Read Ngowili Yekpei Numu Kpɛlɛɛ Va ƐFISƆSBLƐISIA 2 Bible Online

ƐFISƆSBLƐISIA 2 - Ngowili Yekpei Numu Kpɛlɛɛ Va bible

ƐFISƆSBLƐISIA 2

¹ Bi wiengɔ kia haamɔ Ngewɔ yaama, ajifa wu gangani a Ngewɔ, wa jumbu hindeisia wie.

²A watii na, wu jiani a pele na lɔ hinda nyamublaa ti jiama la; wu golongɔ yɛla ngafa nyamui nasia ti hinda gbi ti maha nyamui wɛ, ngafei na i yengema kiahuna a nungei nasia ti gangangɔ a Ngewɔ.

³A tɔnya kia ti na, hii wɔɔ mu gbi mu yɛ na, ma lewe a mu nyɛkɛ gbuala, ma hinda gbi lekee wie mu gbuhɛisia liilɛliva kɛɛ mu nɛmahuisia. Kia lee nungaa gbi ti na, Ngewɔ i liileweilɔ huɛɛŋ mu ma jumbui va.

⁴Kɛɛ Ngewɔ manumangɔ waa le, tawao ngi longɔ waa a mue,

⁵faale kia bɛɛ mu haangɔ Ngewɔ yaama yɛla jifa mu gangangɔ a ngie, ji mua Kristi mu wilingɔ hu i mu vuluilɔ i mu wumbu hee hu. Ngewɔ yauwandei wooma mia wu bawonga.

⁶Jifa mu wilingɔ hu mua Kristi-ni, i mua tieni wumbuilɔ hee hu i pie mu yɛ ngi mahayɛi ma ngelegoohu.

⁷I ji wieilɔ aako watii gbi va ngi yauwanda hulewengɔ wai i gɛ, kɛɛ ndomɛi na va i pieni a mue Yesu Kristi sabui hu.

⁸Gbamaile Ngewɔ yauwandei wooma mia wu bawonga mu lalei va a Kristi, wua yekpe wu wiehindeisia va ii le, aako numu gbi aa lawo.

¹⁰Ngewɔ mia mu gbatɛni, tawao Kristi sabui hu, i mu gbatɛnga ngenge yekpei nasia wieva lɔ i hugbatɛni mu va a ngova pieva.

¹¹Wua ti wu leni Juublaa yaa wue, Juublaa ta wu loli a “pɔnɔblɛisia” ta tia yekpe loli a biliblɛisia, jifa ta ti luwui lewe ma. A gili gbɔɔ wɔɔ a wue.

¹²A watii na wuii yɛ Kristi gɔɔ. Hotangaa lɔ wɔɔ a wue, wu gba Ngewɔ nungei nasia ma i ti wumbuni. Wuii yɛ Ngewɔ hinda yangilingɔi nasia ma toongɔ laaheisia ma i mbumbuni ngi nungeisia gama, wu yɛlɔ na dunyei hu wu liiloma gbi ii na, tawao wuii yɛ Ngewɔ gɔ.

¹³Kɛɛ kiahuna na, wua Yesu Kristi-ni wu wilingɔ hu, wua wɔɔ wu maguhangɔ polouŋ a Ngewɔ, i wu lalangaa gbla jifa Kristi i woteni a saahanii i haa.

¹⁴Gbamaile Kristi vulii i wanga mu wɛ a ndiilɛli a ji i Juublaa tia nasia Juublaa yaa tie yɛnga a numu yila. A ngi gbuhɛi vulii lɔ i pɛlɛ-bondɛi na woloni la, na i ti luahu gɔlɛngɔ wɔɔ, kɛ ndiimanyamu wuaangɔ ti luahu.

¹⁵ A ngi haalei i Juubleisia ti jawei gbuɛilɔ kɛɛ yeesawa mumuisia aako i kɛnyɛ felei jisia wote a numu nina yakpe tia tieni ti wilingɔ hu, kɛ i ndiilɛli wuaanga ti luahu.

¹⁶ Hee na Kristi pieni krɔsii ma, ta lɔ i ndiimanyamui gbɔyɔni ti luahu; yeehee na mia i kɛnyɛ felei jisia wɛlɛni hu, i ti yɛ a numu gbuha yila, i yama a tie Ngewɔ gama.

¹⁷Famia Kristi i wailɔ i Ngowili Yekpei le wu ma kɔloongɔ ndiilɛli ma numui gbi va, wua Juublaa yaa wue wu maguhangɔ yɛla a Ngewɔ, kɛɛ Juubleisia, ti magutungɔ a ngie.

¹⁸Kristi sabui hu lɔ mu kpɛlɛɛ, Juublaa kɛɛ nasia Juublaa yaa tie ma gu a wala mu Kɛkɛ Ngewɔ gama ngi Yafei gbayei hu.

¹⁹Faale naa, wua Juublaa yaa wue wuii yɛni gbɔma a hotangaa; wu mbaa taalingaa lɔ a Ngewɔ nungeisia, wua tieni kpɛlɛɛ Ngewɔ leengeisia a wue.

²⁰Wua bɛɛ wu wiengɔe kia pɛlɛ na. Tobleisia tia tutuisia lɔ ti kpujani, tawao yeendiihu ngajei vuilɔ a Yesu Kristi!

²¹Ta lɔ i houni pɛlei kpɛlɛɛ ma, a pie ti lo yeepɛlei loma i wote a pɛlɛ magayemangɔ Ndemɔi gɔɔma.

²²Wua bɛɛ wua Kristi-ni wu wilingɔ hu, a wu makpɔlɔ wua Ngewɔblaa wekɛisia gbi i wu wote a pɛlei na Ngewɔ Yafei a yɛ mbu.