Read Ngowili Yekpei Numu Kpɛlɛɛ Va GALESIABLƐISIA 2 Bible Online

GALESIABLƐISIA 2 - Ngowili Yekpei Numu Kpɛlɛɛ Va bible

GALESIABLƐISIA 2

¹ Foo puu maahu naani na wooma, mua Banabasi mu yamɛilɔ gbɔma Jelusalɛm, ngi li a Taitɔs bɛɛ.

²Ngi liilɔ jifa Ngewɔ i kɛilɔ a nge kɛ mahoungɔe ngi li. Ji mua tokulɔisia lekee mu gomɛni ngi Ngowili na hugɛilɔ a tie nga nde nasia ma Juublaa yaa tie. Ngii yɛ loni nya yengei na ngi pienga ngovama kɛɛ na ngi piema kiahuna i yɛ a kɛɛ-mɔɔnɛ.

³Nya mbaa Taitɔs, kia bɛɛ Grikimɔ a ngie, tii kpɔndani ngi ma ngi heiva bili ya,

⁴kia bɛɛ nungaa lɛɛngaa ti yɛ loni na i wie. Yeenungɛi jisia ti wuaailɔ mu lia yɛlɛŋ mu yabɛɛva, ta kɛ bi tɔaa bɛɛ mu mbaa Kristimableisia mia a tie aako ti tɔ kia mu gbuangɔ la nduwɔyahu jifa mua Yesu Kristi-ni mu wilingɔ hu. Ti longɔ yɛla ti mu yɛ a nduwɔngaa,

⁵kɛɛ aako mu Ngowili Yekpei yee tɔnyɛi lamagbatɛ wu va hinda aa pie, muii lumani na ma ti longɔ yɛla mu pie.

⁶ Kɛɛ nasia Kristimablaa wekeisia ti ti wumbuni, a tokulɔisia, nyaa ji lema ajifa nya gbewe ii le ti yɛni a gbɔɔ; Ngewɔ ɛɛ kiti lewe numu ma bi yɛyii va; nyaa ndema kɛ, tokulɔi nasia tii hinda nina gbi wuni nya gulɔ pieva.

⁷Kia taa na wie, ti tɔilɔ kɛ Ngewɔ i Ngowili Yekpei lela nasia ma Juublaa yaa tie yeengengei loko wuaanga nya yeya, kia lɔɔ i Ngowili Yekpei lela Juublaa ma yeengengei veni Pita wɛ.

⁸Faale Ngewɔ gbayei lɔ i pieni ngi yɛni a tomɔ nasia gama Juublaa yaa tie kia lɔɔ Pita i yɛni a tomɔ Juubleisia gama.

⁹Jemisi, Pita kɛɛ Jɔn, nasia Kristimableisia ti ti wumbuni a tokulɔisia ti kɔɛilɔ kɛ Ngewɔ i ngengei ji venga nya wɛ gba; faale ti loko wuaailɔ mua Banabasi yeya kɛva kɛ mbaanga mia a mua tieni kpɛlɛɛ. Mu hugbatɛilɔ kɛ mua Banabasi ma yenge nasia lia lɔ Juublaa yaa tie, tia ta yenge Juubleisia lia.

¹⁰Na lekee ti mu mɔlini fa tamia a ji tɛɛ mu yaa gili a hinda-gbɔundablei nasia ti ti lia tawao na vulii mia nya magbɛlingɔ yɛla pieva.

¹¹Kɛɛ kia Pita i foni Antiɔk, ngi ngi wiehindei magbuɛilɔ Kristimableisia yaama ajifa i yɛ laailɔ ke kɛ kpulanga mia i pieni.

¹²Pɛiŋ Juublei nasia lɛnga Jemisi i ti looni ti yaa foo Antiɔk, Pita tia mu ndeengɛi nasia Juublaa yaa a tie ti yɛlɔ a mɛhɛɛ mɛ hinda yakpe. Kɛɛ yeenungeisia ti fongɔi wooma, i gbuɛilɔ ti woohu, ɛɛ luma tia tieni taa gbɔma mɛhɛɛ mɛ jifa i luwɛilɔ nasia ma ti yɛ nde tɛɛ kɛlee ti nasia Juublaa yaa tie ti hei bili ya.

¹³Mu mbaa Kristimablei nasia Juublaa a tie tia bɛɛ ti toilɔ Pita ma a nduwɛi ji wiela, tawao Banabasi vulii bɛɛ i ti wokɔɛilɔ i na wie i kɔɔngɔ kɛ ii wɔnani.

¹⁴Kia ngi tɔni kɛ tii jiama a tɔnya welei na Ngowili Yekpei i kɛni, ngi ndeilɔ Pita ma ti gbi yaama ngɛɛ, “Juumɔ lɔ a bie, na hu gbi biaa gɛ hindei wiema kia nasia Juublaa yaa tie, ba na wie ii gbuani a Juumɔ. Gbɛe na hɔɔ bi lapima kpɔndava nasia ma Juublaa yaa tie bɛɛ ti luva kia Juungaa?”

¹⁵Tɔnya le kɛ Juungaa lɔ a mue mu leyii hu, muii yɛni a “Nasia Juublaa yaa tie yee jumbungɔisia”.

¹⁶ Na hu gbi mu kɔɔlɔ kɛ Ngewɔ a numu yɛlɔ a pɔɔnamɔ i tia ta luahu gbatɛ jifa lekee ngi langɔ a Yesu Kristi, na wieva ii le Sawei longɔ la. Mua bɛɛ mu langa a Yesu Kristi aako Ngewɔ i mu yɛ a pɔɔnablaa i mua tieni luahu gbatɛ jifa mu langɔ a Kristi, na wieva ii le Sawei longɔ la. Gbamaile numu gbi tia Ngewɔ ti luahu ɛɛ gbatɛ jifa a na wie Sawei longɔ la.

¹⁷Ina hɔɔ kia mu lapima mua Ngewɔ-ni mu luahu gbatɛva a ji mua Kristi-ni mu wilingɔ hu, mu woteilɔ a “Jumbublaa,” kia lɔɔ nasia Juublaa yaa tie ti na, kɛ Kristi i mɔnɛma aako jumbui i li gulɔma? Ii hii kulo bɛɛ!

¹⁸Sawei yeenasia ngi ti hunyanini ngɛɛ tii yaa gbekpeni Kristimamɔ va, ina ngi tɔɔtoilɔ gbɔma a ti hugbatɛla, kɛ ngi kɛnga kɛ jumbumɔ vulii lɔ a nge.

¹⁹I gɛlɛ Sawei lekee ma, nya haangɔe, Sawei vulii lɔ i nya waani, aako ngi vulu yengeva Ngewɔ wɛ. Ti mua Kristi waanga wɔɔ krɔsii ma,

²⁰faale nya ii le gbɔma nya vulungɔ aa yɛla, Kristi mia ngi vulungɔ nya hu. Ndɛvui ji na i nya hu kiahuna, i nya hu lɔ jifa nya langɔ a Ngewɔ Hindoloi na i loni a nge, i ngi lɛɛvui ve nya va.

²¹Ngii gbeleni Ngewɔ yauwandei ma. Kɛɛ Sawei i yɛngaa a sabu Ngewɔ i tia numu luahu gbatɛ, kɛ Kristi i haailɔ gbama.