Read Ngowili Yekpei Numu Kpɛlɛɛ Va TAITƆS 2 Bible Online

TAITƆS 2 - Ngowili Yekpei Numu Kpɛlɛɛ Va bible

TAITƆS 2

¹Kɛɛ mahoungɔe bi yɛ a nungaa gaa a kaai na pɔɔnangɔ.

²Yɛ a hindo gbakoloisia gaa bɛɛ ti sɔbɛ hou, ti nɛmahu lewengɔ i yɛla, ti gu ti lii ma; ti layii a Ngewɔ gbekpengɔ i yɛla, kɛɛ ndoma i yɛ ti liihu, kɛɛ ti guyii hinda gbɔugbɔu bu.

³Hii lɔɔ mahoungɔ bi yɛ a nyaha gbakoloisia gaa ti yɛ a luva kia nyahangɛi nasia na Ngewɔ woo a tie. Tɛɛ yɛ a njafablaa, ɔɔ ndɔi luwɔngaa. Mahoungɔe ti yɛ a nungaa gaa a na kpekpengɔ,

⁴aako ti nyaha voningeisia makɛ lova a ti hiningɛisia kɛɛ ti leengeisia,

⁵ti gu ti lii ma, ti wiehindei i yɛ sɛwɛ, ti yɛ a ti wɛlɛbu yengeisia wie pandawanda, ti golongɔ ti hiningɛisia wɛ, aako numu gbi aa nde yɛ ngowili na a gbua Ngewɔ gama nyamungɔe.

⁶Hii lɔɔ mahoungɔ bi yɛ a nɔɔ kɔɔngɛisia ma ti gu ti lii ma.

⁷Hinda gbi hu bi luvayii i nyande pookɔɔva. Mahoungɔ bi yɛ a kɛ a nungaa kɛ bi langɔe vulii a kaai na ba ti gaa la tawao kɛ sali-hinda ii le.

⁸Yɛ a nɛmaulewe yɛpɛngaa le, na numu ɛɛ gu a magbuala, aako bi yɛ a mu juwuisia yawufe a ji njia nyamu gbi ɛɛ yɛ ti laa ndeva kɔlooni mu ma.

⁹Mahoungɔe nduwɔngeisia ti yɛ a ti luwɔkɛisia liima hindei wie hinda gbi hu. Maa ii houni taa tieni ti njɛpɛ maluve,

¹⁰ɔɔ ti hani gbi huma ti yeya. Kia taa na wie, mahoungɔe ti kɛ kɛ ti gbekpengɔe kpele gbi tawao ti lɔnyangɔ, aako ti wiehindei gbi i wa a tɔwɔ yekpe kaai na ma mu kɛma kɔloongɔ mu Bawomɔi Ngewɔ ma.

¹¹Ajifa Ngewɔ i ngi yauwandei magɛnga nuuvui kpɛlɛɛ ti bawova.

¹²Ngi yauwandei na lɔ mu laahima gbeva a luvala kia nungei nasia tii Ngewɔ gɔɔ kɛɛ toola hinda nyamui nasia wooma ti dunyei hu mu maningɔ ti ma, mu yɛ na mu gungɔ mu lii ma, mu wɔnangɔ, tawao ma luva dunyei ji hu kia nungei nasia ti Ngewɔ gɔɔngɔ ta pie,

¹³kia mu Folo lubangɔi na mawuloma mu lii i ma, watii na mu Yewɔ wai kɛɛ mu Bawomɔi Yesu Kristi wɔlɔyɛi a wa.

¹⁴ I ta yekpe veilɔ a mu jɔngɔ, kɔɔ i mu wumawo hinda nyamu wiela gbi hu, i mu yɛ a nungaa sɛwɛsɛwɛ ta yakpe ngi woo a mue tawao mu magbɛlingɔ hinda yekpe wieva.

¹⁵Yɛ a nungaa gaa a hindei jisia ba ti liinɛpɔ tawao ba ndigba a bi gbaaya lavengɔi. Baa luma taa lɛɛ bi hu.