Read Ngowili Yekpei Numu Kpɛlɛɛ Va KƆLƆSIBLƐISIA 4 Bible Online

KƆLƆSIBLƐISIA 4 - Ngowili Yekpei Numu Kpɛlɛɛ Va bible

KƆLƆSIBLƐISIA 4

¹Nduwɔkɛisia, a pɔɔna-hinda wie a wu luwɔngɛisia, waa ti gava. I yɛ wu nɛmahu kɛ numu lɔ ngelegoohu ngi woo a wua bɛɛ.

²A nɔɔ Ngewɔ vɛlila ma, tawao wu ya aa lema, wa siɛgbua ngi ma.

³A yɛ a Ngewɔ vɛli muabɛɛ va kɔɔ Ngewɔ i pele ve mu wɛ ngi Wowili na leva ndɔwungɔ wɔɔ kɔlooni Kristi ma. Gbamaile na vamia ngi kpindiwɛlei bu kiahuna.

⁴Faale, a Ngewɔ vɛli kɔɔ ngi gu ngi ngi Wowili ji yeembui gɛ gbalauŋ kia mahoungɔ ngi pie la.

⁵A nɛmahulewe wie wu wiehindei hu nasia gama tii lani a Kristi, watii gbi aa lewe wu ma kɛva a tie kɛ wua wu langɔe a Kristi.

⁶Mahoungɔe wu layie manɛngɔ i yɛla kpele gbi nungaa woohu nahi yeemani i yɛ a ti lɔ, tawao mahoungɔe wu kpɛmboi na gɔɔ mbɛgɔma nguava numu gbi gama.

⁷ Mu liima ndewei Taikikɔsi, na ngengemɔ a ngie numu a gu i liilo ngi ma tawao mu mbaa ngengemɔɔ a ngie mu Lemɔi yengei hu, a vɛi kpɛlɛɛ gɛlɔ a wue kɔloongɔ nya ma.

⁸Na vamia ngi ngi looma wu gama kɔɔ i pie wu goohu i nɛɛ gbɔma a ji a mu kpɛlɛɛ gama va gɛ a wue.

⁹Tia Onɛsimɔsi mia ti wama, mu liima ndewei na mu liilongɔ ngi ma, tawao wua tieni mia Kristimableisia a wue miando. Ta hindei gbi hugɛlɔ a wue i wiema mbei.

¹⁰ Aristakɔs na mua ta mu kpindiwɛlei bu yɛ a va kaka wu ma, hii Maaki bɛɛ i na, Banabasi ndewei (Wu wilanga a fɛimawoo majɔɔla, loko heiva Maaki bu pandawanda ji a foo wu ma.)

¹¹Jɔsua na ta toli gbɔma a Jɔstɔs, ta bɛɛ yɛ a va kaka wu ma. Jisia sawei jisia lekee lɔ Juublaa a tie ti langɔ a Kristi mua tieni mu yengema Ngewɔ Mahayɛi va, tawao ti kpɔma waa wienga nya ma.

¹² Ipafras yɛ a va kaka wu ma; wua vulii wu yilayee mia a ngie kɛɛ Yesu Kristi yengemɔ. Taa kpele gbi Ngewɔ vɛlima a ngi lii gbi wu va yɛ Ngewɔ i pie wu lo kpaŋ kia Kristimablaa huhitingɔngaa a wue, wu golo pandawanda Ngewɔ liima hindei bu.

¹³Nya vulii nga gulɔ a selila kɛ i ngenge gbayangɔ waa wienga gbɔva wu ma kɛɛ nungei nasia ti Laodisia kɛɛ Haiarapolis laa waisia hu.

¹⁴ Mu liima Halemɔi Luki taa Diimas bɛɛ tɛɛ ta va kaka wu ma.

¹⁵Mua fama yoyoma Kristimablei nasia gama ti Laodisia, kɛɛ nyapoi Niifa taa Kristimablei nasia ta gomɛ ngi wɛleibu.

¹⁶Wu kpɔyɔngaa a kɔlɛi ji gaala wu tɔ i gaa Kristimablei nasia gama ti Laodisia. Hii mahoungɔ wu kɔlɛi na gaa mu ndeengɛi nasia ti Laodisia ti njoyoma wu gama.

¹⁷A nde Akipɔs ma i Ndemɔi yengei na wie ti feni ngi wɛ.

¹⁸Nya vulii nya lokoi mia ngi famɛi jisia nyɛima la ngi njoyoma wu wɛ. Waa lema kɛ nyaa kpindiwɛlei bu. Ngewɔ i ngauwanda gɛ a wue.