Read Ngowili Yekpei Numu Kpɛlɛɛ Va GALESIABLƐISIA 4 Bible Online

GALESIABLƐISIA 4 - Ngowili Yekpei Numu Kpɛlɛɛ Va bible

GALESIABLƐISIA 4

¹Na nya longɔ ngi nde tamia a ji: ndoi na ngi kɛkɛ woohani i loma ngi yeya, ta ngi houlɔ kia nduwɔ watii lɛ ngi gulongɔ, kia bɛɛ ta vulii lɔ ngi woo a hanii gbi.

²Ngi gulongɔi hu, nungaa lɔ na ta ngi mahugbe, ta ngi hindei hugbatɛ haaŋ i to watii na ma ngi kɛkɛ a kɛ ta yekpe ngi hindei hugbatɛva.

³Hii lɔɔ mua bɛɛ mu yɛ dunyei yeengafangeisia ti luwɔyɛi hu haaŋ mu yafeisia ti lakpa.

⁴Kɛɛ ji watii yekpei i hitini sɔ, Ngewɔ i ngi Hindoloi yoyoilɔ dunyei hu. I woteilɔ a nuuvu, dunyama nyaha i ngi le, i wuaa Juublaa ti Jawei bu,

⁵ nasia mabawova ti yɛ yee Sawei bu, aako mu gbi mu yɛ a Ngewɔ leengeisia.

⁶Kɔɔ Ngewɔ i kɛ kɛ ngi leengeisia mia a mue, i ngi Hindoloi Yafei wuaailɔ mu hu, Ngafei na a Ngewɔ loli gbalauŋ yɛ “Kɛkɛ, nya Kɛkɛ.”

⁷Faale na, ndɔwu yaa gbɔma a bie, ndo lɔ na a bie. Tawao jifa ngi lui lɔ a bie, Ngewɔ a bi gɔlɔ na kpɛlɛɛ hu i ngi yeya ngi leengeisia va.

⁸Wɔɔ ta, wuii yɛ Ngewɔ gɔɔ, famia wu yɛ nduwɔya hu haningaa yeya tii yɛni a Ngewɔngaa.

⁹Kɛɛ kiahuna na wu Ngewɔ gɔnga, ɔɔ, mu nde muɛɛ Ngewɔ i wu gɔnga. Gbɛe wu longɔ wu yama gbɔma dunyama yafeisia gama nasia ti dunyei mahu nasia kpaya gbi ii ti wɛ? Gbɛe wu longɔ wu yama gbɔma ti luwɔyɛi hu?

¹⁰Wa hɛɛ-gomɛngaa houlɔ folo lɛɛngaa ma kɛɛ ngalu lɛɛngaa kɛɛ foi yeewatii lɛɛnga kɛɛ foo lɛɛnga.

¹¹Wu hinda i nya liihɛlɛngɔe! Kɛ ngengei kpɛlɛɛ ngi pienga gbɔva wu ma i yɛma a kɛɛwɛ-mɔɔnɛ lɔ?

¹²Nya mbaa Kristimableisia, wu lemungɔe, a wie kia ngi na, ajifa nya bɛɛ ngi wienga kia wu na. Wuii yaa hinda nyamu gbi wieni a nge.

¹³Taa wu nɛmahu kɛ ngi Ngowili Yekpei leilɔ wu ma haalei hu; jifa nya heegbɛngɔ yɛla.

¹⁴Kɛɛ kia bɛɛ nya heegbɛi i yɛni a kaha wu ma, wuii lɛɛni nya hu, tawao wuii gbeleni nya ma. Kia waa na wie, wu loko heiilɔ nya bu kia numu a loko hei Ngewɔ malika bu; wu loko heiilɔ nya bu bi tɔa bɛɛ Yesu Kristi mia wu loko heima ngi bu.

¹⁵Wu goohu nɛngɔ waa yɛla! Nya vuli nga ndelɔ kɛ wu yɛ wu yamɛisia gbualɔ hu wu fe nya wɛ, ina wu yɛ gulɔ. Kɛɛ gbɔɔ na wienga?

