Read Ngowili Yekpei Numu Kpɛlɛɛ Va ƐFISƆSBLƐISIA 6 Bible Online

ƐFISƆSBLƐISIA 6 - Ngowili Yekpei Numu Kpɛlɛɛ Va bible

ƐFISƆSBLƐISIA 6

¹Ndeengɛisia, kpa le wu ma na gbi wieva wu leblesia ta nde wu ma pieva ajifa Ndemɔi woomia a wue, tawao namia pɔɔnangɔ pieva.

² Sawei kpɛlɛɛ Ngewɔ i feni Mojisi wɛ yeehaalayei lɔ Lahei langɔ ma, i ndeilɔ yɛ, “Bagɔɔ bi kɛkɛ ma taa bi nje,

³aako hindei gbi i nɛɛ bi ma tawao bi lɛɛvui hu i guha dunyei hu.”

⁴ Ndolebleisia, waa hinda wie a wu leengeisia a pie ti lii i lewe. Kia waa na wie, a ti makɛ a pelei na mahoungɔ Kristimamɔ i pie, wu ti gaa a na mahoungɔ ti pie.

⁵ Nduwɔngeisia, a golo wu luwɔkɛisia wɛ, nduwahu kɛɛ magbɛlihu; tawao a pie a ndiigole bi tɔngaa bɛɛ wu piema Kristi lɔ wɛ.

⁶Watii na wu luwɔkɛisia ta yɛ wu gbema yeewatii lekee ii le waa yɛ ngenge yekpe wiema aako ti wu lato; kɛɛ a yɛ a na wie Ngewɔ longɔ la a wu lii gbi kia Kristi luwɔngaa.

⁷A wu luwɔyengei wie a kohunɛ bi tɔngaa bɛɛ wu yengema Ndemɔi lɔ wɛ, nuuvungaa gbama ii le.

⁸A la la kɛ Ndemɔi a numu gbi pawalɔ ngenge yekpei na va a pie, i yɛ a nduwɔ ɔɔ ii yɛni a nduwɔ.

⁹ Nduwɔkɛisia, hii mahoungɔ wu wu luwɔngɛisia hou kpekpengɔ; wu gbe a ti huluwala. I yɛ wu nɛmahu kɛ Ngewɔ na ngelegoohu ngi woo lɔ a wua kɛɛ wu luwɔngɛisia tawao mu gbi mu gbɛmboyii i yakpe, Ngewɔ ɛɛ topooma wie.

¹⁰Gbɛɛ ngi kɔlɛi ji gɛlɛ a ndela ngɛɛ, wu gbayei i lɛ gulɔma Ndemɔi ngi gbaya wai hu.

¹¹A wu mayili a kɔhakei nasia kpɛlɛɛ Ngewɔ a fe wu wɛ aako wu gu a lapila a kaaso nyamui nasia Seitana a nungaa wɛlɛ la.

¹²Gbamaile muii lapima a nuuvungaa; mu lapima a ngafa nyamui nasia lɔ ti na hinda gbi, yeemahangeisia kɛɛ yeekpaayablɛisia kɛɛ ngafangei nasia nungaa ta hɛɛ ti ma a watii ji mu hu kia kpindi.

¹³Faale a wu mayili a kɔhakei nasia Ngewɔ fenga wu wɛ wu mahugbeva. Aako yeefolo nyamui nasia ti gbuangaa, wuɛ yama a wooma we ji wu gɔnyamui a gbundɛ wu ma; tawao yeendapi na i gɛlɛngaa, wa gulɔ huɛɛŋ a loola kpaukpaungɔ.

¹⁴ Faale a loo kpakpaungɔ wu magbatɛngɔ i yɛla, wu lia yilingɔ a tɔnyɛi, pɔɔnɛi yɛngɔ a kɔlu-lɛɛvɛ i wɛlɛni wu liimɛi,

¹⁵ tawao wu gɔwɔhu gɔwɛi i yɛ a magbatɛi na wa yɛ hu Ngowili Yekpei leva kɔlooni ndiilɛli ma.

¹⁶Watii gbi lalei hou yeya kia kɔvɛlɛi na; ajifa i yɛngaa wu yeya, ndikpa gbandi-gbandi nasia Seitana a pili wu ma wa gulɔ a ti huhoula la, tɛɛ foo wu ma.

¹⁷ Tawao wu mbayoyei gulu wu pɛlɛ wumba a bɔlei, kɛɛ Ngewɔ Yiɛi i yɛ a kɔbolei na Ngewɔ Yafei a fe wu wɛ.

¹⁸A ji kpɛlɛɛ wie, wa Ngewɔ vɛli Tuuŋ, wa ngi gbɔmi huvɛli. Wu yaa hinda gbi wiema a Ngewɔ vɛli a pelei na Ngewɔ Yafei a kɛ. Faale gbɛogbɛ i wie, waa gbe a Ngewɔ vɛlila waati gbi, tawao a yɛ a Ngewɔ vɛli Tuuŋ Ngewɔ nungeisia kpɛlɛɛ va.

¹⁹A Ngewɔ vɛli nya bɛɛ va aako i yɛ a ngowili wu nya laa ji nga lo ngi yɛpɛ aako ngi yɛpɛ a ngaulewe, ngi pie nungaa ti hinda lɔwungɔi na gɔɔ Ngowili Yekpei i hugɛnga.

²⁰Ngowili Yekpei ji va, Yesu Kristi yaamei lɔ a nge kia bɛɛ ngi kpindiwɛlɛ bu kiahuna. A Ngewɔ vɛli aako ngaulewe i yɛ nya hu ngowili yekpei leva kia mahoungɔ ngi ndela.

²¹ Mu mbaa Kristimamɔi Taikikɔsi, na mu longɔ la tawao Ndemɔi yengemɔ yekpe waa a ngie, a nya mavaa gbi gɛlɔ a wue, aako wua bɛɛ wu nya yɛyii gɔɔ.

²²Na vamia ngi ngi loma wu gama aako i mu kpɛlɛɛ mu yɛyii hugɛ a wue, i yama i wu lii gba.

²³Mu Kɛkɛ Ngewɔ kɛɛ mu Lemɔi Yesu Kristi ti Kristimableisia kpɛlɛɛ gɔ a ndiilɛli kɛɛ ndoma kɛɛ lanaya.

²⁴Ngewɔ i ngauwanda ve nasia gbi wɛ ti longɔ a mu Lemɔi Yesu Kristi a kunafɔ lomɛi. Amiina.