Read Ngowili Yekpei Numu Kpɛlɛɛ Va HIBUBLƐISIA 9 Bible Online

HIBUBLƐISIA 9 - Ngowili Yekpei Numu Kpɛlɛɛ Va bible

HIBUBLƐISIA 9

¹Sawangaa ti yɛlɔ hinda yangilingɔi yeehaalayei hu kɔloongɔ Ngewɔ vɛlile ma kɛɛ gbɔma yee-Ngewɔ vɛli mi dunyei hu na nungaa ti kpatɛni.

² Ti kula-wɛlei loilɔ, yeelomui yeehaalayei i na numu gbi a wuaa na, ta toli a Lomu Magayemangɔi. Na mia lambo-lomɛi i yɛ na, kɛɛ tebii, kɛɛ bledii na ta kpua a saa Ngewɔ ma i wuni yeetebii ma.

³ Bi lewengaa wɔɔ kula hɛlɛngɔi yeefelei ma, kɛ bi fonga lomui na hu ta toli a Lomu Magayemangɔ Wai.

⁴ Namia wɔɔ saagbuamɛi na i yɛ na, kpatɛngɔ a kanigbɔlui, ta siminjii mɔ na kɛɛ Hinda Yangilingɔi Yeekaŋaa, kanigbɔlui jiangɔ ma gbi, kanigbɔlu bolei na “mana” i yɛ hu i yeekaŋaa hu kɛɛ Eerɔn likpɔi na wɔɔ i yɛ vale a ndawa gbua kɛɛ kɔtu waala felei nasia wɔɔ saweisia ti nyɛingɔ yɛla ma.

⁵Fuuhanisia ti yɛlɔ yeekaŋaa mahu kpakiisia ti ti ma, na a kɛ kɛ Ngewɔ hei na lɔ, ti gbakisia vombongɔ hindei na maahu Ngewɔ a manu na jumbuisia ma. Kɛɛ kiahuna ii le hindei gbi hu aa yɛ gɛma a njɛpɛ gboto.

⁶Hii mia hindei nasia ti hugbatɛngɔ yɛla. Saagbuablɛisia ta wuaalɔ lomui yeehaalayei hu folo gbi ti yengeisia wieva;

⁷ kɛ Saagbuablɛisia ti gulɔmɔ wai yakpe lɔ a wuaa lomui yeekohuyei hu, tawao a ji wie heima yakpe foo ma. A wuaalɔ wɔɔ na a tohani na ti kpuanga a saa lomui yeehaalayei hu, i kpua a saa Ngewɔ ma ta vulii va kɛɛ jumbui nasia nungeisia ta pie, na tɛɛ kɔɔ kɛ jumbu mia ti piema.

⁸Ngewɔ Yafei lɔ nungeisia gaama gbalauŋ a hugbatɛi jisia kpɛlɛɛ hu wee kɛ Lomui Yeemagayemangɔ Wai yeepelei ii yaa lawoni lɛ ina lekee lomu yeehaalayei lɔ lɛ looni.

⁹Ji kpɛlɛɛ i yɛni a hindei nasia ti wiema kiahuna yeetɔmaseli lɔ. Yeembui lɔ a ji kɛ saahaniisia kɛɛ tohani nasia nungaa ta kpua a saa ta fe Ngewɔ wɛ tɛɛ gu a piela yeenungeisia ti lii aa gbe a mɔnɛla jumbui nasia va ta pie,

¹⁰ajifa saahanii nasia ta fe Ngewɔ wɛ ta sawei nasia lekee lɔ gɛ kɔlooni gbɔɔ mahoungɔ ɔɔ maa ii houni numu i mɛ ɔɔ i kpɔle kɛɛ nguɛi nasia ta ti wua la jumbuisia gbuava ti ma. Sawei jisia kpɛlɛɛ ti gbitingɔ ii le numu lii ma tawao ta yɛlɔ lekee na i to watii na ma Ngewɔ a hindei gbi hugbatɛ a nina.

¹¹Kɛɛ Kristi i yɛnga a Saagbuablɛisia ti gulɔmɔ wai na hinda yekpei nasia ti welanga a lɛla mu ma mbei ta gbua ngi gaama. Hindei na a saa gbua na mu jumbuisia va, baagɔma lɔ na ma tawao ngi yɛyii i gbekpeni i lewe dunyayei ma; nuuvu gula-wɛlɛ gbatɛngɔ ii le, ii yɛni a hani na i mbei Ngewɔ i tia dunyei gbatɛni.

¹²Ji Kristi i wuaani Saagbuamɛi na i ngelegoohu, i wuaa Lomu Magayemangɔ Wai hu yakpe kunafɔ va, ii lini a njengaa kɛɛ nika-hinangaa ti ŋama gbuava a saa; i ta yekpe ngi ŋamɛi lɔ veni i pie mu wote a mahaleengaa kunafɔ va.

¹³Saagbuablɛisia ta njengɛisia kɛɛ nika hinangɛisia ti ŋamɛi lɔ wumbu kɛɛ nika lɔgbɛ gewengɔi yeenduvui ti falifali nungei nasia ma ti nɔhɔngɔ hɛɛva Ngewɔ Wɛlei bu tawao ji a pielɔ ti yɛ sɛwɛ i yeemanɔhɔi na gbua ti ma.

