Read Ngowili Yekpei Numu Kpɛlɛɛ Va ƐFISƆSBLƐISIA 4 Bible Online

ƐFISƆSBLƐISIA 4 - Ngowili Yekpei Numu Kpɛlɛɛ Va bible

ƐFISƆSBLƐISIA 4

¹Faale ngi wu manɛnɛ, nya nya Pɔɔl, ngi kpindiwɛlɛ bu jifa Ndemɔi yengemɔ a nge, a luva a tuvei na i yɛ Ngewɔ nɛmahu jii wu lolini.

² A wua yekpe mayei tawao, wu makɛngɔ i yɛla kpele gbi, tawao ndiihou i yɛ wu wɛ. A ndoma gɛ wu hinda i gu wu nyɔunyɔ hu.

³A lapi a wu sɔbɛ gbi yɛva ngoyilɛi na hu Ngewɔ Yafei i hugbatɛnga, a ji wa hei ndiilɛli na hu i wu yɛnga a numu yila.

⁴Kpuha yakpei mia a mue tawao Ngewɔ Yafei i yakpe, kia lɔɔ liiloma yakpei na Ngewɔ i mu lolinga kulɔgbeva.

⁵Ndemɔi yakpe, lalei yakpe, nguɛi na i yakpe ti mu wuani la Ngewɔ biyei hu;

⁶Ngewɔ yakpe taa Kɛkɛi nuuvu kpɛlɛɛ va, na Ndemɔi le nungeisia kpɛlɛɛ mahu, a yenge a numui gbi tawao, i numui kpɛlɛɛ hu.

⁷Mu gbi a ngilangila, mu mboya hanisia majɔɔnga kia Kristi i kɔɛkɔɛini mu ma.

⁸ Kia Ngewɔ Gɔlɛi i ndeni la yɛ, “Ji i yɛ lɛma ngeleima, i liilɔ a kɔhou gboto waa; i mboya haningaa gɔɛkɔɛilɔ nuuvungaa ma.”

⁹Gbɔɔ “i lɛilɔ ngelemahu” yeembui le i gbua ji ma i yeilɔ gbɔma ndɔu.

¹⁰Faale ta lɔɔ i yeini ndɔu, talɔ gbɔma i lɛni polouŋ ngelemahu, aako i yɛ hani gbi hu dunyei hu gbi.

¹¹Ta lɔ i mboya haningaa venga nuuvungaa wɛ gbama; i kpaya veilɔ mu lɛɛnga wɛ yɛva a toblaa, i kpaya ve pekeisia wɛ yɛva a Ngewɔ lutungaa, i kpaya ve ti lɛɛngaa wɛ ta lewetewe ta Ngowili Yekpei le, yeenasia ti yɛngɔ a sɔsii mahublɛisia kɛɛ kaamɔngaa.

¹²I ji wieilɔ aako i Ngewɔbleisia gbi magbatɛ Kristi yengei va kɔɔ mu Kristi gbuhɛi lo.

¹³Faale na, mu kpɛlɛɛ ma lɛlɔ ma mu yɛ a numu yila mu layii hu a Ngewɔ kɛɛ ngi Hindoloi gɔlɛi; ma wotelɔ a numu lakpangɔngaa, mu wiengɔ kia Kristi na.

¹⁴Na wiengaa muɛɛ yaa wie kia ndopongaa, ndɛi nasia numu wɛlɛbleisia ta nungaa gaa la ti yakava, taa wu hɔwɔhɔwɔ la hu kia viivii tia njavei ta pie a ndɛndɛ mumuisia.

¹⁵Kia na aa wie, mu yɛngaa a tɔnya le, mu lo a mu nyɔunyɔ, ma lakpalɔ a pele gbi mu wie kia Kristi, na sɔsii yeengui a ngie.

