Read Ngowili Yekpei Numu Kpɛlɛɛ Va GALESIABLƐISIA 6 Bible Online

GALESIABLƐISIA 6 - Ngowili Yekpei Numu Kpɛlɛɛ Va bible

GALESIABLƐISIA 6

¹Nya mbaa Kristimableisia, wu tɔngaa wu yilayee i hinda nyamu laasi gbi wienga, mahoungɔ wua Ngewɔ Yafei i wu hu wu ngi lo pele yekpe ma, kɛɛ waa pie a ŋajiŋaji. Tawao a wu jiayii mahugbe aako wua bɛɛ hinda nyamu wie mani aa wu lɔ.

²A ya a gbɔ wu nyɔunyɔ ma wu hinda gbɔugbɔisia hu; wu na wiengaa kɛ wu Kristi jawei hounga.

³Numu i ta yekpe wumbungaa a baamamɔ waa kɛɛ gbɛ-o-gbɛ yaa a ngie, kɛ i ta yekpe lekee lɔ wɛlɛma.

⁴Numu gbi i ngi wiehindei jɔgbɛ. Kpekpengɔ yɛngaa la, kɛ a mata gbualɔ a na ta vulii i pienga, kɛɛ aa huma na ma numu weka i pienga.

⁵Gbamaile numu gbi a ngi nda ngahɛi lɔ hou.

⁶Mahoungɔe numui na ti ngi gaama a Ngewɔ layiei i luma taa ngi Kaamɔ ti gbɔ hani yekpei kpɛlɛɛ ma i ngi yeya.

⁷Waa wua yekpe wɛlɛ; numu gbi ɛɛ Ngewɔ wuhu baa. Tuhani na numu a hii, tamia lɔɔ a tewe.

⁸Numu i tuhani hinga ngi luwui liima hindeisia yeekpalɛi hu, na a tewe na tamia a hee; i tuhani hiingaa Ngewɔ Yafei gbaalɛi hu, na Ngewɔ Yafei a fe ngi wɛ teweva, tamia a kunafɔ lɛɛvui.

⁹Faale mu gahu aa gbɔyɔ a hinda yekpe wiela; gbamaile muii gbeilɔ kpekpe wiela ma, watii a hitilɔ ma yeenafei majɔɔ.

¹⁰Faale, watii gbi lekee mu sabu jɔnga, mahoungɔ mu hinda yekpe wie a numu gbi, kakayee nasia mua tieni mu langɔ a Kristi.

¹¹A kɔlɔ-loi jisia wɔlɔyii lɔ lɛɛ ngi nyɛima ji ngi kɔlɛi ji nyɛima na wu gama a nya lokoi vulii!

¹²Nungɛi nasia ti lapima bili gbɔndava wu ma tia mia a nasia ta ti luwumɛi nyandeyii magɛ, ta gbɔma lawo la. Na hu gbi, ta pielɔ lekee aako nungaa taa hitɛ ti wooma a juwuya Kristi krɔsii va.

¹³Nasia vulii bɛɛ ta ti hei bili ya tɛɛ Sawei hou; ti longɔ ti wu hei bili ya kɔɔ ti lawo kɛ ti gunga wu ma lumava ti yenge wu luwui ma.

¹⁴Na hu gbi, nya nga lawo lekee a mu Lemɔi Yesu Kristi krɔsii lɔ; ajifa ngi krɔsii sabui hu lɔ dunyei haangɔ nya wɛ, nya haangɔ dunyei wɛ.

¹⁵Hinda gbi ii le ina numu heingɔe bili ya ɔɔ ngi heingɔ ii le bili ya. Na baa i ma ta mia a ji Ngewɔ a numu gbatɛ a nina.

¹⁶Nasia ta sawei ji hou ti lɛɛvuisia hu, Ngewɔ i ti gɔ a ndiilɛli kɛɛ manuma tia kɛɛ Ngewɔ nungeisia kpɛlɛɛ!

¹⁷Pɛiŋ ngi ya kɔlɛi ji nyɛila gbɔyɔ: gbɛɛ ngi nde; numu gbi aa gbɔma nya vawɔli, ajifa kpɔi jisia ti nya luwuma ta kɛlɔ kɛ Yesu luwei mia a nge.

¹⁸Mu Lemɔi Yesu Kristi yauwandei i yɛ wu kpɛlɛɛ ma, nya mbaa Kristimableisia. Amiina.