Read Ngowili Yekpei Numu Kpɛlɛɛ Va HIBUBLƐISIA 11 Bible Online

HIBUBLƐISIA 11 - Ngowili Yekpei Numu Kpɛlɛɛ Va bible

HIBUBLƐISIA 11

¹Lanaya mia a lala la kɛ hani nasia mu lii i ti ma tiaa na, kɛɛ lala vulii kɛ hanii nasia muɛɛ ti lɔ tiaa na.

²Jifa wɔwɔmablɛisia ti lani a Ngewɔ famia ti hinda i nɛni ngi wɛ.

³Jifa mu langɔ a Ngewɔ famia mu kɔɔnga gbalauŋ kɛ Ngewɔ laayiɛi lɔ i dunya wai ji gbatɛni la, aako na ma gu a tɔla i gbuani na hu lɔ numu ɛɛ gu a tɔla.

⁴ Ebɛl lava lɔ a Ngewɔ i saa gbuani Ngewɔ ma kpekpengɔ tewengɔ Ken ndɛi ma. Ngi lava a Ngewɔ, ngi hinda i nɛilɔ Ngewɔ wɛ i ngi wumbu a pɔɔnamɔ a ji i ngi jaa-hanisia guluni. Tawao Ebɛl lava a Ngewɔ, a yɛpɛlɔ tuuŋ mu gama kia bɛɛ ii ndɛvu hu.

⁵ Jifa Inɔk langɔ yɛla a Ngewɔ famia ii haani. Kia aa haa, Ngewɔ i ngi wumbuilɔ i lɛ a ngie, tawao numu gbi ii guni a ngi lɔla, ajifa Ngewɔ i lɛnga a ngie. Ngewɔ Gɔlɛi yɛ pɛiŋ Ngewɔ i yaa lɛ a Inɔk ngelegoohu, i pieilɔ ngi hinda i nɛɛ Ngewɔ wɛ.

⁶Numu gbi lekee ii lani a Ngewɔ ɛɛ gu aa ngi liima hinda wie, ajifa numu gbi lekee ngi longɔ i hɛɛ Ngewɔ ma, mahoungɔ i la la vulii kɛ Ngewɔ lɔ na tawao a kpekpe wielɔ a nungei nasia ta wa ngi gama.

⁷Jifa Noa langɔ yɛla a Ngewɔ famia i woloni ndahii na ma Ngewɔ feni ngi wɛ kɔlooni kulɔma hindei nasia ma ii yɛ gu a tɔla. I goloilɔ Ngewɔ laayiɛi bu, i nja-ya-lɛndɛ yila gbatɛ, taa ngi nyahɛi kɛɛ ti leengeisia ti bawo hu. Noa wiehindei ji i kɛilɔ kɛ dunyableisia ti nyamungɔe, tawao Ngewɔ i ndeilɔ yɛ pɔɔnamɔ lɔ a Noa jifa ngi langɔ a Ngewɔ.

⁸Jifa Ebraham langɔ yɛla a Ngewɔ, i goloilɔ Ngewɔ laayiɛi bu ji Ngewɔ i ndeni ngi ma yɛ i gbua ngi nda lɔlei hu i li ndɔlɔ weka hu i yɛ Lahei wumbuni feva ngi wɛ. Kia bɛɛ ii yɛ mia gɔɔ i lima na, i gbuailɔ ngi nda lɔlei hu, i li.

⁹Jifa ngi langɔ yɛla a Ngewɔ, i heilɔ kia hota ndɔlei na hu Ngewɔ i yɛ Lahei wumbuni feva ngi wɛ. Taa ngi mablɛisia ti yɛ yii kula-wɛleisia bu lɔ, kia ngi loi Aisaki taa ngi nda loi Jekɔpi ti pieni, jifa Ngewɔ i yeelahei yakpei na wumbuilɔ tia bɛɛ gaama.

¹⁰Gbamaile Ebraham lii i yɛlɔ ma heiva tɛi na hu Ngewɔ i humanga i tonga, tɛi na a yɛ na kunafɔ ɛɛ wolo.

¹¹Jifa Ebraham langɔ yɛla a Ngewɔ famia i guni a ndo lela kia bɛɛ ngi wovangɔ waa yɛla tawao Sera bɛɛ ngi lewengɔ ndole gbelei ma. I yɛ kɔɔlɔ kɛ Ngewɔ Lahei wumbungɔi hu ɛɛ nyani.