¹⁶ Ta lɔ i pieni ngi gbuhɛi yeemahakɛisia gbi ti looni nga pandaa, yeengila i ngi nda yɛmɛi. Yeehakɛi kpɛlɛɛ ti yengengaa pandawanda a leenga kia mahoungɔ yeengila gbi i ngi nda yengei wie la, kpuhɛi gbi a loolalɔ kia nungeisia ta lo a ti nyɔunyɔ.

¹⁷Nyaa naa wu laahima kpɔtukpɔtu a Ndemɔi gbayei ngɛɛ waa yaa luva kia nungei nasia tii Ngewɔ gɔɔ ta pie, nasia tɛɛ gili a hinda yekpe gbi kɛlee baabaa hindeisia,

¹⁸tawao nɛmahu gbi ii ti ma. Ti nda gbi ii ndɛvu ninɛi na ma Ngewɔ a fe nungaa wɛ jifa tii gbɛogbɛ gɔɔ tawao ti woohu gbɔndangɔ.

¹⁹Tɛɛ yaa wufe kulo bɛɛ; gbɛogbɛ ii gbeweni ti ma kɛlee pie nyamu hindei, ta manɔhɔ hindei yeelasii gbi wie kɛlɛma ii ma.

²⁰Kɛɛ na ii le taa wu gaa la kɔloongɔ Kristi ma!

²¹Wu ngi hinda humɛninga vulii tawao kia ngi woomablaa a wue, ti wu gaailɔ a tɔnyɛi na i Yesu Kristi hu.

²² A gbe wu luvayii wovei na ma i yɛ pie wa hinda nyamui nasia wie, wu luvayii wovei na i yɛ wu nyani, a ji i yɛ pie hindei nasia ta numu yaka yeemani a wu lɔ.

²³Mahoungɔe vulii ndii nina kɛɛ nɛmahu nina ti yɛ wu hu,

²⁴ tawao mahoungɔe wu tuva nina wumbu na Ngewɔ kpatɛni kɔɔ i wie kia i na, pɔɔnahu kɛɛ kayemahu a tɔnyahu we.

²⁵Faale a gbe ndɛɛ gulalei ma, numu gbi i yɛ a tɔnyɛi le ngi mbaa Kristimamɔi ma ajifa Kristi gbuha yakpei yeemahaakɛisia lɔ a mue.

²⁶Wu lii i lewengaa, waa luma wu liilewei aa wu lo jumbu hinda wiema; tawao waa luva kpɛiŋ yeendilewei hu.

²⁷Waa pele ve Seitana wɛ pieva wu jumbu wuli.

²⁸Numu na wɔɔ ngi hɛlɛngɔ a humɛi, mahoungɔ i gbe humɛi ma, i tɔtoo a ngengei na wiela a navoo jɔɔ hu pɔɔna hu ngi mahindeisia va kɛɛ gbɔva fɛɛliblɛisia ma.

²⁹Waa njia nyamu le numu ma kɛlee njɛpɛi nasia ta kpɔma wie, njɛpɛi nasia nyɔkɔ ta hinda hugbatɛ nungaa ti gbewengɔ fa aako na wa nde i kpekpe wie a nasia ta wu woi mɛni.

³⁰Waa Ngewɔ Gayema Yafei lii nyani; ajifa Ngewɔ Yafei lɔ Ngewɔ lokowoo le i wu ma kɛva kɛ ngi woo lɔ a wue haaŋ i to mbayoya voloi ma.

³¹A gbe ndiimanyamui gbi ma kɛɛ ndiimavulɛi kɛɛ ndiilewei. Waa yaa lumbe, waa numu yɛli, tawao waa kili nyamu wumbu numu gbi va.

³²Kia waa na kpɛlɛɛ wie, a hindawanda wie a wu nyɔunyɔ, wu nasia mamamau lɔ hinda nyamu a ti wie, wu manu wu nyɔunyɔ ma, kia Kristi i pienga Ngewɔ i maanunga wu ma.