Read Ngowili Yekpei Numu Kpɛlɛɛ Va JEMISI 2 Bible Online

JEMISI 2 - Ngowili Yekpei Numu Kpɛlɛɛ Va bible

JEMISI 2

¹Nya mbaa Kristimableisia, kia wu langɔ a mu Lemɔi Yesu Kristi, Ngɔlɔya Lemɔ wai, waa nungaa huwɔyɔ ti yɛyii va ti luwui ma.

²Gbamaile wu gomɛngaa mia kpatɛmɔ a wa na, kanigbɔli i ngi lokohu kɛɛ ndoma nyande waa i ngi ma, kɛ fɛɛlimɔi bɛɛ i wa na ndoma hawei i ngi ma,

³bi baagɔma vengaa kpatɛmɔi wɛ bi nde ngi ma bɛɛ, “Hei heiwulii yeekpekpe wai ji ma mbei,” kɛ bi ndenga fɛɛlimɔi ma bɛɛ, “Li bi lo mia,” ɔɔ “Hei mbei ndɔmɛi nya gɔɔbu,”

⁴kɛ wua wua yekpe luahu gɔlɛma, wa kiti lewe la nungaa ma a ndii nyamui.

⁵A wolo, nya mbaa Kristimableisia! Ngewɔ i nasia lɔ wumbuni ti vɛlingɔ dunyei ji hu i ti wote a kpatɛbla ti layii va a ngie tawao i ti gbɛɛ nasia ma ti ngi mahayɛi na bu i Lahei wumbuni feva nasia wɛ ti longɔ a ngie.

⁶Kɛɛ wuaa fɛɛliblɛisia bɛlɛ nyanima. Yeeni lɔ ti ngulu liigbama wu bolowooma, ta li a wue kootiisia gulɔ a kpaya? Kpatɛblaa le!

⁷Tia lɔ ta baa gbua mbiyɛ yekpei na ma ti fenga wu wɛ.

⁸ Hindei yeepɔnangɔi mia wa pie ji wa jia a Mahɛi Ngewɔ jawei na i ngi Gɔlɛi hu i ndeni yɛ, “Lo a bi heinyɔui kia bi longɔ a bia yekpe.”

⁹Kɛɛ bi nungaa luahu gɔlɛngaa, bi longɔ a ti lɛɛngaa tewengɔ yeepekeisia ma, kɛ bi jumbu wulinga tawao Sawei a bi wumbu a sawa-nyanimɔ lɔ.

¹⁰Numu na a Sawei yeengila nyani, i sawei kpɛlɛɛ lɔ nyanini.

¹¹ Gbamaile numu yakpei na i ndeni yɛ, “Baa puegbua,” ta lɔ gbɔma i ndeni yɛ, “Baa numu waa.” Faale kiaa bɛɛ bii puegbuani, kɛɛ bi numu waangaa, kɛ bi sawei kpɛlɛɛ nyaninga.

¹²Faale a yɛ a yɛpɛ, wa hinda wie kia nungei nasia na Ngewɔ i wama ti gbɛmboma a sawei na a mu gbua nduwɔyahu.

¹³Ajifa Ngewɔ ɛɛ manuma wie ji a yɛ numui na gbɛmboma ii manuma wieni; kɛɛ manuma a temaya jɔlɔ kitilewela maahu.

¹⁴Nya mbaa Kristimableisia, gbɛ nafa le jii numui a nde yɛ ngi langɔe a Kristi a sɔbɛ ina ngi wiehindeisia tii kɛni kɛ ngi langɔe a Kristi? Ngi lalei na a Kristi a ngi bawolɔ?

¹⁵Ina bi ndehingɛisia lɔ na ɔɔ bi ndenyahaleengeisia kula ii ti ma tawao mɛhɛɛ yekpe ii ti yeya;

¹⁶a yee ti nafa ina bi ndeilɔ lekee ti ma bɛɛ, “Ngewɔ i wu luba! Kɔlɛ-vɛfɛ aa wu vɛ tawao a mɛhɛɛ mɛ kpoto wu goo i ve!” Ina bii hanii nasia veni ti wɛ ti haamingɔ fa ti lɛɛvui yeva na?

¹⁷Faale lanayei lekee yaa numu wɛ kɛɛ kpekpeya wiela gɛngɔ ii le ma kɛ hu haangɔi.

¹⁸Kɛɛ tɛngaa numu yila a ndelɔ yɛ, “Numu yila langɔe a Ngewɔ kɛɛ yee pekei ta a hinda yekpe lɔ wie.” Kɛ a nge kɛ bɛɛ hinda yekpe wie kɛɛ bi langɔe a Ngewɔ, nya bɛɛ nga kɛlɔ a bie kɛ kpekpei na nga pie a kɛlɔ kɛ nya langɔe a Ngewɔ.

¹⁹Bi langɔe la kɛ Ngewɔ i yakpe? Na nyandengɔe. Ngafa nyamuisia vulii bɛɛ ti langɔe a Ngewɔ tawao ti maa a gbɛli lɔ a nduwɛi.

²⁰Bia bi kpowamɔi ji! Bi longɔe ngi kɛ a bie kɛ lala lekee a Ngewɔ ii gbekpeni hinda yekpe wiela wooma?

²¹Ngewɔ i yee mu maada Ebraham woteni a pɔɔnamɔ, i tia ta luahu gbatɛ? I ji wieni Ebraham wiehindeisia lɔ va, ji i ngi hindoloi Aisaki veni Ngewɔ wɛ a saai hani.

²²Bii tɔma? Ebraham layii a Ngewɔ kɛɛ ngi wiehindeisia ti makpɔilɔ ti yenge; ngi wiehindeisia lɔ ti ngi lalei a Ngewɔ yakpani.

²³ Tawao Ngewɔ Gɔlɛi layie i longa ma ji i ndeni yɛ, “Ebraham lailɔ a Ngewɔ, tawao jifa i lani a Ngewɔ, Ngewɔ i ngi wumbuilɔ a pɔɔnamɔ.” Faale ti Ebraham loliilɔ a Ngewɔ ndiamɔ.

²⁴Bi tɔnga na kɛ numu wiehinda yekpeisia lɔ ta pie Ngewɔ i ngi wote a pɔɔnamɔ, ngi lalei lekee ii le a Ngewɔ.

²⁵Hii lɔɔ i wieni a hitɛ-nyahɛi Rehab. Ngewɔ i ngi woteilɔ a pɔɔnamɔ, i taa ta luahu gbatɛ hinda yekpei nasia va i pieni ji i loko heini Juubleisia ti nɛnɛjiagablɛisia bu, i gbɔ ti ma ti yama a pele weka tawao tii ti houni.

²⁶Faale le kia lɔɔ ngafei ii yɛlɔ numu gbuhɛi hu yeekpuhɛi haangɔ a yɛla, hii lanaya bɛɛ haangɔ a yɛla ina hinda yekpe wiela ii pooma.