¹²Kia bɛɛ Ebraham haangɔ jɔngɔ yɛla, na hu gbi ndeengaa ti gbuailɔ ngi hu ti gbotongɔ kia tumbekeisia na ti ngelei ma, ti vahangɔ kia ŋanya gate ngilangilɛi nasia na ti ŋanyakpaa ma.

¹³Nungɛi jisia gbi ti loni lamaa a Ngewɔ ti haa. Tii hani nasia majɔɔni Ngewɔ i Lahei wumbuni fa, kɛɛ ti loilɔ kuhama ti tɔ ti goohunɛɛ ma, ta hugɛ a nungaa foofo hu kɛ hotangaa lɔ a tie dunyei ji hu.

¹⁴Nasia ta njɛpɛ bondɛi nasia le tiaa ndama leiŋ kɛ ti nda lɔlei mia ti kɔkɔlima.

¹⁵Tii lɛmbini gilima a ti lɔlei na ti gbuani hu; ina ti lɔlei yeemani i ti lɔilɔ, gbɛogbɛ ii yɛ aa ti huhou yamava na.

¹⁶Kɛɛ tɔnyɛi a ji lɔ kɛ ndɔlei na kpekpengɔ na mia yeemani i ti ma, ndɔɔlɔ weka gbi ii le kɛlee ngelegoohu. Faale na ii wufeni Ngewɔ wɛ ji ta ngi loli a ti Yewɔɛi, jifa i taa waa loonga ti wɛ.

¹⁷Jifa Ebraham langɔ yɛla a Ngewɔ famia i yɛ ngi hindoloi gbuama a saa, ji Ngewɔ i ngi hugɔɔni. Ebraham lɔ Ngewɔ i Lahei wumbuni ngi gama, na hu gbi ngi magbatɛngɔ yɛla ngi hindolo yakpei Aisaki gbuava a saa.

¹⁸Ngewɔ i yɛ ndeilɔ ngi ma yɛ, “Bi bɔɔsɔ vaha wai nasia ngi yeelahei wumbuni bi gaama, ba ti majɔɔ a Aisaki lɔ.”

¹⁹Ebraham i kɔɛilɔ nɛmahu kɛ Ngewɔ a gulɔ i Aisaki vulu i ngi wumbu hee hu tawao Ngewɔ i pieilɔ Aisaki i yama ngi ma bi tɔaa bɛɛ i gbuanga hee hu lɔ.

²⁰Jifa Aisaki langɔ yɛla a Ngewɔ famia i Lahei wumbuni yɛ a ngi leengeisia luba lɔ, Jekɔpi kɛɛ Isɔ.

²¹Jifa Jekɔpi langɔ yɛla a Ngewɔ famia i Josɛfi leengeisia lubani a ngilangila ji ngi haalɛi i loni te. Ngi valangɔ yɛla ngi likpɔi ma i hɛɛni Ngewɔ ma.

²²Jifa Josɛfi langɔ yɛla a Ngewɔ famia ji ngi haa-gbelei i loni te, i yɛpɛilɔ kɔlooni Isrɛelblɛisia ti gbualei ma Ijipt, i yama i hugɛ a nungeisia gbɔɔ mahoungɔ ti pie a ngi womɛi.

²³ Jifa Mojisi leblɛisia ti langɔ yɛla a Ngewɔ famia ti ngi lɔwuilɔ ngawu sawa va ngi lengɔi wooma. Ti tɔilɔ kɛ ndoi nyandengɔ waa le famia tii luwani a mahɛi jawei nyanila.

²⁴Jifa Mojisi langɔ yɛla a Ngewɔ famia kia i lakpani, ii yɛ luma numu aa ngi loli a mahɛi nyahaloi goohu hindoloi.

²⁵Ji wɔɔ a gbɛɛ Ngewɔ nungeisia ma kɔɔ kpaalɛ i la taa tieni ma, manɛngɔ yɛla ngi wɛ i lewe ji a goohunɛɛ jumbu ma watii hugutungɔ va.

²⁶I tɔilɔ kɛ ji mbɛnyani a numu maale Kristi va, nafa i hu i lewe polouŋ kpatɛi kpɛlɛɛ ma i Ijipt lɔlei hu, ajifa ngi lii i yɛ mawaa na lɔ ma i wama sɔɔma kulɔma.

