¹⁶ngi Hindoloi gɛva a nge aako ngi ngi Ngowili Yekpei le nasia ma Juublaa yaa tie ndalongɔ ngi ma, ngii numu gbi mɔlii ndahii va,

¹⁷tawao ngii lini Jelusalɛm nasia lɔva ti yɛni a toblɛisia nya gulɔ. Kia ngaa na wie, ngi lini yakpe Arebia lɔlei hu lɔ, na wooma ngi yama Damaskɔs lɛi hu.

¹⁸Foo sawa i leweni pɛiŋ ngi yaa li Jelusalɛm aako mua Pita mu yɛpɛ, tawao mua ta mu yɛ na hoki fele.

¹⁹Ngii tomɔ weka gbi lɔni kɛlee Jemisi, Ndemɔi ndewei.

²⁰Na ngi nyɛima tɔnya le. Ngewɔ kɔɔlɔ kɛ ndɛɛ ii le ngaa yɛ kulama.

²¹Na wooma ngi liilɔ taangaa hu Siria lɔlei hu kɛɛ Silisia lɔlei hu.

²²A watii na Kristimablei nasia ti yɛ heiheini Judia lɔlei hu tii yɛ nya gɔɔ.

²³Na lekee ti yɛ kɔɔngɔ ta mia a na nungaa wekeisia ti yɛ nde tɛɛ, “Numui na wɔɔ i yɛ a pie juwuya i yɛ la mu ma taa na Yesu Wowili Yekpei na lema i yɛ lapi wɔɔ hunyaniva.”

²⁴Faale ti siɛgbuɛilɔ Ngewɔ ma kɔloongɔ nya ma.