Read Ngowili Yekpei Numu Kpɛlɛɛ Va TAITƆS 3 Bible Online

TAITƆS 3 - Ngowili Yekpei Numu Kpɛlɛɛ Va bible

TAITƆS 3

¹Hitɛ bi nungeisia wɛ bɛɛ ti wuaa ti mahangeisia bu kɛɛ ti mahublɛisia, tawao ti yɛ a golo ti wɛ, ti magbatɛngɔ hinda yekpe wieva a pele gbi.

²Nde ti ma taa njɛpɛ nyamu le numu gbi va, tawao taa loko wili njianjia hu, i yɛla tawao ti ndiamɔya gɛ a numui gbi, ti yagɔlɛngɔ numui gbi gama.

³Gbamaile mua vulii mu baabangɔ yɛla wɔɔ, mu vɛlingɔ, muɛɛ pɔɔna hinda wie. Mu mua yekpe wuaailɔ mu liima hindeisia yeenduwɔya hu kɛɛ nɛnɛɛ hindei yeelasii gbi. Mu yɛlɔ tuuŋ a ndiimanyamui kɛɛ toloma wie a nungaa, tawao nungaa wekɛisia ti loleilɔ a mue, mua bɛɛ mu lolo a tie.

⁴Kɛɛ watii na mu Bawomɔi Ngewɔ hindawandei kɛɛ ngi lomɛi i gɛni a mue,

⁵i mu bawoilɔ. Ii wieni bɛɛ hinda yekpengaa gbi vamia mua yekpe mu pienga, kɛɛ jifa i manuni mu ma famia i mu bawoni a ngi Yafei loko, ngi Yafei na a mu le a nina i mu gɔ a ndɛvu nina a ji a mu jumbui gbi wua mu ma.

⁶Ngewɔ i ngi Yafei yeilɔ mu ma ndalewengɔ ma, mu Bawomɔi Yesu Kristi sabui hu,

⁷aako ngauwandei na i kɛni a mue i mua Ngewɔ-ni luahu gbatɛ mu kunafɔ lɛɛvui na majɔɔ mu lii i ma majɔɔva.

⁸Tɔnya yia lɔ a ji. Nya longɔ bi laa liigba vulii hindei jisia ma, aako nasia ti langɔ a Ngewɔ i gbewe ti ma ti wote hinda yekpengaa wiela leenga; nasia ti gbekpengɔ tawao ta kpewe gbua numui gbi ma.

⁹Kɛɛ waa loko wili nguhubaa laablangaa hu, ndebla woveisia ti laa gbawalɛi, njianjiɛisia kɛɛ ndapiisia kɔlooni Sawei ma. Na kpɛlɛɛ ii gbekpeni tawao nafa gbi ii hu.

¹⁰Numui na a wa a nduahugɔlɛisia, ngi laahii heima yila ɔɔ fele, na wooma gbɛ-o-gbɛ aa yɛ wuata luahu.

¹¹Ba kɔɔlɔ kɛ numui na ii wɔnani tawao jumbui ngi lavengɔi, ngi wiehindeisia lɔ ta ngi lɛɛ.

¹²Nyaa Atɛmas ɔɔ Taikikɔsi looma bi gama, yeengila gbi fongaa, lapi a bi sɛmbɛi gbi bi wa nya gama Nikopolisi, ajifa ngi hugbatɛnga kɔlɛ watii leweva na.

¹³ Lapi a bi sɛmbɛi gbi gbɔva lɔyɛi Sinas ma taa Apɔlɔs ti ti jɛsie lɔɔto, bi tɔ ti hanii gbi majɔɔ ta gbewe fa.

¹⁴Mahoungɔe mu nungeisia ti namakɔli a kɛlaa a ti magbewe hinda yekpe wieva, aako ti gu hanii nasia ma ta haami gbua nungaa ma, taa hei lekee gbama tɛɛ kpewe gbi gbua.

¹⁵Nasia kpɛlɛɛ ti mbei nya gama tɛɛ ta va kaka wu ma. A mu vama yia le mu ndiamɔi nasia ma mua tieni mu langɔ a Ngewɔ. Ngewɔ i ngauwanda ve wu kpɛlɛɛ wɛ.