²⁷Jifa Mojisi langɔ yɛla a Ngewɔ famia i gbuani Ijipt ii luwani ndiilewei na ma mahɛi i pieni; i gangailɔ a yamala, bi tɔa bɛɛ i Ngewɔ na lɔilɔ numu ɛɛ ngi lɔ.

²⁸Jifa ngi langɔ yɛla a Ngewɔ, i Tewema Gomɛi gbɔkuilɔ tawao i nde yɛ ti yeembala ŋamɛi jia ti wɛleisia lama aako Numu-waa malikei aa Isrɛelblɛisia ti gbla-lengeisia waa.

²⁹ Jifa Isrɛelblɛisia ti langɔ yɛla a Ngewɔ famia ti guni a jiala ndɔma bengɔi ma ti gbooyɛi na lewe ta toli a Rɛd Sii; kia Ijiptblɛisia ti hitɛni ti wooma, njɛi i yeilɔ a tie ti lo hu.

³⁰ Jifa Isrɛelblɛisia ti langɔ yɛla a Ngewɔ, i pieilɔ Jɛliko yeegɔlɔi i gula ji ti yɛ jia ta kaala heima yila folo ma njii wɔfla va.

³¹Jifa hitɛ-nyahɛi Rehab langɔ yɛla a Ngewɔ famia Isrɛlbleisia tii ngi waani taa nasia ti gangangɔ yɛla a Ngewɔ, ajifa i loko heiilɔ pandaa Isrɛlbleisia ti nɛnɛjiagablɛisia bu.

³²Ngi nungei jisia yeepekeisia gbi ti hinda hugɛ? Watii ii nya yeya ngaa gu Gidiɔn hinda hugɛva kɛɛ Berak kɛɛ Samisi kɛɛ Jɛfta kɛɛ Devidi kɛɛ Samuɛl kɛɛ Ngewɔ lutuisia.

³³Jifa ti langɔ yɛla a Ngewɔ, ti gɔilɔ a kɛnyɛ wekangaa ti ti vaya. Ti pɔɔna hindei lɔ wieni tawao ti na majɔɛilɔ Ngewɔ i Lahei wumbuni fa. Ti pieilɔ njalɛisia ti londo,

³⁴ti ngɔmbu maaluwangɔngaa lufe, ta bawo kɔbowei yeya. Kaahu gbi ii yɛ ti ma kɛɛ ti gbayailɔ; ti gbayangɔ yɛla kɔi hu tawao ti kɛnyɛblaa wekeisia ti gɔblɛisia vayɛilɔ.

³⁵Jifa nyahangaa lɛɛnga ti langɔ yɛla a Ngewɔ, ti lenyɔuisia ti yɛ hiyelɔ hee hu ta yama ti ma. Pekei nasia tii lumani taa gbe a laala a Ngewɔ aako ti gbe ti ma, ti ngagbalɛ haa wieilɔ aako ti hiye hee hu ndɛvu yekpe majɔɔva.

³⁶Nungaa ti yɛlɔ a ti lɛɛngaa gbafa, ta ti lewe, ta ti lɛɛngaa wu jɔɔwɔisia ya, ta li a tie kpindi-wɛlei bu.

³⁷Ti yɛlɔ a ti hɔwɔhɔwɔ a kɔtiisia ta haa, ta ti lewendia, ta ti waa a kɔbowei. Ti yɛlɔ a lewetewe mbala-kɔlɛisia ɔɔ nje-kɔlɛisia ti ti ma a kula, ti vɛlingɔ hulewengɔ, juwuya i ti ma, ta ndoli nyamunyamungaa wie a tie.

³⁸Ti gbekpengɔ waa yɛla na hii dunyei ji ii yɛ gbekpeni ti heiva hu. Ti yɛlɔ a lewetewenga ndɔgbɔlambɛisia ma kɛɛ ngiyeisia hu ta yii puisia hu kɛɛ ndoweisia ndɔwu.

³⁹Nungɛi jisia gbi ti hinda i nɛɛilɔ waa Ngewɔ wɛ ajifa ti lani a ngie; na hu gbi tii hani na majɔɔni Ngewɔ i yɛ Lahei wumbuni feva ti wɛ,

⁴⁰ajifa i yɛlɔ Ngewɔ nɛmahu hinda hugbatɛva mu va kpekpengɔ tewengɔ yeengovei ma. I yɛ ngi lii hu lɔ kɛ ɛɛ tia lekee wote a pɔɔnablaa mu wooma.