Read Ngowili Yekpei Numu Kpɛlɛɛ Va TAITƆS 1 Bible Online

TAITƆS 1 - Ngowili Yekpei Numu Kpɛlɛɛ Va bible

TAITƆS 1

¹Nya Pɔɔl, Ngewɔ yengemɔ a nge kɛɛ tomɔ Yesu Kristi va, nya mia ngi kɔlɛi ji nyɛinga. Ngewɔ mia i loko loni nya ma i nya yoyo ngi nungei nasia gama i ti wɔyɔni kɔɔ ngi gbɔ ti ma ti la vulii a ngie, ngi tɔnyɛi na gɛ a tie mu Yewɔ-hindei i mu gaani la,

²na i pienga mu langa la kɛ ma kunafɔ lɛɛvui majɔɔlɔ. Ngewɔ ɛɛ ndɛɛ guala, tawao tamia i Lahei wumbuni pɛiŋ wɔɔ dunyei i yaa lɔɔto yɛ a yeendɛvui ji velɔ mu wɛ,

³tawao ji yeewatii vulii i hitini sɔ, i yeendɛvui magɛilɔ ngi wowili hu. I yeengowili ji loko wuaailɔ nya yeya tawao nyaa ndema leiŋ kia mu Bawomɔi Ngewɔ i ndeni yɛ ngi pie la.

⁴ Ngi kɔlɛi ji nyɛinga Taitɔs lɔ gaama na i wotenga a nya hindoloi vulii jifa mua ta mu langɔ a Ngewɔ. Mu Kɛkɛ Ngewɔ taa mu Bawomɔi Yesu Kristi ti ngauwanda ve bi wɛ kɛɛ ndiilɛli.

⁵Ngi bi loilɔ wooma Kliti tii hu kɔɔ bi hindei nasia hugbatɛ kungɔ ti wie kɛɛ mu loko ii foni ma, kɛɛ kɔɔ bi Kristimableisia ti gbakoleisia hei taa gbi hu. Baa lema fɛimɛi nasia ma ngi pieni bi ma,

⁶ maa ii houni nyamu gbi i yɛ kpakolo hu; nyaha yakpe mia a yɛ ngi yeya, tawao mahoungɔ ngi leengeisia ti yɛ a Kristimablaa, ti langangɔ aa yɛla kɛɛ ji tɛɛ numu gbi laayia mɛni.

⁷Jifa Kristimablaa ti lokulɔ gbi i looni Ngewɔ yengei lɔ gulɔ, maa ii houni nyamu yakpe bɛɛ i yɛ ngi hu. Maa ii houni i yɛ a mamanimɔ ɔɔ ndiimavulamɔ, ɔɔ ndɔhoumɔ, ɔɔ ndapi-ndapimɔ, ɔɔ navoo haamimɔ.

⁸Mahoungɔe i yɛ a gbekpe a hotangɛisia, ngi longɔ a hinda gbi lekee kpekpengɔ. Mahoungɔe i gu ngi lii ma, ngi wɔnangɔ, a Ngewɔ liima hindei wie, tawao ngi makɛngɔ.

⁹Mahoungɔe i hɛlɛ kpaukpau a ngowili lɔnyangɔi na numu a gu a liivala ma tawao tia kaai na mu kɛma ti woo i yakpe. Ji lɔ a wie i gu a piela nungaa wekɛisia ti lii i wu yeekaa lɔnyangɔi ji hu, i yama i pɔɔnɛi na gɛ a nasia ta hou a mawali.

¹⁰Gbamaile numu gboto lɔ na kakayee nasia ta nde tɛ ti nasia Juublaa yaa tie hei biliya, ta ganga a kaa wɔnangɔi ta nungaa wekɛisia wɛlɛ a ti wuhuba yɛpɛisia.

¹¹Mahoungɔe bi pie ti gbe yeenjɛpɛi nasia ma, ajifa tiaa mbonda gbuhangaa luahu nyanima a kaai nasia maa ii houni ti kɛ, tawao ti yeengufebaa hindei ji wiemaa aako lekee ti navoei majɔɔ.

¹²Klitimɔ vulii yɛla wɔɔ, ti Yewɔ lutuisia yeengila, i ndeni yɛ, “Ndɛɛ gulabla lɔ a Klitiblɛisia kɛɛ fuuhani wienyɔungɔngaa kɛɛ ndiiblaa hawangɔngaa.”

¹³Tawao na i ndeni na lɔnyangɔi na vamia mahoungɔ bi yɛ a gbandɛ ti laa aako ti lanaya yekpe majɔɔ;

¹⁴taa gbɔma hɛlɛ a Juu dɔmingaa kɛɛ nuuvungaa ti jawei nasia ta gbua nungei nasia gama ta gbele tɔnyɛi ma.

¹⁵Hani gbi sɛwɛsɛwɛngɔe nasia wɛ tia vulii ti sɛwɛsɛwɛngɔ; kɛɛ hani gbi ii sɛwɛsɛwɛni nasia wɛ ti nɔhɔngɔ Ngewɔ yaama tawao tii lani a Ngewɔ, ajifa Seitana i ti nɛmahuisia nɔhɔnga kɛɛ ti nɛmahugiliyeisia.

¹⁶Ta ndelɔ nungaa ma tɛɛ ti Ngewɔ gɔɔlɔ, kɛɛ ti wiehindeisia ta ndɛɛ lolɔ ti ma. Ti liima nyamungɔe wa, tɛɛ woolo numu gbi laayia ma, tɛɛ gu a hinda yekpe gbi wiela.