Read Ngowili Yekpei Numu Kpɛlɛɛ Va JEMISI 5 Bible Online

JEMISI 5 - Ngowili Yekpei Numu Kpɛlɛɛ Va bible

JEMISI 5

¹A wolo naa ji ma, wu kpatɛbleisia! A wɔlɔ, wu yelei gula kpaalɛi nasia va ti wama lama wu ma.

² Wu gbateisia ti lulanga, gilingɛisia ti wu magulɛisia mɛnga.

³Kaayei i wu ganigbɔli nyaninga kɛɛ wu gani-golei, tawao Kpɛmbo-Volei ma yeekaayei ji a selilɔ kɛ wu gbewengɔ wɔɔ wua yekpe lekee lɔ va tawao a wu luwui mɔlɔ kia ngɔmbui na. Wu kpatɛ gboto lɛnga ma dunyei ji hu i wama gbɔyɔma.

⁴ Wuii yaa pawa gbi veni ngengeblɛi nasia wɛ ta yenge wu gbalɛisia hu. A wolo lɛɛ ti gboonyɛwoisia ma! Nasia ta wu luhanisia lewe, ti wɔɔwoi i fonga Ngewɔ ma, Ndemɔi na kpayei gbi i ngi wɛ.

⁵Wu yɛngɔi hu dunyei hu, wu koohunɛɛ hu lɔ tuuŋ, wa nɛnɛɛ lekee mɛ, wu wua yekpe wulɔnga kia fuuhanii nasia ta ti wulɔ ti waava.

⁶Wu nungei nasia lɛɛnga tii hinda nyamu gbi wieni, wu ti waanga, tawao tii lapini a wue.

⁷Faale a liilo, nya mbaa Kristimableisia, haaŋ Ndemