Read Ngowili Yekpei Numu Kpɛlɛɛ Va KƆLƆSIBLƐISIA 1 Bible Online

KƆLƆSIBLƐISIA 1 - Ngowili Yekpei Numu Kpɛlɛɛ Va bible

KƆLƆSIBLƐISIA 1

¹Nya Pɔɔl, nya i nɛni Ngewɔ wɛ nya yɛva a tomɔ Yesu Kristi va, nya mia ngi kɔlɛi ji nyɛima mua mu ndewei Timoti,

²Ngewɔ nungei nasia gama ti heini Kɔlɔsi laa wai hu, ti yɛngɔ a mu mbaa Kristimablei nasia ti langɔ a Kristi, jifa ti wilingɔ hu tia Kristi-ni. Mu Kɛkɛ Ngewɔ i ngauwanda gɛ a wue i wu gɔ a ndiilɛli.

³Ma siɛgbualɔ mu Lemɔi Yesu Kristi ngi Kɛkɛ ma watii gbi ma yɛ Ngewɔ vɛlima wu va,

⁴ajifa mu mɛninga kia wu langɔ a Yesu Kristi kɛɛ kia wu longɔ a Ngewɔ nungeisia.

⁵Watii na Ngowili yeetɔnyangɔi, na Ngowili Yekpei le, i foni wu ma haala, yeewatii mia wu hani yekpei na hinda humɛnini wu lii i ma majɔɔva. Faale wu lalei a Kristi kɛɛ wu loyii a Ngewɔmableisia ti gbuani na hu lɔ wu kulɔgbema; tawao yeehanii na lamagbatɛngɔe pandaa ngelegoohu.

⁶Ngowili Yekpei lɔ tuuŋ piema kpekpeya a wa nungaa gama tawao taa lekee vayama dunyei hu gbi, kia lɔɔ i vayanga wu maahu i hiye folei na ma wu Ngewɔ yauwandei hinda humɛni, tawao wu ngi yɛyii yeetɔnyɛi gɔɔni vulii.

⁷ Ɛpafras lɔ i ji hinda hugɛni a wue, mu liima yengemɔi na mua tieni mu yengema Kristi wɛ, a mu wooma gbewe gbua.

⁸I ndomɛi na hinda hugɛnga a mue Ngewɔ Yafei i punga wu lii hu.

⁹Sabui ji va lɔ mu Ngewɔ vɛlima tuuŋ wu va i hiye watii na ma mu wu hinda humɛnini. Mua Ngewɔ manɛnɛma aako i ngi liima hindei gɔla yeenɛmahulewe waa ve wu wɛ, kɛɛ nɛmahulewei kɛɛ hinda hugɔɔlei na gbi Ngewɔ Yafei a fe.

¹⁰Na wiengaa wa gulɔ a luvala kia Ndemɔi longɔ la, watii gbi wa ngi liima hindei wie. Wu luvayii hu, wa kpekpe laasi gbi wielɔ, tawao wu Yewɔ gɔlɛi maa a tolɔ tuuŋ.

¹¹Nyaa Ngewɔ vɛlima aako i pie ngi gbaya gabandengɔ wai i pie wu lii i lo wu gu hindei gbi bu. Tawao a siɛgbua a kohunɛ mu Kɛkɛ ma, na i pienga wu gunga a yɛla hanii na ma Ngewɔ i ndamagbatɛnga ngi nungeisia va ngi mahayɛi na hu foofo lekee i na.

¹³I mu gbuanga jumbui lemayɛi yeekpindii hu, i wanga a mue ngi liima Hindoloi mahayɛi hu,

¹⁴ na i mu wumawonga a ji i pienga Ngewɔ i mu jumbuisia lufenga.

¹⁵Ngewɔ na numu ɛɛ gu a tɔla, ngi gbuayei mia a Kristi na nungaa ti yɛ gu a tɔla. Ta lɔ Kplaloi le, ngi lewengɔ hani gbi ma Ngewɔ i kpatɛni.

¹⁶Gbamaile Ngewɔ i hanii gbi gbatɛni a ngi loko lɔ, nasia ti ngelegoohu kɛɛ nasia ti dunyei hu, nasia numu a gu a tɔla kɛɛ nasia numu ɛɛ gu a tɔla, kɛɛ ngafangeisia ti lunyɛi kɛɛ ndebleisia tia yeemahangeisia kɛɛ mahubleisia. Ngewɔ i ngelegoohu kɛɛ dunyei gbi gbatɛni a ngi loko lɔ tawao i kpatɛni ngi va lɔ.

¹⁷Kristi i yɛ na lɔ pɛiŋ Ngewɔ i yaa hani gbi gbatɛ, tawao ngi gbayei lɔ i houni hanii kpɛlɛɛ ma ti yɛmɛisia.

¹⁸ Kristi lɔ sɔsii yeengui le na yɛni a ngi gbuhɛi; ta lɔ ndɛvui a gbua ngi gama. Ta lɔ Kplaloi a ngie Ngewɔ i ngi wuni hee hu aako ta yakpe i yɛ a hindei gbi yeekulɔmɔ.

¹⁹Gbamaile Ngewɔ vulii lɔ i hugbatɛni yɛ ngi Yewɔyɛi yeehuvɛi yɛyii gbi i yɛ ngi Hindoloi hu.

²⁰ Faale Ngewɔ Hindoloi sabui hu, ta ngi Ngewɔ i hugbatɛilɔ pieva hanii gbi ngelegoohu kɛɛ dunya ti yama ngi ma. Ngewɔ i wailɔ a ndiilɛli hee va ngi Hindoloi i pieni krɔsii ma, i hanii gbi ti dunyei hu kɛɛ ngelegoohu yama ta yekpe ma.

²¹Watii yila wɔɔ, wu maguhangɔ yɛla a Ngewɔ tawao ngi juwungaa yɛla a wue hinda nyamui nasia va wu yɛ pie ɔɔ wu yɛ gili la.

²²Kɛɛ kiahuna na, jifa ngi Hindoloi i haani kia nuuvu na, Ngewɔ i wu yamanga na tayekpe ma, aako i pie wu loo ngi gulɔ jumbu wulo bɛɛ ii wu ma.

²³Kɛɛ mahoungɔ wu yɛ a la tuuŋ a Ngowili Yekpei, wu lo kpaŋ kia pɛlei hitɛ gɔtii i na, wuɛɛ luma gbɛogbɛ aa wu loko gbenda na ma wu lii i loni ma sɔɔva ji wu Ngowili Yekpei mɛnini. Ngowili Yekpei ji lɔ nya nya Pɔɔl ngi woteni a yeengengemɔ Ngowili Yekpei ji numu laasi gboto ti hugɛnga a numu gbi dunyei hu.

²⁴Kiahuna nya goohu nɛngɔe kpalɛisia va ti lama nya ma wu va, ajifa kpaalɛi nasia ta la nya gbuhɛi ma tia lɔ ta pie ngi kpaalɛi nasia yeemɔɔnii yakpua i lani Kristi ma Kristimableisia gbi va ngi gbuhɛi a tie.

²⁵Tawao Ngewɔ i nya yɛnga a Kristimableisia ti yengemɔ, i yeengengei ji venga nya wɛ pieva wu gbekpeya va. Yeengengei i yɛni a ngi Wowili lelaa lɔ gbalauŋ nungaa ma,

²⁶ta lɔ ndɔwuma hindei le i ndɔwunga wɔɔ gba nuuvui kpɛlɛɛ ma kɛɛ i magɛnga na a ngi nungeisia.

²⁷Na i Ngewɔ nɛmahu pieva ta mia a ngi lɔwuma hindei hugɛla a ngi nungeisia, ndɔwuma-hinda gabandengɔ wai na i ngi yeya nuuvui yeelasii kpɛlɛɛ va. Tawao yeendɔwuma-hindei lɔ a ji kɛ Kristi lɔ heini wu liisia hu, tawao na a kɛlɔ kɛ wa Ngewɔ wɔlɔyei wu ndɛi majɔɔlɔ.

²⁸Famia ma Kristi hinda hugɛ a numu gbi. Nɛmahulewei na gbi lekee i mu wɛ, ma ngayengelɔ ti laahiva kɛɛ ti gaava aako mu pie yeengila gbi i lo Ngewɔ gulɔ kia nuuvu laavengɔ, tia Kristi ti wilingɔ hu.

²⁹Aako ji i wie, nga mɔnɛlɔ, nga lapi a Kristi gbayawai na gbi i yengema nya hu.