Read Ngowili Yekpei Numu Kpɛlɛɛ Va FILIPAIBLƐISIA 4 Bible Online

FILIPAIBLƐISIA 4 - Ngowili Yekpei Numu Kpɛlɛɛ Va bible

FILIPAIBLƐISIA 4

¹Faale na, nya mbaa Kristimableisia, ngi loni a wue kpa tawao wu mani i nya lɔnga kpa! Wa pie kpa nya goohu i nɛɛ tawao nga mata gbua kpa kpele gbi a wue! Nya liima ndeengɛisia, hii mia mahoungɔ wu loo kpaŋ, waa wote wu luvayii hu kia wua Ndemɔi-ni wu wilingɔ hu.

²Yuodia wua Sintiki, nyaa wu manɛnɛma, a lapi wu woo i yɛ yila kia ndeenyahalengei nasia tia Ndemɔi-ni ti wilingɔ hu.

³Kɛɛ bia, nya mbaa ngengemɔ lɔnyangɔi, nya longɔ bi gbɔ nyahangɛi jisia ma; jifa mua tieni mu ngenge gbayangɔ wienga Ngowili Yekpei vayava hu, mua Klɛmɛnt-ni kɛɛ nya mbaa ngengeblaa wekɛisia gbi, ti biyɛi nyɛingɔ Ngewɔ Gɔlɛi na hu fuublɛisia ti lɛisia ti hu.

⁴A goohu nɛɛ waa kpele gbi ji wua Ndemɔi-ni wu wilingɔ hu. Gbɛɛ ngi nde gbɔma: a goohunɛɛ.

⁵A bɛwɛbɛwɛya gɛ a numu kpɛlɛɛ. Ndemɔi lɔ wama hugutungɔ.

⁶Hinda gbi aa wu liihɛlɛ, kɛɛ wu yee yɛni gbi Ngewɔ vɛlima, a ngi vɛli kpele gbi a na wu gbewengɔ fa tawao wu siɛgboto gbua ngi ma watii gbi wa yɛ ngi vɛlima.

⁷Faale ndiilɛli na Ngewɔ a fe, na numu gbi ɛɛ gu a ngi yɛyii gɔla a wu liisia mahugbelɔ kɛɛ wu nɛmahuisia jifa wua Yesu Kristi-ni wu wilingɔ hu.

⁸Nya mbaa Kristimableisia, kɛlɛma yɛpɛi lɔ ngi ndema kɔlɛi ji hu a ya a gili a hindei nasia lekee ti gbekpengɔ tawao nungaa ta tato: tia mia a hindei nasia ti lɔnyangɔ, baagɔma i ti ma, ti wɔnangɔ, ti sɛwɛsɛwɛngɔ, hindei nasia numu gbi a lo la tawao ti malɔwɔi nyandengɔ.

⁹Hindei nasia wu majɔɔni a nge, a ngayenge kia ngi yɛ nde la kɛɛ kia ngi yɛ pie; tawao Ngewɔ na a ndiilɛli ve mu wɛ a yɛlɔ wu wooma.

¹⁰Nya goohu nɛngɔ wa Ndemɔi hu, kɛ kia na hu i lɛmbinga ka, nya ma lii i yamanga wu goohu. Ngii ndema ngaa yɛma nya hinda i gbeilɔ a gbewela wu ma sabu lɔ wuii majɔɔni kɛva kɛ wu gbewengɔe nya va.

¹¹Tawao ngii ji lema jifa ngi gilinga la kɛ wu nya gbuanga ndɔgbɔ, jifa nya liilɛlingɔe a na gbi a yɛ nya yeya.

¹²Ngi kɔɔlɔ gbɔɔ hinda-gbɔundaa le a yɛ numu ma kɛɛ ji nɛnɛɛ a yɛ numu ma. Yeemakɛi ji gungɔe nya hu aako hinda gbi ngi yɛ na, watii gbi nya liilɛlingɔe, nya goovengɔ i yɛla ɔɔ ndɔlɛ i yɛ nya ma, hani i yɛ nya yeya mɔnungɔ nya ma ɔɔ i yɛ kulo hii.

¹³Kristi lɔ a kpaya ve nya wɛ guva hinda gbi bu.

¹⁴Kɛɛ hinda yekpe waa mia wu pieni ji wu gbɔni nya ma nya hinda-gbɔugbɔi hu.

¹⁵ Wua vulii wu Kristimableisia wu Filipai wu kɔɔlɔ vulii pandawanda kɛ watii na ngi gbuani Masidonia lɔlei hu, Ngowili Yekpei legbele ninɛi wu ma, wua yakpe mia Kristimablaa a wue wu gbɔni nya ma; wua lekee mia nya hinda-gbɔugbɔi i lani mua wueni ma kɛɛ yeenafei.

¹⁶ Ji ngi yɛ Tɛsalonika la wai hu, ngi gbeweni kpɔma va tewengɔ heima yila ma, wu njooyoilɔ nya wɛ.

¹⁷Tii yɛma nya longɔ lekee ngi yɛ a hani majɔɔ a wue gbama; nya longɔ wu yɛ a kpekpeyei mato wie, i yɛ a wu yeena mahu wu pienga.

¹⁸ Kɔlɛi ji a selilɔ kɛ hani kpɛlɛɛ wu fenga nya wɛ, ngi majɔɛilɔ tawao i guilɔ, i mɔnu! Kia na Ipafɔditɔsi i wanga a wu hindawanda hani kpɛlɛɛ, na hii nya gbewengɔ fa ngi yeemaleema jɔnga. Yeehani jisia ti wiengɔe kia saahanii gunɛnɛ numu a fe Ngewɔ wɛ, saai na bonda a nɛɛ ngi wɛ tawao a ndahou.

¹⁹Tawao Yesu Kristi sabui hu, na gbi wa gbewe fa, nya Yewɔɛi a kpualɔ ngi gbatɛ wai hu i fe wu wɛ.

²⁰Ngɔlɔyɛi i yɛ mu Kɛkɛ Ngewɔ wɛ kunafɔ kɛɛ kunafɔ! Amiina.

²¹Ngewɔ nungei nasia Yesu Kristi woo a tie, nya fama gboto yoyoma ti wɛ. Kristimablei nasia ti mbei nya gama, tɛ ta va wu ma.

²²Ngewɔ nungei nasia kpɛlɛɛ ti mbei tiaa fama gboto yooyoma wu wɛ, kakayee nasia ti Rom Mahɛi yeepɛlɛbu.

²³Nyaa Ngewɔ vɛlima kɔɔ mu Lemɔi Yesu Kristi yauwandei i yɛ wu kpɛlɛɛ ma.