Read Ngowili Yekpei Numu Kpɛlɛɛ Va GALESIABLƐISIA 5 Bible Online

GALESIABLƐISIA 5 - Ngowili Yekpei Numu Kpɛlɛɛ Va bible

GALESIABLƐISIA 5

¹Mu yaa nduwɔyahu, Kristi i mu gbuanga nduwɔyɛi hu! A yɛ na naa, kɛɛ nduwɔya hu ii le, waa luma taa gbɔma wu wote a nduwɔngaa.

²A woolo! Nya nya, Pɔɔl ngi nde wu ma kɛ wu lumangaa ti wu hei bili, ya kɛ na gbi Kristi pienga ii yɛni a gbɛ-o-gbɛ wu wɛ.

³Nyaa gbɔma numui na laahima a luma ti ngi hei bili ya kɛ kpa lɔ ngi ma Sawei kpɛlɛɛ houva.

⁴Wua wu lapima aako Ngewɔ i wu yɛ a pɔɔnablaa sawa houle wooma, wu wua yekpe gbendanga Kristi ma tawao wu baanga a Ngewɔ yauwandei.

⁵Kɛɛ mua, na mu kulɔgbema ta mia a ji kɛ Ngewɔ a mu yɛlɔ a pɔɔnablaa; ji lɔ mu mawuloma tawao Ngewɔ Yafei a gbɔlɔ mu ma, jifa mu langɔ a Kristi.

⁶Ajifa mua Yesu Kristi-ni mu wilingɔ hu yɛngaa la, numu heingɔ i yɛla bili ya ɔɔ ngi heingɔ ii le bili ya, gbɛ-o-gbɛ yaa na. Na baama hinda le ta mia a ji ma kɛ kɛ mu langɔe a Kristi a ji ma lo a nungaa wekeisia.

⁷Wuaa gɛ wiimɛ ma pandaa! Ye lɔ i pienga wu gbenga a golo la a tɔnyɛi? I yee pieni i guni wu ma?

⁸Ngewɔ na i loko loni wu ma ta ii le aa ji wie.

⁹ Kia ta nde la tɛɛ, “Yisti wulo hii lekee mia a pie lɛwɛ wai gbi i ve i yɛ buufa.”

¹⁰Kɛɛ nya nya lii longɔe Ndemɔi ma wu va. Jifa mua wueni kpɛlɛɛ mu wilingɔ hu, nya langɔe la kɛ wuɛɛ nya nda nɛmahui gula waa peka wumbu tawao nya langɔe la kɛ numui na i wu lii gbavoma, i yɛ a numu-o-numu, Ngewɔ a kpaalɛ lalɔ ngi ma.

¹¹Kɛɛ nya, nya mbaa Kristimableisia, ina kia ti ndema la, nyaa lekee nungaa gaama ngɛ mahoungɔ ti yɛ a nungaa hei bili ya, kɛ gbɛe nungaa ti juwuya hitɛngɔ nya wooma lekee? Ina nyaa vulii na lema, kɛ Ngowili Yekpei ji nga nde kɔloongɔ Kristi haalei ma krɔsii ma ii yɛ numu gbi vawɔli.

¹²Nga yɛ loni nasia ti wu lii gbavoma ti nɔɔ ma ti ngakpua; ti nɔɔ ma vulii ti lewe bili ma ti tia yekpe nuuni.

¹³Kɛɛ wua, nya mbaa Kristimableisia, Ngewɔ i wu gbuanga nduwɔya hu. Kɛɛ waa wu gbuala nduwɔyahu aa yɛ a wu gbuawee wu luwui ma hindeisia wieva. Kia waa na wie, a wu nyɔunyɔ magbewe gbua ndoma hu.

¹⁴ Ajifa Sawei kpɛlɛɛ wuaangɔ njɛpɛ yakpɛi ji lɔ hu; “Lo a nungaa wekeisia kia bi longɔ a bia yekpe.”

¹⁵Kɛɛ wu luvangaa kia fulahuangɛisia ta pie la, wa wu nyɔunyɔ nyinyi, wa wu gbaalɛ, kɛ a wu mahugbe, ina na ii le wa wu nyɔunyɔ hinda huwulɔ kpɛmgbɛjɛɛ.

¹⁶Na ngi ndema ta mia a ji: A jia a pelei na Ngewɔ Yafei a kɛ a wue, tawao waa wu luwui liima hindeisia wie.

¹⁷ Gbamaile mu luwui liima hinda nyamui nasia mu nuuvuyei longɔ a piela, Ngewɔ Yafei ii loni mu ti wie; tawao hinda yekpei nasia ma lo mu ti wie ji Ngewɔ Yafei a yɛ mu hu, tamia mu nuuvuyei ii loni la. Hinda felei jisia ti mu hu tiaa Tuuŋ lapima wɛlɛva ti nyɔunyɔ maahu tawao ta pielɔ wuɛɛ gu waa na wie wu longɔ wu pie.

¹⁸Wu jiangaa a pelei na Ngewɔ Yafei a kɛ, kɛ kpa ii yaa wu ma sawei houva.

¹⁹Gbɔɔ nuuvuyei a pie i lailɔ kengelee, hinda nyamui jisia mia ta gbua hu: manɔhɔ hindeisia, ngawufema hindeisia;

²⁰hɛɛla nɔmɔliisia ma kɛɛ huana hindei. Nunga ta juwuyalɔ a ti nyɔunyɔ, ta lapi a ti nyɔunyɔ; ta lololɔ, ti liilewengɔ tawao hani gbi ɛɛ gu a tie. Ti luahu a gɔlɛkɔlɛlɔ ti hei a tiwa kɛɛ kuluma;

²¹ta tomaya wie, ndɔi a ti hou, ta ndɔ-gboli-gomɛisia ga, ta hinda wekeisia wie kia jisia ti na. Nyaa na wu laahima kia ngi pienga la ngovama, nasia ta hindei jisia wie tɛɛ Kohunɛ na majɔɔ nasia ti Ngewɔ Mahayɛi bu ta majɔɔ.

²²Kɛɛ Ngewɔ Yafei i yaa yengema a mue, na a gbua hu tamia a ndoma, kohunɛ, ndiilɛli, ndiigɔlɛ, hindawanda, kpekpeya, pɔɔna hinda wiela,

²³ngayei kɛɛ ndiihou. Sawa gbii na kɛva kɛ hindei jisia ti nyamungɔ.

²⁴Tawao nungei nasia kpɛlɛɛ Yesu Kristi woo a tie ti ti nuuvuyei gbakpanga krɔsii ma, tia ngi manima hindeisia kɛɛ ngi liima hindeisia.

²⁵Ngewɔ Yafei lɔ i ndɛvui venga mu wɛ, mahoungɔ ta i kɛ a mue ma yee jia hinda gbi hu.

²⁶Mu yaama aa lɛ, maa jia mu nyɔunyɔ liima, ɔɔ maa lolo a mu nyɔunyɔ.