Read Ngowili Yekpei Numu Kpɛlɛɛ Va HIBUBLƐISIA 12 Bible Online

HIBUBLƐISIA 12 - Ngowili Yekpei Numu Kpɛlɛɛ Va bible

HIBUBLƐISIA 12

¹Mua bɛɛ, kia seli vaha wai nasia ti mu galangɔ, mahoungɔe mu loko gbua hinda gbi a mu gbaha hindei nasia ma mahoungɔ mu pie, kɛɛ jumbui na fɛɛfɛngɔ kpauŋ mu ma, mu mu lii huyili hindei wieva kia mahoungɔ mu pie ndɛvui yeena hu mu wama majɔɔma.

²A mu yɛ a gili tuuŋ a Yesu na i pienga mu langa a Ngewɔ i hiye watii na ma mu lani a ngie. I yɛ kɔɔlɔ kɛ na i wama piema dunya a pielɔ ti ngi waa krɔsii ma kɛɛ ii gbeni na va. Koohunɛɛ na Ngewɔ i yɛ wama fema ngi wɛ, ii krɔsi-ma-hee yeembɛnyanii lɔni a gbɛogbɛ, tawao taa na heini Ngewɔ maha-heimɛi yeengejahui.

³A gili lɛɛ a kpaalɛi na kpɛlɛɛ i lani ngi ma; a gili a kpaalɛi kinɛiŋ jumbublei nasia ti lolongɔ yɛla a ngie ti ndani ngi ma i guni mbu! Faale waa luma wu gahu aa gbɔyɔ wa gbe a lala a Ngewɔ.

⁴Ajifa magawoi ji hu wu wu magawoma la jumbui yeya, wuii yaa foni lɛ mia wa lo wu magawoma na ti wu waa.

⁵Wu lemanga numu liigba yɛpɛi nasia ma Ngewɔ a nde wu ma jifa ngi leengeisia a wue yɛ, “Nya loi, wolo Ndemɔi ma i bi lo pele ma, tawao bi lii aa lewe ji a lumbe bi laa.

⁶ Jifa numu gbi lekee Ndemɔi longɔ la a ngi loolɔ pele ma, tawao a numu gbi liima belɔ ji a ngi wumbu a ngi loi.”

⁷A gu kpaalɛi nasia bu ta la wu ma kia kpaalɛi na na kɛkɛi a nda ndoima ji a kpulanga wie; gbamaile wu gbalei a kɛlɔ kɛ Ngewɔ lɔ wu houma kia ngi leengaa. Ndo lɔ na wɔɔ na ngi kɛkɛ ii kpaalɛ lani ngi ma?

⁸Ngewɔ a kpaalɛ lalɔ ngi leengeisia kpɛlɛɛ ma ti loova pele ma, faale ii kpaalɛ lailɔ wu ma, na a kɛlɔ kɛ ngi leengaa vulii yaa a wue, kɛ pue-leengaa mia a wue.

⁹Mu kɛkɛ nasia ti mu leni dunyei hu, ti kpaalɛ lailɔ mu ma mu makɛva tawao mu wuaailɔ ti bu. Faale mahoungɔ waa le mu gu kpaalɛi na bu mu Kɛkɛ na i ngelegoohu a pie i la mu ma aako mu ndɛvu majɔɔ a ngie!

¹⁰Mu kɛkɛ nasia ti yɛ dunyei hu ti kpaalɛ lailɔ mu ma hinda hugutungɔ va kia pɔɔnangɔ yɛla ti yaama; kɛɛ Ngewɔ a kpaalɛ la mu ma mua yekpe mu gbekpeyɛi va lɔ, aako mu gbua a ngie.

¹¹Ngewɔ i kpaalɛ langaa mu ma, a wielɔ mu gama bɛɛ i pienga mu lii nyaniva lɔ, mu goohu nɛva ii le. Kɛɛ pooma, nasia yeekpalɛi na a pie ti makɛ ta mawaa majɔɔlɔ, ta mia a ji ta wote a pɔɔna wieblaa, ti ndiilɛlihu.

¹² Faale, a wu loko huhaangɔisia lɛ ngelema, wu wu wombii nasia hulata ti gbɛlima wu bu!

¹³A yɛ tuuŋ a jia a pele wɔnangaa kɔɔ wu gɔwɔ gbalɛngɔisia taa haa, ti bawo.

¹⁴A lapi wua numui gbi wu hei ndiilɛli hu, tawao a lapi wu luva kia numui na na ngi lɛɛvui vengɔ Ngewɔ wɛ, ajifa wuii na wieilɔ, wuɛɛ Ndemɔi lɔ.

