Read Ngowili Yekpei Numu Kpɛlɛɛ Va HIBUBLƐISIA 10 Bible Online

HIBUBLƐISIA 10 - Ngowili Yekpei Numu Kpɛlɛɛ Va bible

HIBUBLƐISIA 10

¹Juubleisia ti jawei ii gbuani waa vuli a hinda yekpei nasia ti wama wama; ti yɛni lekee a yeenɛnɛ magbindingɔ lɔ. Saa nasia saweisia ti kɛni, Saagbuablɛisia lɔ kunafɔ ti gbuama foo gbi. Sawei nasia ta saasia gbuayii hugɛ, ta yee gu ti jumbui gbua nungei nasia ma ta wa Ngewɔ gaama?

²Ina nungei nasia ta hɛɛ Ngewɔ ma ti jumbuisia gbuangɔi vulii ti ma, ti lii i yɛ yaa mɔnɛ jumbui nasia va ti pienga tawao saa gbualei aa gɛlɛlɔ.

³Kia hindei yɛyii i na kiahuna, saasia lɔ ta nungaa ti jumbuisia hitɛ ti nɛmahu foo gbi.

⁴Ajifa nika-hinangaa ti ŋama kɛɛ njengaa ti ŋama ɛɛ gu fɔ a jumbu gbuala numu ma.

⁵Na vamia ji Kristi i yɛ wama dunyei hu, i ndeilɔ Ngewɔ ma yɛ, “Bii gbeweni saa gbuala va kɛɛ saahaningaa kɛɛ bi nya gbuhɛi gbatɛnga.

⁶Tohani nasia ta ti gbuhɛi mɔ saagbuamɛi ɛɛ bi lii lɛli ɔɔ saasia jumbuisia wuava nungaa ma.

⁷ Kɛ ngi ndenga ngɛɛ, ‘Nya gbe bi liimɛi wieva, Oo Ngewɔ, kia lɔɔ nyɛingɔ la sawa gɔlɛi hu kɔloongɔ nya ma.’ ”

⁸Haalɛi hu i ndeilɔ yɛ, “Bii gbeweni tawao bi goohu ɛɛ nɛɛ saa gbuangɔngaa va ɔɔ saahaningaa ɔɔ tohani nasia ta mɔ saagbuamɛi kɛɛ saasia jumbuisia wuava nungaa ma.” I ji leilɔ kia bɛɛ ta saa jisia kpɛlɛɛ gbua a pelei na lɔ Sawei kɛni.

⁹Na wooma kɛ i ndenga yɛ, “Nya gbe, Oo Ngewɔ, bi liimɛi wieva.” Faale Ngewɔ lɔ ndema yɛ kpaya gbi ii yaa sawa woveisia kpɛlɛɛ hu, i Kristi jaa gbuangɔi wunga yeepomɛi.

¹⁰Ajifa Yesu Kristi i na wieni Ngewɔ longɔ i pie, saa yakpei na i kpuani kunafɔ va a ngi gbuhɛi vulii i pienga jumbui i wuanga gbɛlɛŋ mu ma.

¹¹ Juu Jaagbuamɔ gbi a ngi yengei wielɔ folo gbi tawao a saa laasi yilei gbualɔ wɔɔ heima gboto; kɛɛ yeesaa jisia tɛɛ gu kunafɔ taa jumbu gbua numu ma.

¹²Na hu gbi Kristi i saa yakpe lɔ gbuani jumbuisia va, tawao yeesaa na laahoungɔe kunafɔ va, na wooma i heiilɔ Ngewɔ yejahui.

¹³Taa na mawuloma na haaŋ Ngewɔ i ngi juwuisia wuaa ngi gɔwɔbu i gɔwɔ lo ti ma.

¹⁴Saa yakpei Kristi i ta yekpe gbuani la i jumbui gbuanga kunafɔ nasia ma Ngewɔ i ti yɛnga a ngi woo.

¹⁵Tawao Ngewɔ Yafei bɛɛ i seli wuanga mu gama. Haalɛi hu i ndeilɔ yɛ,

¹⁶ “Ji lɔ hinda le mua tieni ma ngangili kulɔmɛi, hii Ndemɔi i ndenga yɛ: Nga nya jaweisia wulɔ kpaŋ ti liisia hu ngi ti nyɛi ti nɛmahuisia.”

¹⁷Kɛ i ndenga yɛ, “Ti jumbuisia kɛɛ ti hinda nyamuisia tɛɛ yaa hitɛ nya wɛ kunafɔ.”

¹⁸Faale Ngewɔ i manunga ti jumbuisia ma kɛɛ ti hinda nyamuisia, sabu gbi ɛɛ yɛ na saa gbuava jumbungaa gbuava nungaa ma.

¹⁹Faale, nya Kristimableisia, hei na Yesu i pieni i mu liigbanga wuava, Lomu Magayemangɔ Wai na hu Ngewɔ i yɛ wɔɔ na.

²⁰Kristi i ngi gbuhɛi gbuailɔ a saa aako i pele nina la nungaa ta ndɛvu nina majɔɔ la. Ngi gbuhɛi wiengɔe kia kula kpɔtukpɔtui na i yɛ na i yɛ hɛlɛni Ngewɔ Wɛlei bu a Ngewɔ yɛmɛi maalɔɔwu.

