Read Ngowili Yekpei Numu Kpɛlɛɛ Va 2 TƐSALONIKABLƐISIA 1 Bible Online

2 TƐSALONIKABLƐISIA 1 - Ngowili Yekpei Numu Kpɛlɛɛ Va bible

2 TƐSALONIKABLƐISIA 1

¹ Nya Pɔɔl, nya mia ngi kɔlɛi ji yoyoma, mua Sailas kɛɛ Timoti. Wua wu Kristimablei nasia gama wu heini Tɛsalonika, mu Kɛkɛ Ngewɔ woo a wue tia mu Lemɔi Yesu Kristi.

²Mu Kɛkɛ Ngewɔ kɛɛ mu Lemɔi Yesu Kristi ti ngauwanda gɛ a wue, ti wu gɔ a ndiilɛli.

³Mu mbaa Kristimableisia, mahoungɔ mu siɛgbua Ngewɔ ma watii gbi wu kpɛlɛɛ va ajifa wu layii a Ngewɔ lɔ gbayama waa, tawao ndomɛi na i wu yilayee gbi hu wu mbaa wekɛisia va taa wɔlɔma.

⁴Na vamia mua vulii ma matagbualɔ a wue Ngewɔ sɔsiisia hu kɛɛ guyii va hinda gbɔugbɔu bu wu layii a Kristi kia bɛɛ nungaa ti hitɛnga wu wooma a juwuya, ta kpalɛngaa la wu ma.

⁵Ji kpɛlɛɛ a kɛlɔ leiŋ kɛ Ngewɔ a kiti lewe a pɔɔna lɔ, faale a pielɔ wu yɛ ngi mahayɛi na bu na kpalɛ i lama wu ma fa.

⁶Na pɔɔnangɔ ta lɔ Ngewɔ a pie: a kpalɛ lalɔ nungei nasia bɛɛ ma ti kpalɛ lama wu ma,

⁷tawao wua kpalɛ i lama wu ma kiahuna Ngewɔ a wu nɛpɔlɔ kɛɛ mua bɛɛ. A ji wielɔ watii na Ndemɔi Yesu a hiye ngelegoohu i gbua nga taa ngi malikei nasia kpaya waa i ti wɛ hinda waawaa wieva,

⁸kɛɛ ngɔmbuvo waa, hinda nyamui hunyɔva nasia ma tii Ngewɔ gɔɔ kɛɛ nasia tɛɛ luma taa na wie Ngowili Yekpei kɔlooni mu Lemɔi Yesu ma i ndeni.

⁹ Ngewɔ a kpalɛ lalɔ ti ma, i ti nyani kunafɔ va, tɛɛ foo mia Ndemɔi i na tawao tɛɛ ngi wɔɔlɔya gabandengɔ wai hulɔ,

¹⁰ji a wa folei na ma ngɔɔlɔya kɛɛ mbɛlɛya majɔɔva a ngi nungei nasia gbi ti langɔ a ngie. Wua bɛɛ wa yɛlɔ ti lia ajifa wu langa a ngowili na mu ndeni wu ma.

¹¹Na vamia mu Ngewɔ vɛlima wu va watii gbi. Ma mu Yewɔɛi manɛnɛlɔ aako i pie wu maa i hou tuvei na wieva i wu lolinga fa. Ngewɔ gbayei i pie wu gu a kpekpei na kpɛlɛɛ wiela mani i wu ma pieva, i wu yengei yakpua wa pie ajifa wu langɔ a Kristi.

¹²Ji lɔ a wie mu Lemɔi Yesu biyɛi i ngɔɔlɔya majɔɔ a wue, wua bɛɛ wu majɔɔ a ngie, tawao ji a wielɔ mu Yewɔɛi kɛɛ Ndemɔi Yesu Kristi ti yauwandei yeesabui hu.