Read Ngowili Yekpei Numu Kpɛlɛɛ Va HIBUBLƐISIA 3 Bible Online

HIBUBLƐISIA 3 - Ngowili Yekpei Numu Kpɛlɛɛ Va bible

HIBUBLƐISIA 3

¹Nya mbaa Kristimableisia, wua Ngewɔ i wua bɛɛ lolinga! A gili a Yesu, na Ngewɔ i ngi yoyoni yɛva a Saagbuablɛisia ti gulɔmɔ wai gbɔva mu ma hinda gbi hu kɔloongɔ na ma ma nde mu langɔ la.

² Ngewɔ na i ngi wumbuni yeengengei ji wieva, i guilɔ a liilola ngi ma, kia lɔɔ i liiloni Mojisi ma na va i pieni ji i gbɔni Ngewɔ nungeisia ma.

³Numui na a pɛlei lo nungaa ta mbɛlɛhei velɔ ngi wɛ i lewe pɛlei vulii ma. Hii lɔɔ mahoungɔ nungaa ti ngɔlɔya waa ve Yesu wɛ i lewe Mojisi ma.

⁴Tɔnya le kɛ pɛlɛ gbi numu lɔ a to, kɛɛ Ngewɔ lɔ i hani gbi gbatɛni.

⁵Ngewɔ i guilɔ a liilola Mojisi ma ngengei na va i pieni Ngewɔ nungeisia gbi wɛ, tawao i yɛpɛilɔ a hindei nasia Ngewɔ i wama ndema kulɔma.

⁶Kɛɛ Ngewɔ a liilolɔ Kristi ma ji Hindoloi na a ngie Ngewɔ nungeisia loko i ngi yeya. Mua lɔ Ngewɔ nungeisia a mue ina mu nɔɛilɔ liilola ngi ma kɛɛ lala la kɛ ma na majɔɔlɔ mu lii i ma kɛyila.

⁷Faale na, kia Ngewɔ Yafei ndeni Ngewɔ Gɔlɛi hu yɛ, “Wu Ngewɔ woi mɛningaa haa,

⁸waa ngoohugbɔnda wie kia wu maadani ti yɛ pie ji ti yɛ ganga a Ngewɔ, hii ti pieni ndɔgbɔ-lambɛi ma watii na ma ti yɛ ngi hugɔɔ.

⁹Namia wu maadani ti nya hugɔɔni na, kia bɛɛ ti na lɔni ngi pieni foo numu fele gbɔyɔngɔ goohu.

¹⁰Faale ngi liileweilɔ nungei nasia ma ngi nde ngɛɛ, ‘Ti gbelengɔe nya ma kpelema gbi, tawao tɛɛ luma taa nya jaweisia hou.’

¹¹ Ngi liileweilɔ, ngi Lahei wumbu ngɛɛ: ‘Tɛɛ wuaa kunafɔ ndɔlei na hu ngaa pie ti lɛɛvu na!’ ”

¹²Nya mbaa Kristimableisia, a wu mahugbe numu aa yɛ wu lia ngi nyamungɔ tawao ngi gangangɔ a Ngewɔ nahi a wounve Ngewɔ vulungɔi ma.

¹³Mahoungɔ wu yɛ a gbɔ wu nyɔunyɔu ma folo gbi, ina lekee ti ndenga tɛɛ “Haa” mia, aako jumbu aa wu yilayee bɛɛ wɛlɛ, wu woohu aa gbɔnda.

¹⁴Ajifa mu kpɛlɛɛ mua Kristi-ni mia mu yengema ina kia wɔɔ mu lani a ngie tɔto-gbelei, mu loilɔ lama hii a ngie i to mu lɛvui gɛlɛmɛi.

¹⁵ Ji lɔ Ngewɔ Gɔlɛi ndeni yɛ, “Wu Ngewɔ woi mɛningaa haa, waa ngoohugbɔnda wie kia wu maadani ti pieni ji ti gangani a Ngewɔ.”

¹⁶Nungaa yeengbɛnga lɔ ti Ngewɔ woi mɛnini, ti gangani a ngie? Tia mia a nungei nasia gbi Mojisi i gbuani a tie Ijipt lɔlei hu.

¹⁷Yeeni lɔ Ngewɔ i liileweni ti ma foo numu fele gbɔyɔngɔ va? Tia mia a nungei nasia ti jumbu hindei wieni, ti gula ti haa ndɔgbɔ lambɛi ma.

¹⁸ Ji Ngewɔ i Lahei wumbuni yɛ, “Tɛɛ wua kunafɔ ndɔlei na hu ngaa pie ti lɛɛvu na” yeeni lɔ i yɛ ti ma? Nasia ti gangani a ngie.

¹⁹Mu tɔnga na kɛ tii guni a fola yeendɔlei hu, ajifa ti gangɛilɔ a lala a Ngewɔ.