¹⁴Ina tohaningaa ti ŋama a gulɔ i nungaa yɛ sɛwɛ, kpayei na i Yesu ŋamɛi hu mu liisia yɛva sɛwɛ i leweni polouŋ na ma. Ngewɔ Yafei na i na kunafɔ va ngi sabui hu, Kristi i ta yekpe veilɔ Ngewɔ wɛ a saahani na mbɛ gbi ii ma ji i haani krɔsii ma. Hee na Kristi i pieni ji i ta yekpe gbuani a saa, a manɔhɔ mɔni na wualɔ i loni mu ma ji mu yɛ saa gbamɛi nasia gbua tɛɛ gu a gbɛogbɛ wiela, aako mu na wie Ngewɔ vulungɔi longɔ mu pie.

¹⁵Sabui na va lɔ Kristi i hinda yangilingɔ nina hugbatɛma aako nungei nasia Ngewɔ i ti lolinga yɛva a ngi woo ti lubɛi na majɔɔ kunafɔ va i yɛ Lahei wumbuni fa. Ji a gulɔ a wiela ajifa Kristi i haailɔ tawao yeehei ji lɔ a nungaa wumawo jumbui nasia hu ti pieni ji hinda yangilingɔi yeehaalayei i yɛ hu.

¹⁶Ji numu a ngi woohani gɔlɛkɔlɛyii wu kɔlɔ ma, numu ba kɛ pɛiŋ kɛ yeekɔlɛi na gbatɛmɔi i haanga,

¹⁷ajifa numu gbi ɛɛ gu aa yeekɔlɛi na yayenge ina lekee yeekpatɛmɔi lɔ heini; numu a gulɔ lekee a ngayengela, yeekpatɛmɔi haangɔi wooma.

¹⁸Na vamia kpaya gbi ii yɛ hinda yangilingɔi yeehaalayei vulii bɛɛ hu kɛlee ji nungaa ti yɛ tohanisia ti ŋamɛi gbua a saa Ngewɔ ma.

¹⁹Haala hindei Mojisi i pieni tamia a ji sawa ngilangilɛi kpɛlɛɛ Ngewɔ longɔ nungaa ti hou i hugɛni gbalauŋ a nungaa gbi kia nyɛingɔ la Sawa-gɔlɛi hu. Na wooma i nika-lɔgbɛisia kɛɛ njengɛisia ti ŋamɛi wumbuilɔ, i ngahupu a njɛi, i falifali Sawa-gɔlɛi ma kɛɛ nungaa kpɛlɛɛ ma a hisɔp wulii yeembekeisia, ngilingɔ a mbaala-yombo gbɔugbɔi.

²⁰Kɛ i ndenga yɛ, “Ŋamɛi ji lɔ i kpaya wuaanga hinda yangilingɔi na hu Ngewɔ i ndea yɛ waa nganyani.”

²¹Hii lɔ Mojisi i ŋamɛi valifalini Lomu Magayemangɔ Wai bu gbi kɛɛ hani gbi i yengeni la saagbuamɛi.

²²A tɔnya, kia ndengɔ la Sawa-gɔlɛi hu, ŋama wula lɔ a hani gbi yɛ sɛwɛ tawao Ngewɔ a manulɔ lekee jumbui ma ji ta tohani waa ti yeeŋamɛi gbua a saa.

²³Hinde jisia ti yeenasia vuii lɔ wokɔɔma ti ngelegoohu. Faale mahoungɔ yɛla ti yɛ sɛwɛsɛwɛ kia lekee ngi ndeni la. Kɛɛ ngelegoohu haakeisia vulii mahoungɔ saa yekpe gbuava ti va.

²⁴Ajifa Kristi ii wuaani Lomu Magayemangɔ hu nuuvu i kpatɛni, na kpuangɔ vulii a yeekpekpei. I lini ngelegoohu vulii lɔ, tawao taa naa na a mu jɔngɔ Ngewɔ gulɔ.

²⁵Juubleisia ti Jaabuablɛisia ti gulɔmɔ wai a wuaalɔ Lomu Magayemangɔi Wai hu foo gbi a hua ŋamɛi i haaka hu. Kɛɛ Kristi ta ii wuaani na ta yekpe gbuava a saa Ngewɔ ma heima gboto va,

²⁶ajifa aa na wie, a yɛlɔ a mɔnɛ heima gboto va i hiye lekee wɔɔ dunyei gbatɛ-gbelei ma. Kia na aa wie, kia na hindei kpɛlɛɛ ti gbɔyɔ-gbelei i lukpenga kpla, i wanga heima yakpe kunafɔ va aako i pie manuma i jɔɔ nungaa ti jumbuisia va a ji i ta yekpe veni ti ngi waa kia saahanii.

²⁷Numu gbi a haalɔ huɛɛŋ heima yila, na wooma Ngewɔ i ngi gbɛmbo.

²⁸ Hii lɔɔ Kristi i ta yekpe gbuani a saa heima yakpe numu gboto waa ti jumbuisia gbuava ti ma. A walɔ gbɔma kɛɛ jumbu gbuava ii le hu, kɛɛ kɔɔ i nasia ti bawo ti ngi gulɔgbema.