²¹Saagbuamɔ waa lɔ mu yeya ngelegoohu wɛlei bu mia Ngewɔ gama.

²² Faale a mu lukpe Ngewɔ gbla a mu lii gbi mu liilo ngi ma, mu wa ngi gaama a ndii nasia Kristi i nguanga fo a njaa sɛwɛsɛwɛ.

²³Faale a mu lo kpaŋ, maa gbe kulo bɛɛ hani nasia ma Ngewɔ a fe mu wɛ, gbamaile ma gulɔ a liilola Ngewɔ ma jifa hinda gbi i Lahei wumbungaa pieva a pielɔ huɛɛŋ.

²⁴A mu gbewe mu nyɔunyɔu va, mu gbɔ mu nyɔunyɔu ma ndoma gɛva kɛɛ hinda yekpe wieva.

²⁵Maa gbe a yandɔla a lenga hinda yila, kia nungaa lɛɛngaa ti piema la. Kia maa na wie, a mu mu nyɔunyɔu lii gba i lewe yeengovei ma, jifa wuaa tɔma Ndemɔi wa-volei lukpenga kpla.

²⁶Saa gbi ii yaa na aa jumbu gbua numu ma ina mu liilɔ lekee a jumbu wie a kɛwɛ tɔnyɛi gɛngɔi wooma a mue.

²⁷Kia maa na wie, na lekee mahoungɔ mu pie ta lɔ a Kpɛmbo-Volo maluwangɔ wai mawulola nduwa hu, kɛɛ ngɔmbu yagbalɛngɔ wai na a nungei nasia gbi gewe ti gangangɔ a Ngewɔ.

²⁸Numu gbi lekee a sawei nasia nyani a kɛwɛ Ngewɔ i feni a Mojisi loko, seli fele ɔɔ sawa tɛɛ ti ngi lɔilɔ i pie, Kotii mahublɛisia ta pielɔ ti ngi waa, tɛɛ manu gbi ngi ma.

²⁹Gbɔɔ hɔɔ a numui na ii Ngewɔ Hindoloi lɔni a gbɛogbɛ? Yemia a numui na a Kristi haalɛi wumbu a baabaa-hinda, Kristi haalɛi na i pieni Ngewɔ i hinda nina yangili, i yama i yeenumui na vulii gbua jumbui yeenjiɛi hu, numui na a njia nyamu le ngauwanda Yafei ma? A gili lɛɛ a kpaalɛi ya wɔlɔyii i piema Ngewɔ a nda ngi ma!

³⁰Ajifa mu kɔɔlɔ kɛ Ngewɔ vulii lɔ i ndeni yɛ, “Gbema nya wɛ hunyɔu va, nga kpɛi gbualɔ;” tawao mu gbɔma kɔɔlɔ ye lɔ i ndeni yɛ, “Nga nya nungeisia gbɛmbolɔ.”

³¹Hinda maaluwangɔ waa le wuava Ngewɔ vulungɔi gbɛmboi bu.

³²A gili lɛɛ a na wɔɔ i yɛ wu wie ngovama. Watii na, ji wu lani a Ngowili Yekpei a nina, hinda yagbalɛngɔ gboto i lailɔ wu ma, kɛɛ na hu gbi wu yeendapii na gɔilɔ wuii gbahani.

³³Watii lɛɛngaa nungaa ti yɛlɔ a njia nyamungaa le wu ma faha hu, ta kpaalɛ la wu ma tawao watii lɛɛngaa wu yɛlɔ a gbɛɛ nasia ma a wu nyɛkɛ nungaa ti yɛ njia nyamungaa le ti ma, ta kpaalɛ la ti ma.

³⁴Wu yɛlɔ a gbɛɛ yeenasia ma ti yɛ kpindi-wɛlei bu kpaalɛɛngaa ta la wua tieni ma, tawao watii na ti wu yeya-hanisia kpɛlɛɛ houni wu yeya a kpaya, yeembɔnɛi na i guilɔ wu hu tawao ii wu goohunɛɛi nyanini, ajifa wu yɛ kɔɔlɔ kɛ hani lɔ lɛ wu yeya kpekpengɔ na kpɛlɛɛ ma, tawao a lo wu yeya kunafɔ.

³⁵Faale yeehinda gbangɔi jisia taa pie waa gbaha ajifa ndiiloi a walɔ a mawaa wa.

³⁶Mahoungɔ wu mawulo a ndiilo, aako wu Ngewɔ liima hindei wie, wu mawaa na majɔɔ i Lahei wumbuni feva wu wɛ.

³⁷Gbamaile Ngewɔ Gɔlɛi lɔ ndema yɛ, “I longa kulo te, numui na i wama a walɔ, ɛɛ lɛmbi hu;

³⁸Na hu gbi, nya nungaa wɔnangɔisia ta bawo lanaya wooma lɔ; kɛɛ ti yilayee gbi i yamangaa a wooma wee, ngi hinda ɛɛ nɛɛ nya wɛ.”

³⁹Kɛɛ muii yɛni a nungei nasia ta yama a wooma wee tawao ta jukulu. Mua mu langɔe a Ngewɔ tawao mu bawongɔe.