Read Ngowili Yekpei Numu Kpɛlɛɛ Va 1 TIMOTI 3 Bible Online

1 TIMOTI 3 - Ngowili Yekpei Numu Kpɛlɛɛ Va bible

1 TIMOTI 3

¹Tɔnya yia lɔ a ji: Numu i longaa i yɛ a Kristimableisia ti gulɔlomui, ngenge yekpe mia i longa la.

² Kristimableisia ti gulɔmɔ ngi nyamuma gbi ɛɛ yɛ na, nyaha yakpe mia a yɛ ngi yeya, ngi nɛmahu yakpangɔ kpele gbi, ngi gungɔ ngi lii ma, a hinda hugbatɛ pandaa, a hotangɛisia gulu ngi yepɛlɛbu; tawao ngi bɛingɔ a yɛla a nungaa gaala;

³maa ii houni i yɛ a ndɔhoumɔ ɔɔ ndapi gulamɔ; mahoungɔ ngi yagɔlɛngɔ i yɛ la tawao ii loni a njinjia; maa ii houni i lo kaka a navoei,

⁴mahoungɔ i gu a ngi nyahɛi kɛɛ ngi leengeisia hinda hugbatɛlaa pandaa, tawao i pie ngi leengeisia ti golo ngi wɛ ti baa gɔɔ ngi ma.

⁵Gbamaile numu ii bɛilɔ a ngi nyahɛi tia ngi leengeisia ti hinda hugbatɛla, a yee gu i Ngewɔblɛisia mahugbe?

⁶Maa i houni i yɛ a numu nina sɔsii hu aako aa mamani Ngewɔ aa ngi gula, kia wɔɔ i Seitana gulani la.

⁷A yɛ a numu lɔ nungei nasia Kristimabla yaa a tie ti baa gɔɔngɔ ngi ma, aako ngawufe aa ngi male, kɛ i wilinga Seitana mani hu.

⁸Mahoungɔ kpɔmablaa Kristimableisia lia ti luvayii nyandengɔ i yɛla tawao ti lɔnyangɔ; tɛɛ ndɔ gbɔle hulewengɔ tawao tii haami navoo va;

⁹mahoungɔ lanaya lɔnyangɔi na Ngewɔ i kɛnga ti hɛlɛ la nɛmahugili yekpehu.

¹⁰Mahoungɔ bi ti hugɔɔ pɛiŋ, ti gungaa na a Ngewɔ yengei wiela, bi pie ti yenge.

¹¹Mahoungɔ ti nyahangɛisia bɛɛ ti luvayii nyandengɔ i yɛla tawao taa loko wili njɛpɛ-a-ngie hu; ti nɛmahui yakpangɔ a yɛla kpele gbi, ti wɔnangɔ hinda gbi hu.

¹²Mahoungɔ kpɔmamɔ gbi Kristimableisia lia ngi nyahɛi i yɛ yakpe, tawao i gu a ngi leengeisia kɛɛ ngi lehubleisia ti hinda hugbatɛla pandawanda.

¹³Kpɔmablei nasia ta ti yengei wie pandaa, baagɔma a yɛlɔ ti ma tawao ta gulɔ a yɛpɛla a ndiilo kɔlooni ti lalei ma a Yesu Kristi.

¹⁴Nya lii lɔ ma wava mu lɔ hugutungɔ, kia ngi kɔlɛi ji nyɛima bi gama,

¹⁵kɛɛ ngi gbɛndɛnga hu, kɔlɛi ji a pielɔ bi kɔɔ kia mahoungɔ mua Ngewɔ lehubleisia a mue ma luva, ndei na kɛngɔ a Ngewɔ vulungɔe sɔsii, ndɔkɔi na i looni tɔnyɛi bu.

¹⁶Numu gbi ɛɛ hou a mawali kia ndɔwuma hindei kɔlooni mu Yewɔi ma malɔwungɔ la. I gbuailɔ nga nuuvuya hu, Ngewɔ Yafei kɛilɔ kɛ ngi wɔnangɔi tawao malikeisia ti ngi lɔilɔ. Ti ngi yɛpɛi leilɔ kɛnyɛihu gbi, ti lailɔ a ngie dunyeihu gbi, tawao Ngewɔ i lɛilɔ a ngie ngelegoohu