Read Ngowili Yekpei Numu Kpɛlɛɛ Va 2 TƐSALONIKABLƐISIA 3 Bible Online

2 TƐSALONIKABLƐISIA 3 - Ngowili Yekpei Numu Kpɛlɛɛ Va bible

2 TƐSALONIKABLƐISIA 3

¹Mu mbaa Kristimableisia, gbɛɛ na ngi njɛpɛi ji yeengui yeekɛlɛmayei le kɔnɛɛ, a Ngewɔ vɛli mu va aako Ngowili ji kɔlooni Ndemɔi ma i yɛ a vaya hu fulofulo tawao nasia ta majɔɔ ti baa gɔɔ ma, kia i wieni wu lia.

²A gbɔma Ngewɔ vɛli aako i mu gbua nyamublɛisia kɛɛ pienyamubleisia yeya; ajifa numui kpɛlɛɛ ii le taa la a Ngowili Yekpei.

³Kɛɛ Ndemɔi i yɛni a liivalamamɔ lɔ tawao a wu liisia gbalɔ, i pie Seitana ɛɛ gu aa hinda nyamu gbi wie a wue.

⁴Ndemɔi i pienga mu liilonga wu ma, tawao mu langɔe la kɛ wuaa na wiema ma nde wu ma tao wuɛ gbe a piela.

⁵Ndemɔi i pie wu liisia ti wote Ngewɔ lomɛi gama kɛɛ ndiiloi na Kristi pieni.

⁶Mu mbaa Kristimableisia, mua ndema wu ma a mu Lemɔi Yesu Kristi biyei hu muɛɛ waa gbɛɛ nasia ma tɛɛ luma taa yenge tawao tɛɛ hindei nasia wie ma nde muɛ ti pie.

⁷Wua vulii wu kɔɔlɔ pandawanda kɛ wa na lɔ wie mu pieni. Muii yɛ hawani ji mu yɛ wu lia.

⁸Numu gbi ii nda mɛhɛɛ veni mu wɛ na muii sɔngɔ gbuani ngi ma. Kia maa nda mɛhɛɛ hou, mu yɛlɔ a yenge hulewengɔ; mu yɛlɔ a yenge a folo kɛɛ kpindi aako numu gbi aa bɔnɔ mu va.

⁹Kpaya yɛlɔ mu hu kɔɔ mu wu mɔli gbɔva mu ma kɛɛ mu yɛlɔ a yenge mu magbewe gbua va aako mu tɔmaseli gɛ a wue pookɔɔva.

¹⁰Ji mu yɛ wu lia mu yɛlɔ a nde wu ma muɛɛ, numui na ɛɛ yenge waa mɛhɛɛ gbi ve ngi wɛ.

¹¹Mua ji lema ajifa muaa mɛnima kɛ nungaa lɛɛngaa lɔ wu lia tɛɛ luma taa yenge tawao tɛɛ gbɛogbɛ wie kɛlee loko wilila nungaa wekɛisia ti yengei hu.

¹²Mua ndema yeenungɛi jisia ma a mu Lemɔi Yesu Kristi biyei hu tawao mua ti laahima muɛɛ ti ti jiayii jɔgbɛ tawao ti yenge aako ti navoo jɔɔ hanii nasia yeyava ta gbewe fa.

¹³Kɛɛ wua, mu mbaa Kristimableisia, wu gahu aa gbɔyɔ a hinda yekpe wiela.

¹⁴Tɛngaa numu lɔ mia ɛɛ woolo Ngowili ji ma mu njoyoma kɔlɛi ji hu. Yeenumui i yɛngaa na, a lii hei ngi ma wu gbua ngi woohu, aako i wufe.

¹⁵Kɛɛ waa jia a ngie kia wu juwu na: kia na aa wie, a ngi laahii kia wu ndee.

¹⁶Ndemɔi vulii, na mu liilɛli a gbua ngi gama, i ndiilɛli ve wu wɛ kpele gbi kɛɛ a pelei gbi. Ndemɔi i yɛ wu gbi wooma.

¹⁷Nya lokoi vulii lɔ ngi ji nyɛima la: Nya Pɔɔl, nga va kaka wu ma. Himia nga nya laa wu kɔlɛi gbi ma. Himia nga kɔlɛi nyɛi.

¹⁸Mu Lemɔi Yesu Kristi i wu kpɛlɛɛ gɔ a ngauwanda.