Read Ngowili Yekpei Numu Kpɛlɛɛ Va HIBUBLƐISIA 5 Bible Online

HIBUBLƐISIA 5 - Ngowili Yekpei Numu Kpɛlɛɛ Va bible

HIBUBLƐISIA 5

¹Ngewɔ a Saagbuablɛisia ti gulɔmɔ wai gbi wumbu ngi nda nungeisia lia lɔ, i loko lo ngi ma yengeva ngi wɛ a ti jɔngɔ, a saa gbua ti jumbuisia va.

²Jifa ta vulii a gbahalɔ a hinda gboto wiela mahoungɔ i pie, ɛɛ gu aa gbandi nasia ma tii hinda hugɔɔ, ta kpulanga wie.

³ Tawao jifa ta vulii a gbaha a hindei nasia wiela mahoungɔ i pie, mahoungɔe i saagbua nungeisia ti jumbuisia va kɛɛ ta vulii ngi ndɛisia.

⁴ Numu gbi ɛɛ gu aa ta yekpe yɛ a Saagbuamɔ Waa. Ngewɔ yakpe mia a loko lo numu ma yɛva a saagbuamɔ waa kia lɔɔ Ɛerɔn i yɛ na.

⁵ Hii lɔɔ i wieni a Kristi; ta ii le aa ta yekpe wote a Saagbuablɛisia ti gulɔmɔ wai. Kia na aa wie, Ngewɔ ndeilɔ ngi ma yɛ, “Nya Hindoloi lɔ a bie; folei ji mia ngi yɛnga a bi Kɛkɛ.”

⁶I ndeilɔ gbɔma ngi Gɔlɛi yeehinda weka yɛ, “Ba yɛlɔ a Saagbuamɔ kunafɔ, kia lɔɔ Mɛlkijidɛki i yɛni a Saagbuamɔ.”

⁷ Ji Yesu i yɛ ndɛvu hu dunyei ji hu, i yɛlɔ a Ngewɔ vɛli ngele ya, a wɔɔ Ngewɔ ma na a gu a piela nungaa tɛɛ ngi waa. Jifa ngi golongɔ yɛla Ngewɔ wɛ, Ngewɔ i ngi hɛɛwoi guluilɔ.

⁸Kɛɛ kia bɛɛ Ngewɔ Hindoloi mia wɔɔ a ngie, kpaalɛi nasia ti lani ngi ma ti ngi gaailɔ a golola Ngewɔ wɛ.

⁹Kia Yesu i kpɔyɔni a hindei gbi wiela Ngewɔ longɔ yɛla i pie, i woteilɔ a numui na a pie nungei nasia ta golo ngi wɛ ti mbawo majɔɔ kunafɔ va,

¹⁰tawao Ngewɔ i loko loilɔ ngi ma yɛva a Saagbuablɛisia ti gulɔmɔ wai kia lɔɔ Mɛlkijidɛki i yɛ na.

¹¹Njɛpɛ gboto lɔ mu laa ndeva kɔlooni Yesu yɛlɛi ma a Saagbuamɔ Waa, kɛɛ kpaukpaungɔe fasaiva wu ma, ajifa wu hulɛlɛngɔ hii a hinda yeembui gɔla.

¹²Watii gboto lɔ wɔɔ wu yeya woteva a kaamɔngaa, na hu gbi wu gbewengɔe numu va kiahuna bee i wu gaa a Ngewɔ laayiɛi yeetɔtoomɛi. Wuaa lɛ nyini gbolima kia hɔɔ waa ya a mɛhɛɛ kpaukpau mɛ.

¹³Numu gbi lekee i nyini gbɔlima lɛ, ndolaa mia a ngie tawao ii yaa guni a pɔɔna hinda luahu gɔla a hinda yakangɔ.

¹⁴Kɛɛ numu lakpangɔisia tia, ta gulɔ a mɛhɛɛ kpaukpau mɛla ajifa ti longa gaama ti gunga a hinda yekpe luahu gɔla kɛɛ hinda nyamu.