¹⁶Wu nya wotenga na a wu juwu jifa ngi tɔnyɛi lenga wu ma?

¹⁷Nungaa wekeisia lɔ lapima vulii aako wu lewe ti wooma, kɛɛ na i ti nɛmahu pieva ii nyandeni wu va. Na lekee ti longɔ la ta mia a ji wa gbele nya wohu wu yɛ ti va, aako ti hinda i gbewe wu ma kia wu ndɛi gbewengɔ ti ma.

¹⁸Nyandengɔe numu i gbewe hii numu wekei va ina na i ngi nɛmahu kpekpengɔe. Ji lɔnyangɔe kpele gbi, nya yɛngɔi hu lekee ii le wu lia.

¹⁹Nya liima leengeisia, ndo-le-goohu-gbalɛi na a yɛ koonyahɛi ma, nyɔkɔ mia i nya ma wu va haaŋ i lohu wu wie kia Kristi na.

²⁰Nya longɔ waa le mua wueni mu yɛ mia ngaamɛi ji, aako ngi nya yɛpɛyii wu gama maluve. Wu hinda i nya liihɛlɛngɔ waa le.

²¹A hugɛ lɛɛ na a nge, wua wu longɔ wu yɛ Sawei bu, wuii na mɛnima Sawei i ndema?

²² Yɛ hindolo fele lɔ ti yɛ Ebraham yeya, tia nduwɔ-nyaha yila ti yeengila le, kɛɛ nyahɛi na nduwɔ yaa ngie ti yeepekei le.

²³Ndoi na nduwɔ-nyahɛi i ndeni taa Ebraham lɔ ti ndeni kia ta ndoo gbi le la, kɛɛ nyahɛi na nduwɔ yaa ngie ngi nda loi i yɛni a Ngewɔ Lahei yeehuvɛi lɔ.

²⁴Tɔmaseli lɔ a ji. Nyaha felei jisia ti na hinda yangilingɔ fele lɔ va. Yeena i ndeengaa leni nduwɔyɛi hu tamia a Hega tawao ta lɔ hindei na Ngewɔ taa Isrɛlbleisia ti ngangilini Sainai Yiyei wumba, yeetɔmaseli a ngie.

²⁵Hega, na looni Sainai Yiyei va Arebia lɔlei hu, i yɛni a tɔmaseli lɔ taa wai Jelusalɛm na va i na kiahuna, ajifa tiaa nduwɔya hu taa ngi leengeisia gbi.

²⁶Kɛɛ Jelusalɛm yeena i mahui i yɛni a nyahɛi na lɔ nduwɔ yaa ngie, tawao ta lɔ mu nje le.

²⁷ Ajifa Ngewɔ Gɔlɛi yɛ, “Goohunɛɛ, nyaha gbemangɔi! Yelei gula a kohunɛ, bia bii ndoo-le-goohugbaalɛ yaati gɔɔni! Gbamaile nyahɛi na ti vayani ngi ma a ndeengaa mato jɔlɔ i lewe nyahɛi na ma ngi hinii ii gbeleni ngi ma.”

²⁸Nya mbaa Kristimableisia, Ngewɔ leengeisia lɔ a wue kia Aisaki i yɛ na Lahei na va Ngewɔ i mbumbuni.

²⁹A watii na wɔɔ ndoi na ti ngi leni a ndoo gbi leyii i juwuya gbakpailɔ yeena ma Ngewɔ Yafei i pieni ti ngi le. Yeehinda yakpei mia i wiema kiahuna bɛɛ.

³⁰Kɛɛ Ngewɔ Gɔlɛi yɛ gbɛ? Yɛ, “Nduwɔ-nyahɛi taa ngi loi gbɛ mbei ti li; ajifa nduwɔ-nyahɛi loi taa nyahɛi na nduwɔ yaa ngie loi tɛɛ gbɔ ti kɛkɛ yeyahaniisia ma.”

³¹Faale na, nya mbaa Kristimableisia, nduwɔ-nyahɛi leengaa yaa a mue, nyahɛi na nduwɔ yaa ngie ngi leengeisia lɔ a mue.