Read Ngowili Yekpei Numu Kpɛlɛɛ Va 1 TIMOTI 5 Bible Online

1 TIMOTI 5 - Ngowili Yekpei Numu Kpɛlɛɛ Va bible

1 TIMOTI 5

¹Baa gbandɛ numui na la ngi wovangɔ bi ma, kɛɛ yɛpɛ ngi gama pandaa bi tɔa bɛɛ bi kɛkɛ mia a ngie. Hindo voningeisia hou kia bi ndeehingaa na,

²bi nyaha gbakoloisia hou kia bi njeni, bi nyaha voningeisia hou kia bi ndeenyahaleengaa, tawao bi sɛɛsɛɛngɔ i yɛla Ngewɔ yaama.

³Baagɔma ve ponyahangɛisia wɛ kakayee nasia tia lekee ti heini numu ii na aa gbɔ ti ma.

⁴Kɛɛ ndeengaa ti yaa ponyaha yeya ɔɔ taaleengaa, mahoungɔ ti namakɔli pɛiŋ a ti Yewɔi-vɛli yengei wiela ti bondɛisia gama aako ti ti leblɛisia kɛɛ ti maadani kɛɛ ti mamani ti gbekpeyɛi hunyɔɔ, ajifa na mia a nɛɛ Ngewɔ wɛ.

⁵Ponyahɛi na ta yakpe i heini numu gbi ii na aa ngi mahugbe, i lii valanga Ngewɔ ma, a ngi vɛli a folo kɛɛ kpindi kpɔma va.

⁶Kɛɛ ponyahɛi na a lewe lekee nɛnɛɛ wooma, i welanga a haala, kia bɛɛ ngi vulungɔ.

⁷Ndahii jisia ve ti wɛ kɔɔ numu gbi aa nyamu lɔ ti hu.

⁸Kɛɛ numui na ɛɛ ngi bondɛisia makɛ kakayee ngi lenyɔuisia, i mawalinga ngi lalei ma a Ngewɔ tawao kɛ i nyamuni nasia ma tii lani gbi a Ngewɔ.

⁹Baa ponyahangɛisia ti jikei mato a ponyaha gbi kɛlee ngi voo i lewe foo numu sawa gbɔyɔngɔ ma. I baa na ma, i hini yakpe lɔ wɔɔ jɔnga,

¹⁰tawao tɔwɔ yekpe i yɛ ngi ma hinda yekpengaa wieva, a yɛ a nyahɛi na lɔ i ngi leengeisia makɛni pandaa, a hotangaa lama gbatɛ ngi yeepɛlɛbu, a ngenge mayeingɔngaa wie ngi mbaa Kristimableisia va, a gbɔ nungei nasia ma kpundɛ a gula ti ma, i ta yekpe vengɔ kpekpeya wiela laasi gbi wɛ.

¹¹Kɛɛ baa ponyahɛi yeefoningeisia ti lɛisia wu ponyahangɛisia ti la-gɔlɛi hu; gbamaile hini-mani i ti lɔnga ta wounvelɔ Kristi ma,

¹²kɛ ti Lahei yeehaalayei na nyaninga ti mbumbuni wɔɔ ngi gama.

¹³Ta gbɔma ti watii nyaanilɔ ta lewetewe nga, ta gbua pɛlei yeeji bu ta wuaa na bu; kɛɛ na nyamungɔ tewengɔ na ma ta mia a ji ta wote a njɛpɛ-a-ngieblaa tawao ta loko wili mbaa ti hindeisia hu, ta yɛpɛ a hindangaa maa ii houni ti yɛpɛ la.

¹⁴A fisalɔ nya wɛ ponyahɛi yeefoningeisia ti hini jɔɔ, ti ndeengaa le, ti ti wɛlɛbu hindeisia hugbatɛ, kɔɔ mu juwuisia taa sabu gbi jɔɔ mu nyamu leva.

¹⁵Ajifa ponyahangɛisia lɛɛngaa ti welanga bɛɛ a wounvela ti hitɛnga Seitana wooma.

¹⁶Kɛɛ Kristimableisia yeeponyahangaa ti yaa nyaha gbi ngi lei hu, mahoungɔ i ti mahindei wumbu, aa yeekahɛi na lukpe sɔsiblɛisia wumba, kɔɔ ponyahangɛi nasia tia lekee ti heini ti mahindei i yɛ ti ma.

¹⁷Kpakoloi nasia ta tokulɔ yengei wie pandaa, mahoungɔ yeengila gbi i numu fele pawa jɔɔ, kakayee nasia ta yenge kpayangɔ Ngewɔ yiɛi leva kɛɛ nungaa gaava.

¹⁸ Ajifa Ngewɔ Gɔlɛi yɛ, “Baa nika-hinɛi layili ji ba pie a yɛ mbei yangama”; yɛ gbɔma, “Mahoungɔ ngengemɔi i ngi pawɛi majɔɔ.”

¹⁹ Baa wolo mayiagɛ gbi ma ta kpakolo mayia gɛ la, kɛlee seli fele ɔɔ sawa ta seli pɛiŋ kɛ i yeehindei na wieilɔ.

²⁰Nasia gbi ta jumbu hindeisia wie, jɔlɛ ti ma a kpaya kɔɔ yeemɔniisia ti luwa.

²¹Nyaa vulii ndema bi ma Ngewɔ gulɔ kɛɛ Yesu Kristi kɛɛ Ngewɔ malikeisia ngɛɛ bi hindei jisia wie ngi ndema bi ma, baa hinda gbi wie gba bi liimamɔ wɛ, ɔɔ ba pie gba numui na wɛ bi liimamɔ ii le.

²²Bi maa aa gbɛli loko lava numu gbi ma ngi veva Ngewɔ yengei wɛ. Baa gbɛɛ nungaa wekɛisia ma ti jumbu hindeisia hu; loo sɛwɛsɛwɛya hu Ngewɔ yaama.

²³Baa yaa nja lekee gbɔle; yɛ a ndɔ wulo gbɔle aako mɛhɛɛ i yɛ a vuka bi goohu jifa ba heegbɛ pɛɛpɛ.

²⁴Nungaa lɛɛnga ti jumbuisia ti lailɔ kɛ, tawao ta maleilɔ ti gulɔ kpɛmbo voloi ma; kɛɛ nungaa wekɛisia ti jumbuisia numu ɛɛ humbu a tɔ kɛlee hu a lɛmbi kulo.

²⁵Hii lɔɔ numu wiehinda yekpeisia ti laani ke tawao yeenasia vulii numu ɛɛ tɔ gbalauŋ tɛɛ gu a lɔwula.