Read Ngowili Yekpei Numu Kpɛlɛɛ Va 1 TƐSALONIKABLƐISIA 5 Bible Online

1 TƐSALONIKABLƐISIA 5 - Ngowili Yekpei Numu Kpɛlɛɛ Va bible

1 TƐSALONIKABLƐISIA 5

¹Nya mbaa Kristimableisia, sabu gbi ii na ngi kɔlɔ nyɛi wu gama kɔɔlooni lɔwɔi yeefoloi na ma Ndemɔi a yama mbei.

² Ajifa wua vulii wu kɔɔlɔ pandawanda kɛ Ndemɔi wa-Volei a walɔ kia humamɔi a wa kualama hu a kpindi.

³Ji nungaa ta tɔɔto a ndela tɛɛ, “Mu liilɛlingɔe tawao hinda nyamu gbi ii mu gama,” yeewatii na mia hunyani waa a yei ti ma fulo kia ndoo le goohugbalɛi i na, a gbundɛ nyahɛi ma ji ngi lo le watii a fo ma, tawao numu gbi ɛɛ gbua mbu.

⁴Kɛɛ wua, nya mbaa Kristimableisia, kia wuii yeehindei ji yeekpindi hu, maa ii houni folei na i gɔla wu ma kia humamɔi a gɔla numu ma.

⁵Wu kpɛlɛɛ wu yɛni a nungaa lɔ wa luva bi tɔa bɛɛ wa hinda gbi wie folei yeefofoi hu lɔ. Muɛɛ luva kia nungei nasia na ta hinda wie kpele gbi kpindi hu.

⁶Faale na, maa ii houni mu yɛ njii hu, kia nungaa wekɛisia ti na; mahoungɔ mu valangɔ i yɛla tawao mu gungɔ mu lii ma.

⁷Kpindi lɔ nungaa ta yii; kpindi lɔ ndɔi a nungaa hou.

⁸ Kɛɛ mua ma hinda gbi wie a folei lɔ tawao mahoungɔ mu gu mu lii ma. Mahoungɔ mu la a Ngewɔ mu lo a ngie na a wielɔ bi tɔa bɛɛ mu mu mayilinga kɔi va, tawao mu lii i yɛ vulii ma kɛ Ngewɔ a mu bawolɔ: na a wielɔ bi tɔa bɛɛ wu kɔlu-bɔlɛi lɔ wɛlɛnga wumba.

⁹Ngewɔ ii loko looni mu ma aako mu kpalɛ majɔɔ ngi liilewei va kɛɛ aako mu mbawoyei maajɔɔ mu Lemɔi Yesu Kristi sabui hu,

¹⁰na i haani mu va kɔɔ mu yɛna mua tieni, i bɛ mu vulungɔi ma ɔɔ mu haangɔi ma watii ma a yama mbei.

¹¹Faale, a yɛ a wu nyɔunyɔ lii nɛpɔ, wa gbɔ wu nyɔunyɔ ma, kia lɔɔ wu piema kiahuna.

¹²Mua wu manɛnɛma, mu mbaa Kristimableisia, muɛɛ wu yɛ a baagɔma yekpe ve nasia wɛ ti yengema wu lia, nasia Ndemɔi i ti lolinga kɔɔ ti pele gɛ a wue, tawao ta wu gaa a pelei na mahoungɔ Kristimamɔi i jia la.

¹³A baagɔma waa ve ti wɛ, wu lo a tie ngengei na kpɛlɛɛ va ti piema. Fawɔli gbi aa yɛ wu nyɔunyɔ luahu.

¹⁴Mua wu manɛnɛma, mu mbaa Kristimableisia, muɛɛ wu kɛwɛ-gbuablɛisia laahii, wu nduwableisia liilo, wu gbɔ nasia ma ti gbewengɔ kpɔma va, waa gbandi a numu gbi.

¹⁵Waa lo heini numu gbi aa hinda nyamu hunyɔɔ a hinda nyamu, tawao a lapi vulii watii gbi hinda yekpe wieva a wu nyɔunyɔ kɛɛ numui gbi.

¹⁶Wu goohu nɛngɔ i yɛla watii gbi,

¹⁷a Ngewɔ vɛli kpema gbi,

¹⁸gbɛogbɛ bɛ i wie a yɛ a siɛgbua Ngewɔ ma. Tuvei ji lɔ Ngewɔ longɔ wu pie wua Yesu Kristi-ni wu wilingɔ hu.

¹⁹Waa pie Ngewɔ Yafei aa gbe a ngi yengei wiela;

²⁰Waa lɛɛ Ngowili nasia hu Ngewɔ a pu nungaa ti lii hu ndeva.

²¹A yɛ a gbua hindei gbi wooma, wu yɛ a na wie kpekpengɔ,

²²waa loko wili hinda nyamu yeelasii gbi wiela hu.

²³Ngewɔ na a ndiilɛli ve mu wɛ i pie wu gbua a ngie a pelei gbi, i pie wu lɛɛvui kɛɛ wu yafei kɛɛ wu gbuhɛi gbi i yɛ sɛwɛsɛwɛ aako watii na mu Lemɔi Yesu Kristi a wa gbɔma njia ɛɛ yɛ wu ma.

²⁴Ngewɔ na i wu lolima yɛva a ngi nda nungeisia a na wielɔ, ajifa ngi layie ɛɛ nyani.

²⁵Mu mbaa Kristimableisia, a yɛ a Ngewɔ vɛli mua bɛɛ va.

²⁶A va Kristimableisia kpɛlɛɛ ma a ndoma lii.

²⁷Nyaa ndema wu ma a kpayei na mu Lemɔi i feni nya wɛ ngɛɛ wu kɔlɛi ji gaa Kristimableisia gbi gama.

²⁸Mu Lemɔi Yesu Kristi i ngauwanda ve wu wɛ.