Read Ngowili Yekpei Numu Kpɛlɛɛ Va JEMISI 4 Bible Online

JEMISI 4 - Ngowili Yekpei Numu Kpɛlɛɛ Va bible

JEMISI 4

¹Ndapi jisia kpɛlɛɛ kɛɛ njianjiɛisia ti wu luahu ti gbuama gbɔɔ hu? Tii gbuama nɛnɛɛisia yeemanii nasia hu lɔ ti lapima wu liisia hu?

²Wu longɔe a haningaa kɛɛ wuɛɛ gu a ti majɔɔla, faale wu magbatɛngɔe numu waava. Wu haamingɔ waa le haningaa va kɛɛ wuɛɛ gu waa ti majɔɔ, famia wa yia, wa lapi. Wuɛɛ hanii nasia majɔɔ wu haamingɔ fa jifa wuɛɛ fɛli Ngewɔ ma.

³Tawao wu ti vɛli bɛɛ Ngewɔ ma wuɛɛ ti majɔɔ ajifa wa ti vɛli hinda nyamu lɔ va. Wa haningaa vɛli Ngewɔ ma nguava wu liima hinda nyamuisia hu lɔ.

⁴Wua wa Ngewɔ wekeisia vɛli! Wuii kɔɔ kɛ bi yɛngaa a dunyei ndiamɔ kɛ bi yɛnga a Ngewɔ juwu lɔ? Numui na lekee gbi ngi longɔ i yɛ a dunyei ndiamɔ, i ta yekpe yɛnga a Ngewɔ juwu.

⁵Waa gili la kɛ Ngewɔ Gɔlɛi ii tɔnya yia leni ji i ndeni yɛ, “Ngafei na Ngewɔ i puni mu hu, ngi longɔ waa le la tawao a malolo gbualɔ waa.”

⁶ Kɛɛ ngauwandei na Ngewɔ piengɔ a mue i leweni na ma. Famia Ngewɔ Gɔlɛi i ndeni yɛ, “Ngewɔ ɛɛ luma mamaniblɛisia wɛ taa ti liimɛi wie, kɛɛ a ngauwanda velɔ nungei nasia wɛ ta tia yekpe mayei.”

⁷Faale na, a golo Ngewɔ wɛ. A lapi a Seitana kɛ i lewenga a piimɛ i gbua wu gama.

⁸A lukpe Ngewɔ gbla, ta bɛɛ a lukpelɔ wu gbla. A wu yeyɛisia wua ti yɛ sɛwɛ, wu jumbublɛi jisia! A wu liisia hu yɛ sɛwɛsɛwɛ, wu baayablɛi jisia!

⁹A wu mamamau, wu wɔlɔ kaka; a gbe a yɛlɛla wu tɔtoo a wɔlɔla, wu gbe a goohunɛɛla wu lii i nyani.

¹⁰A wua yekpe mayei Ndemɔi gulɔ, a wu yalɛlɔ.

¹¹Waa njia nyamu le wu nyɔunyɔu ma, nya mbaa Kristimableisia. Numu gbi lekee a njia nyamu le kɔlooni ngi mbaa Kristimamɔ ma yɛ ngi nyamungɔe, i njia nyamu lenga Sawei ma yɛ Sawei nyamungɔe. Bi ndengaa bɛɛ Sawei nyamungɔe, kɛ bii yɛni gbɔma a Sawei houmɔ, bi yɛnga na a kiti lewemɔ lɔ Sawei ma.

¹²Ngewɔ yakpe lɔ Sawa lamɔ a ngie kɛɛ kiti lewemɔ. Ta yakpe lɔ a gu a numu bawola ɔɔ numu nyanila. Bi langɔ la yelɔ a bie ba nde bɛɛ bi mbaa nuuvu nyamungɔe?

¹³ A wolo ji ma, wua wa nde wuɛɛ, “Haa ɔɔ sina ma lilɔ tei na bonda hu, mu foo yila gbɔyɔ na, mu fele gɔ na, mu navoo gboto jɔɔ.”

¹⁴Wuii kɔɔ vulii wu lɛɛvui a yee yɛ na sina! Wu wiengɔe kia ndulii na a hɛlɛ kulo kɛ i longa hu fulo.

¹⁵Na mahoungɔ wu nde ta lɔ a ji: “Ina Ndemɔi i lumangaa, ndɛvu a yɛlɔ mu hokpala ji bonda wieva ɔɔ na.”

¹⁶Kɛɛ kiahuna wu mamaingɔ, wa lawo; tawao ndawoei na bonda kpɛlɛɛ nyamungɔe.

¹⁷Faale na, numu i hindei na gɔngaa mahoungɔ i pie, ii pieilɔ, kɛ yeenumui na lɔ jumbu wiema.