¹⁵ A wu mahugbe waa wounve Ngewɔ yauwandei ma. Numu gbi aa wie kia tuhani ŋɔnangɔ, na a lakpa i numu gboto hubɔnɔ.

¹⁶ Numu gbi aa yɛ a puegbua kɛɛ numui na ii baagɔɔ hani nasia ma Ngewɔ woo le kia Isɔ i pieni, i ndewewayɛi majiɛilɔ mɛhɛɛ wulo hii va, i baa a poohani na kpɛlɛɛ i yɛ looni kulɔ.

¹⁷Wu hugɔɔlɔ kɛ na wooma ngi longɔ yɛla ngi kɛkɛ i hɛɛ ngi wɛ, hindei yangamava i pieni wɔɔ, kɛɛ ii guni a bɛla ma kia bɛɛ i yɛpɛni kaka a wɔɔ.

¹⁸Wuii wani kia Isrɛelblɛisia ti wani hani na gama wa gu a ngati gɔlaa ngiyei na ti yɛ toli a Sainai, ngɔmbu waa a vo ngumba, kpindi nilinili waa i heini ma kɛɛ ma yaa pumulu, viivii a wa na,

¹⁹bulii a vɛ na, Ngewɔ yɛpɛwoi a gbua na. Kia nungeisia ti Ngewɔ yiawoi mɛnini, ti manɛnɛ wuaailɔ tɛɛ Ngewɔ aa njɛpɛ yakpe bɛɛ le gbɔma ti ma,

²⁰ajifa tii yɛ gu sawei na bu Ngewɔ ndani yɛ, “Ndɔgbɔ-hua bɛɛ i gbitingaa ngiyei na ma, mahoungɔ ti lo hɔwɔhɔwɔma ti paa.”

²¹Hindei na i yɛ wie Sainai yiyei hu i nungaa huluwailɔ hulewengɔ kɛ Mojisi i ndenga yɛ, “Ngi luwanga nya maa lɔ gbɛlima.”

²²Wuii lini Sainai Yiyei gama, wu wanga Sayɔn Yiyei lɔ hu kɛɛ Ngewɔ vulungɔi laa wai, Jelusalɛm, na i ngelegoohu, taa ngi malika tauji gboto wai.

²³Wu wanga komɛi na hu lɔ Ngewɔ gblalengaa goohu nɛngɔisia ti pienga, nasia ti lɛisia nyɛingɔ ngelegoohu. Wu wanga Ngewɔ gama, na nuuvu gbi ti gbɛmbomɔi a ngie, tawao wu wanga numu yekpei nasia gama lɔ Ngewɔ i ti yɛni wɔɔ a pɔɔnablaa.

²⁴Wu wanga Yesu gama, na yɛni a sabu hinda yangilingɔ ninɛi hu i gbatɛni, tawao ngi ŋamɛi na i wuni i yɛnga a Lahei haningaa veva mu wɛ ti gbekpengɔ tewengɔ polouŋ na ma Ebɛl ŋamɛi a gu a fela.

²⁵Faale, a tɔ vulii wu wolo pandawanda numui na ma i yɛpɛma. Nasia ti gangani a wolola numui na ma i Ngewɔ wowili leni dunyei hu tii bawoni. I laailɔ ke kɛ muɛɛ bawo ina mu wounveilɔ numui na ma i ngelegoohu a yɛpɛ.

²⁶Ngewɔ woi i dunyei gbɛlilɔ a watii na, kɛɛ i Lahei wumbunga na yɛ, “Nga gbɔma dunyei jɛsialɔ kɛɛ ta lekee ɛɛ yɛla, taa ngelegoohu a yɛla.”

²⁷Ji i ndeni, “Yɛ gbɔma” a dunyei jɛsialɔ, i kɛ maa a mue leiŋ kɛ a ngi gbatɛhanisia jɛsialɔ i ti gule, aako hanii nasia tɛɛ jɛɛsia ti lo.

²⁸A mu siɛgbua Ngewɔ ma ajifa mua tieni ma yɛlɔ mahayɛi na hu ɛɛ jɛɛsia. A mu siɛgbua Ngewɔ ma mu hɛɛ ngi ma a pelei na a nɛɛ ngi wɛ, a baagɔma waa kɛ nduwahu,

²⁹ajifa mu Yewɔɛi gbuangɔ vuli a hinda hunyani yɔmbu lɔ.