Read Ngowili Yekpei Numu Kpɛlɛɛ Va 1 TƐSALONIKABLƐISIA 3 Bible Online

1 TƐSALONIKABLƐISIA 3 - Ngowili Yekpei Numu Kpɛlɛɛ Va bible

1 TƐSALONIKABLƐISIA 3

¹ Kɛlɛmɛi muii guni a mawulo weka wiela. Faale mu hugbatɛilɔ muɛɛ mua lekee mu lo Atɛns,

²ji mu Timoti loni wu gama, mu ndewei na mua tieni mu yengema Ngewɔ wɛ a ji ma Ngowili Yekpei le kɔɔlooni Kristi ma. Mu ngi yoyoilɔ aako i pie wu layii a Kristi maa i to,

³aako wu yilayee bɛɛ aa yama a wooma wee juwuyei jisia va. Wua vulii wu kɔɔlɔ kɛ juwuyei jisia nyɔkɔ ti yɛni a Ngewɔ liima hindei lɛɛngaa lɔ mu va.

⁴Gbamaile watii na lɛ mu yɛ wu lia, mu humbuilɔ a hugɛ a wue kɛ nungaa ta juwuya hitɛlɔ wu wooma; tawao kia wu kɔɔngɔ la pandawanda, na mia lɔɔ i wieni.

⁵Na vamia ngi Timoti yoyoni. Ngii yaa guni a mawulo wiela aa lewe na ma, famia ngi ngi loni kɔɔ i wu layii a Kristi hugbɛkpɛ. A tɔnya nya luwangɔ yɛla ngɛ Seitana i wu gɔlɛma a pelei lɛɛnga hu we, kɛ mu mɔnɛi kpɛlɛɛ i yɛnga mu ma a kɛwɛ mɔnɛ!

⁶ Timoti i yamanga mbei na tawao i wanga a va nɛnɛɛ kɔlooni wu layii ma a Ngewɔ kɛɛ ndomɛi na wu piengɔ a ngie. I hugɛnga a mue yɛ wa kili yekpe wielɔ a mue watii gbi, tawao yɛ wu longɔe wu mu lɔ kia lɔɔ mu longɔ mu wu lɔ.

⁷Famia ndiinyani kɛɛ kpalɛi na kpɛlɛɛ hu i langa mu ma, wu hinda i mu lii nɛpɔnga, mu mbaa Kristimableisia. Wu layii a Kristi mia i mu lii nɛpɔni,

⁸ajifa ndɛvui vulii lɔ na mu hu ji mu kɔɔnga kɛ wu lala a Ndemɔi i ya kpau.

⁹Ma siɛgbualɔ mu Yewɔɛi ma wu va. Kɛɛ muɛɛ gu a siɛgbuala ngi ma pandawanda ngi yaama kohunɛi va i mu hu kɔlooni wu ma.

¹⁰A folo kɛɛ kpindi mua ngi vɛlima a mu lii gbi aako i pie mua wueni mu yaama wɛlɛ ma, mu na ve wu gbewengɔ fa wu lalei va.

¹¹Mu Kɛkɛ Ngewɔ vulii kɛɛ mu Lemɔi Yesu ti pele la mu wɛ wava wu gama.

¹²Ndemɔi i pie ndomɛi na wu peingɔ a wu nyɔunyɔ kɛɛ numui gbi maa i to i wɔlɔ i wie kia ndomɛi na i na mu piengɔ a wue.

¹³Ji wiengaa, Ndemɔi a kpaya wuaalɔ wu hu, tawao nyamu gbi ɛɛ yɛ wu hu wu magayemangɔ a yɛla mu Kɛkɛ Ngewɔ yaama ji mu Lemɔi Yesu a wa tia nasia gbi ngi woo a tie.