Read Ngowili Yekpei Numu Kpɛlɛɛ Va 2 TIMOTI 3 Bible Online

2 TIMOTI 3 - Ngowili Yekpei Numu Kpɛlɛɛ Va bible

2 TIMOTI 3

¹I yɛ bi nɛmahu, hinda gbangɔngaa ta yɛlɔ na kɛlɛma voleisia ma.

²Nunga ta lolɔ kpekpeyei gbi i lɛ tia yekpe lekee ma, ti haamingɔ a yɛla hulewengɔ hanii gbi va, ti yongangɔ, ti hinda i tia yekpe yaama houngɔ; ta yɛlɔ a ngɛli-ngɛlii wili, tɛɛ golo ti leblɛisia wɛ, tɛɛ sabu gɔɔ, ti gbewe ɛɛ yɛ Ngewɔ hinda hu;

³tɛɛ hindawanda wie, tɛɛ manu numu ma, ti yafangɔ a yɛla, ta ndapi-ndapi gula, ti vulangɔ; ta lololɔ a hinda yekpei;

⁴ta yɛlɔ a baayablaa, tɛɛ gili pɛiŋ taa yɛ a hinda wie, tawao ti mamaningɔ; ta lolɔ a nɛnɛɛ hindei i lewe Ngewɔ ma;

⁵ta hindeisia wielɔ aako nungaa ti tɔ kɛ mu Yewɔ-hindei mia ti piema, kɛɛ ti gbelengɔ a yɛla kpayei na ma i mu Yewɔ-hindei hu. Joowi nungei jisia nyɔkɔ ma.

⁶Ti lɛɛnga ta lilɔ nungaa ti wɛleisia bu, ti gu nyahangɛi nasia ma tɛɛ gu a tia yekpe huhoula tawao jumbu gahɛi i ti gotongɔ ta hinda nyamu laasi gbi wie mani a ti lɔ pieva;

⁷nyahangɛi nasia ti lapima tuuŋ tɔnyɛi gaava kɛɛ tɛɛ gu a kɔɔla fɔ.

⁸ Kia lɔɔ Janis taa Jambris ti Mojisi houni a mawali, hii nungei jisia ta tɔnyɛi hou a mawali nungaa lɔ a tie ti nɛmahui ɛɛ yenge tawao ti lala a Ngewɔ ii lɔnyani.

⁹Kɛɛ tɛɛ li kuhama ajifa numui gbi ta ti gbowayii lɔlɔ, kia lɔɔ i Janis taa Jambris wieni.

¹⁰Kɛɛ bi jianga a kaai na ngi bi gaani la kɛɛ nya luvayii kɛɛ na i nya lii hu pieva ndɛvui ji hu; bi liiheinga nya layii ma a Ngewɔ, kɛɛ nya liilɛliyii hinda ma kɛɛ ndomɛi na nya hu, kɛɛ nya guyii hinda gbɔugbɔu bu,

¹¹ kɛɛ juwuyei ti yɛ hitɛ la nya wooma, kɛɛ kpalɛi nasia ti lani nya ma. Bi na kpɛlɛɛ lɔilɔ i nya wieni Antiɔk, kɛɛ Aikoniɔm, kɛɛ Listra, juwuya hindei nasia ngi guni mbu; kɛɛ Ndemɔi i nya gbuɛilɔ kpɛlɛɛ hu.

¹²Numu gbi lekee ngi longɔ i luva kia Ngewɔ longɔ la, tia Yesu Kristi ti wilingɔ hu, nungaa ta juwuya hitɛlɔ ngi wooma;

¹³tawao numu nyamuisia kɛɛ nasia ta kasoo gula nungaa ma, ti nyamuyii maa a yɛlɔ a to, ta nungaa wekɛisia wɛlɛ, tia vulii nungaa ta ti wɛlɛ.

¹⁴Kɛɛ bia, baa gbe tɔnyɛi nasia ma ngi bi gaani la tawao bi langɔ la kpaukpaungɔ. Bi kɔɔlɔ yeeni lɔ ti bi gaani,

¹⁵tawao taa bi nɛmahu kɛ i hiye bi lopongɔi hu ma, bi Ngewɔ Gɔlɛi gɔnga, na a bi gɔ a nɛmahulewei na a wa a mbawoyei, a ji numu ba la a Yesu Kristi.

¹⁶Ngewɔ Gɔlɛi kpɛlɛɛ Ngewɔ lɔ i puni nungaa lii hu ti nyɛini tawao kpekpengɔe nungaa gaava a tɔnyɛi, kɛɛ pieva nungaa ti kpulangei nasia gɔɔ ti piema, kɛɛ pieva nungaa ti gbe a hindei nasia wiela ii wɔnani, kɛɛ nungaa gaava a jiala a pelei na a nɛɛ Ngewɔ wɛ,

¹⁷aako numui na a yenge Ngewɔ wɛ mahoungɔ ngi gaangɔ i yɛla tawao ngi magbatɛngɔ hinda yekpe yeelasii gbi wieva.