Read Ngowili Yekpei Numu Kpɛlɛɛ Va HIBUBLƐISIA 6 Bible Online

HIBUBLƐISIA 6 - Ngowili Yekpei Numu Kpɛlɛɛ Va bible

HIBUBLƐISIA 6

¹A mu li gulɔma, hɔɔ, mu kaa na wie mbɛngɔ numu lakpangɔngaa ma, mu lewe kaa yeehaalayei nasia ma mu pieni kɔloongɔ Kristi ma. Maa ii houni gbɔma mu yɛpɛ kɔlongɔ kaa yeehaalayei nasia ma wu pieni kɔlooni wounvela ma tuvei nasia ma ta pie numu yafei i haa kɛɛ ngi lalei a Ngewɔ;

²kɛɛ kaa na kɔloongɔ nguɛi ma kɛɛ loko wɛlɛla Kristimableisia wumba ti lubava; kɛɛ haablɛisia ti hiyelei hee hu kɛɛ kaa na kɔlooni kitii na ma Ngewɔ a tewe kpɛmbo-volei ma tawao yeekitii a lo ma kunafɔ.

³A mu li gulɔma! Tawao ma ji lɔ wie ina Ngewɔ lumɛilɔ mu wɛ.

⁴Gbamaile nasia ti langɔ wɔɔ a Kristi ti gbelengaa ti lalei ma a ngie, numu a yee gu i yama a tie ti wote gbɔma? Ti yɛ wɔɔ tɔnyɛi na gɔɔlɔ a gbua Ngewɔ gaama; ngelegoohu gbekpeyɛi kulo i foeilɔ ti ma tawao tia ti mbaangɛisia ti Ngewɔ Yafei majɔɛilɔ;

⁵ti yɛ kɔɔlɔ ti liisia hu kɛ njɛpɛi na Ngewɔ i ndenga kpekpengɔe tawao watii na Ngewɔ i wama mahayɛi mɛma ti yeekpayei ngi walɛi ngɔɔlɔ.

⁶Na hu gbi ti gbengaa lalei na ma ti yɛ piengɔ a Kristi, numu ɛɛ yaa gu i yama a tie ti gbɔma wote, ajifa tiaa Ngewɔ Hindoloi gbakpama krɔsii ma a nina, ta ngi yawufe fahii hu.

⁷Kpekpe mia Ngewɔ a pie a ndɔmɛi na njɛi a wua pɛɛpɛ i tɔgbɔ tuhani nasia ta gbekpe na ta nungei nasia nafa ti ti hini ti va.

⁸ Kɛɛ ina ngaali kɛɛ kpiti lekee lɔ i wɔpɔni na, nafa gbi ɛɛ gbuahu; Ngewɔ ɛɛ loto yeendɔmɛi na jonduma, tawao ngɔmbui a mɔlɔ fo.

⁹Kɛɛ mu yɛ bɛɛ ji lema, nya liima ndiamɔisia, mu langɔe a wue. Mu kɔɔlɔ kɛ wuaa looni pelei na ma a li mia Ngewɔ a wu bawo na.

¹⁰Ngewɔ ii gavani. Ɛɛ lema ngengei na ma wu pieni, ɔɔ ndomɛi na wu pieni a ngie kpɔmɛi na va wu pieni tawao wu piema tuuŋ wu mbaa Kristimableisia ma.

¹¹Na nya longɔ la waa, ta mia a ji wu yilayee gbi i yɛ a madihou na wie i piema wɔɔ haaŋ wu foo kpekpei na ma wu mawuloma.

¹²Ngii loni wu kɛwɛ hinda wie; nya longɔ wu wie kia nasia ti na ti langɔ a Kristi, ta mawulo wie a ndiilo, tawao na i pienga ti kpekpeyei na majɔɔnga Ngewɔ i Lahei wumbuni fa.

¹³Watii na Ngewɔ i Lahei wumbuni Ebraham gama, i jonduilɔ na wieva i Lahei wumbuni fa. Jifa ngi malema gbi ii yɛ na, i jonduni ta yekpe ngi biyɛi lɔ ma a ngi Lahei wumbu-gbelei.

¹⁴ I ndeilɔ yɛ, “Nyaa Lahei wumbuma bi gama kɛ nga bi lubalɔ, ngi pie bi ndo gboto majɔɔ kɛɛ taa-loo gboto.”

¹⁵Ebraham i liiloilɔ Ngewɔ ma i mawulo, famia i hani na majɔɔni Ngewɔ i Lahei wumbuni fa.

¹⁶Numu i yaa jonduma, a jondu mbiyɛ lɔ ma yeemamɔi lewengɔ ta vulii ma, tawao i jondungaa lekee kɛ njɛpɛi na i gbɔyɔnga.

¹⁷Ngewɔ longɔ yɛla nasia ti wama hani na majɔɔma i yɛ Lahei wumbuni fa ti kɔɔ gbalauŋ kɛ na gbi lekee Ngewɔ ndengaa yɛ a pielɔ, a pielɔ huɛɛŋ; famia i jonduni na wieva i Lahei wumbuni fa.

¹⁸Ngewɔ Lahei taa ngi jondii ti hu ɛɛ nyani tawao Ngewɔ ɛɛ gu aa ndɛɛ guala kɔloongɔ ti ma. Aako mua i mu gɔnga a ndɔwuma, mu ndiigba majɔɔ liilova ngi ma.

¹⁹ Liilomɛi ji lɔ mu wɛ tawao piengɔe kia nja-ya-lɛndɛisia ti lomɛi i na mu yafeisia ti mahugbe va, na yaa kpau, numu a liilo ma. A wuaalɔ pɛlei na bu i ngelegoohu i lewe kulɛi na ma i hɛlɛni na, i foo lomu magayemangɔ wai hu,

²⁰mia Yesu i ya wɔɔ na mu gulɔ, i wuaanga na a mu jɔngɔ. I wotenga a Saagbuablɛisia ti gulɔmɔ wai kunafɔ va, kia Mɛlkijidɛki i yɛ na.