Read Ngowili Yekpei Numu Kpɛlɛɛ Va HIBUBLƐISIA 2 Bible Online

HIBUBLƐISIA 2 - Ngowili Yekpei Numu Kpɛlɛɛ Va bible

HIBUBLƐISIA 2

¹Na vamia mahoungɔ mu tɔnyɛi nasia kpɛlɛɛ hou vulii kpaŋ mu mɛninga aako mu lii aa gbua na.

²Ngowili na malikeisia ti ndeni mu maadani ma i yɛlɔ a tɔnyɛi na mahoungɔ numu gbi i la la, tawao numu gbi lekee ii tooni pooma ɔɔ ii goloni yeetɔnyɛi na bu, kpalɛi na i lailɔ ngi ma mahoungɔ i la ngi ma.

³Ma yee na gu mu bawo ina muii woloni gbi mbawo wai ji ma Ngewɔ longɔ i mu bawo la? Ndemɔi yese vulii lɔ i mbawoi ji hinda hugɛni tawao nasia ti mɛnini ngi laa ti kɛilɔ gbalauŋ a mue kɛ tɔnya le.

⁴Yeewatii yakpei na, Ngewɔ i yɛlɔ a ti jeli wuaangɔi wooma nikpɔ mu gama a ji i yɛ kaabande hindei yeelasii gbi wie kɛɛ kanakoisia, kɛɛ ji i yɛ ngi Yafei wuaa nungaa hu kia i nɛni ngi wɛ pieva.

⁵Ngewɔ ii yaa malikeisia yɛni a maha dunya ninɛi na maahu i wama, dunyei na mu yɛpɛma kɔlooni ma.

⁶Kɛɛ kia nyɛingɔ la Ngewɔ Gɔlɛi yeehinda yila tɛɛ: “Nuuvu ii yɛni a gbɛogbɛ, kɛɛ ba gili a ngie; nuuvu gbaama, ba ngi mahugbe?

⁷Bi pieilɔ waati wulo va, ngi mahu i yei i gulo malikeisia ma; bi ngɔlɔya ve ngi wɛ kɛɛ mbɛlɛhei,

⁸ bi ngi yɛ a mahɛi hani gbi maahu.” Yeekɔlɛi i ndeilɔ yɛ Ngewɔ i nuuvu yɛlɔ a “Mahɛi hani gbi mahu;” i laailɔ ke kɛ hani gbi gbuangɔ ii le ma. Na hu gbi, muii yaa tɔma kiahuna kia hani kpɛlɛɛ taa yɛ nuuvu mahayɛi bu.

⁹Kɛɛ mua Yesu lɔma na Ngewɔ i pieni ngi mahu i yei i gulo malikeisia ma hinda hugutungɔ va, aako ndomɛi va Ngewɔ piengɔ a mue, i haa a numui kpɛlɛɛ jɔngɔ. Kɛɛ mua na ngi lɔma kia maha a ngie, ngɔlɔya i ngi ma kɛɛ baagɔma jifa i haa yagbalɛngɔi na wieni.

¹⁰Mbɛngɔe ma vulii kɛ Ngewɔ, na a hani gbi gbatɛ a pie ta ngi yengeisia wie, i pieni Yesu i tomɛi na majɔɔ ngi woo yɛla kɛ kpaalɛi na va i lani ngi ma, aako i pie numu gboto ti langɔ a ngie, Ngewɔ i ti gɔ ngi wɔlɔyɛi hu. Ajifa Yesu lɔ a loo kulɔ i pelei na gɛ a li a tie mia Ngewɔ a ti bawo na.

¹¹Ta lɔ a nungeisia ti jumbuisia lufe, kɛ ta kɛɛ nasia a ti jumbuisia lufe ti yɛnga Kɛkɛ yakpei ma. Na vamia Yesu ii wufeni a ti lolila a ngi ndewengeisia.

¹² I ndeilɔ Ngewɔ ma yɛ, “Nga hugɛlɔ a nya ndewengeisia gbɔɔ bi pienga; nga bi latolɔ ti gomɛi hu.”

¹³ I ndeilɔ gbɔma yɛ, “Nga liivalalɔ Ngewɔ ma.” Tawao i gbɔma ndeilɔ yɛ, “Nya gbe mbei mua ndeengɛi nasia Ngewɔ i ti venga nya wɛ.”

¹⁴Jifa ndeengɛisia, kia a ti loli la, ti yɛni a nuuvungaa lɔ nduwu i ti ma, tawao ŋamɛi ti hu, Yesu vulii i woteilɔ a nuuvu kia ti na. I ji wieilɔ aako hee na wooma i pieni, i Seitana jukulu, na hee yeekpayei ngi yeya,

¹⁵tawao kɔɔ i nungei nasia gbua ti yɛ nduwɔyahu, hee yeenduwama yeya ti lɛɛvuisia hu.

¹⁶Ajifa i laailɔ ke kɛ malikeisia ii le aa yɛ gbɔma ti ma. Kia na aa wie, Ngewɔ Gɔlɛi i ndeilɔ yɛ, “A gbɔ Ebraham bɔɔsɔɛisia lɔ ma.”

¹⁷Ji kɛilɔ kɛ mahoungɔ yɛla i wie kia ngi mbaa Kristimableisia ti na a pele gbi, aako i wote a ti Jaagbuablɛisia ti gulɔmɔ wai na ta gu a liilolaa ngi ma tawao a manu ti ma Ngewɔ yengei hu, aako Ngewɔ i maanu nungaa ti jumbuisia ma.

¹⁸Faale na a gulɔ a gbɔla nasia ma Seitana a ti gɔlɛ hinda nyamu wieva ajifa Seitana ta vulii bɛ gɔlɛilɔ, i ngi mɔnɛ.