Read Ngowili Yekpei Numu Kpɛlɛɛ Va FILIPAIBLƐISIA 2 Bible Online

FILIPAIBLƐISIA 2 - Ngowili Yekpei Numu Kpɛlɛɛ Va bible

FILIPAIBLƐISIA 2

¹Ina wu luvayii Kristi hu i wu gɔnga a ndii kpakpau, ina ngi lomɛi a wu nɛpɔlɔ, ina wua Ngewɔ Yafei-ni wuaa mbaaya hu, tawao hindawanda kɛɛ manuma lɔ wu hu wu nyɔunyɔ va,

²Nyaa na wu manɛnɛma hɔɔ, kɔɔ wu pie nya goohu i nɛɛ waa a ji wu giliyii a yɛ yakpe, wu longɔ a wu nyɔunyɔ mahɔɔngɔ, wu lii i yɛ yakpe kɛɛ wu liima hindei.

³Waa hinda gbi wie wua yekpe lekee nafava, ɔɔ aako nungaa ti nde tɛɛ numu waawaangaa lɔ a wue, kɛɛ a wua yekpe mayei wu nyɔunyɔ gama, kpema gbi wa nungaa wekɛisia fesa wua yekpe ma.

⁴Wu mbaangɛisia ti nda hindei i gbewe wu ma vulii, wu wumayei lekee ii le.

⁵Mahoungɔ wu wiehindei tia Yesu Kristi wiehindei ti yɛ yakpe:

⁶Tia Ngewɔ ti gbatɛyii i yakpe wɔɔ gba, kɛɛ ii gilini la lapiva kɔɔ taa Ngewɔ ti maa i hɔɔ a kpaya.

⁷Kia aa na wie, i gbuailɔ toma wai na a ngi wumaye, i wote a nduwɔ. I wieilɔ kia lɔɔ nuuvu, i gbua nga ngi yɛngɔ a nuuvu.

⁸I ta yekpe mayeilɔ, i lo goloma Ngewɔ wɛ i luma i haa, hee na i pieni krɔsii ma.

⁹Na vamia Ngewɔ i ngi loni tomɛi na tewengɔ tomɛi kpɛlɛɛ ma ngelegoohu, i mbiyɛ ve ngi wɛ tewengɔ mbiyɛ weka gbi ma.

¹⁰ Faale, baagɔma veva Yesu biyɛi wɛ, Hani kpɛlɛɛ ti ngelegoohu kɛɛ dunya kɛɛ ndɔu ta mawɛɛlɔ ngi gɔɔbu,

¹¹tawao ti gbi ta ndelɔ leiŋ tɛɛ Yesu Kristi lɔ ti Lemɔi le ngɔlɔyɛi veva mu Kɛkɛ Ngewɔ wɛ.

¹²Faale naa nya liimablɛisia, kia lɔɔ wu yɛ woolo nya layie ma tuuŋ watii na ngi yɛ wu lia, fesangɔ waa a yɛla wu golo mbɛ tewengɔ na ma ji ngɛɛ yɛ wu lia. A wua yekpe ve Ngewɔ wɛ nduwahu kɛɛ magbɛli wu yɛ lɔɔ a lapi haaŋ wu mbawoyei majɔɔ,

¹³ajifa Ngewɔ lɔ tuuŋ yengema wu lia, aako i pie mani i wu lɔ tawao wu kpaya majɔɔ ngi nda liima hindei wieva.

¹⁴Wu yɛngaa hinda gbi wiema, waa gbonyɛ wu nyɔunyɔ ma tawao waa wu nyɔunyɔ laabla,

¹⁵ aako numu gbi aa wu yia nyamu le tawao wu joowi jumbui ma, wu yɛ sɛwɛ kia Ngewɔ leengaa yekpengaa, wu heini dunya hu kavablaa kɛɛ jumbublaa ti ndavengɔ. Mahoungɔ wu voo ti lia kia tumbekeisia ta ngelei ma voo la,

¹⁶a ji wa Ndɛvu ve yiɛi le ti ma. Wu ji wiengaa, nga sabu jɔlɔ mata gbuava a wue Folei na ma Kristi a wa, ajifa na wu pienga a kɛlɔ kɛ ngenge gbayangɔi kpɛlɛɛ ngi pieni ii yɛni a kɛɛwɛ-mɔɔnɛ.

¹⁷Tɛnga ti nya waamaa nya ŋamɛi i wu kia saahanii na wa fe Ngewɔ wɛ, tamia a wu lalei a Kristi. Na wiengaa hii, kɛ nya goohu nɛngɔe tawao kɛ mua wueni kpɛlɛɛ lɔ mu gbɔnga nya goohunɛɛi ma.

¹⁸Hii lɔɔ mahoungɔ wua bɛɛ wu goohunɛɛ, mua wueni mu gbɔ wu goohunɛɛi ma.

¹⁹Ndemɔi i lumangaa, taa nya lii hu Timoti loova wu gama hugutungɔ, kɔɔ ngi wu gama va gɔɔ nya lii i lɛli.

²⁰Ta yakpe lɔ wu hinda i mua ta lii hu tawao ngi gbewengɔe vulii wu va.

²¹Yeepekeisia gbi ti gbewengɔ ti wuma hindei lekee lɔ va, tii gbeweni Yesu Kristi liima hindei wieva.

²²Tawao wua vulii wu ngi gbekpeyii gɔɔlɔ, kia mua ta mu Ngowili Yekpei yeengengei wienga la kia hindolo tia ngi kɛkɛ.

²³Faale ngi nya hindei gɛlɛyii gɔngaa lekee, ta lɔ nya lii ngi ma ngi loova wu gama.

²⁴Tawao nya lii lɔ looni Ndemɔi ma kɛ a pielɔ vulii ngi gu a wala wu gama hugutungɔ.

²⁵Ngi tɔnga kɛ a nyandelɔ ngi mu ndee Ipafɔditɔsi lo wu gama na mua ta mu ngenge gboto wienga, mu ndapi gboto gɔnga Kristi va tawao wu vamia i wanga, gbɔva nya ma.

²⁶Wu gbi wu lɔ-mani lɔ waa ngi ma, tawao ngi lii gbuangɔe ngi goohu jifa wu yɛ mɛniilɔ kɛ i heegbɛilɔ.

²⁷I heegbɛilɔ vulii a tɔnya, i loni te i haa. Kɛɛ Ngewɔ i manuilɔ ngi ma, tawao ta yaangɔ ii le, i manuni nya bɛɛ lɔ ma, i ndiinyani gboto veela nya ma.

²⁸Faale nya longɔ waa le ngi ngi lo wu gama aako wu goohu i nɛɛ gbɔma ji wa ngi lɔ, nya bɛɛ nya liinyani i gɛlɛ.

²⁹Kɔnɛle a loko hei ngi bu a kohunɛ waa ajifa wu ndee mia a ngie, wua tieni wu longɔ a Ndemɔi. A baagɔma ve nungei nasia kpɛlɛɛ wɛ ta na wie i pienga,

³⁰ajifa i ngi lɛɛvui gbuɛilɔ ndɔgbɔ a lo te i haa Kristi yengei va, kɔɔ i kpɔmɛi na wie nya ma wua vulii wuii yɛ gu a piela.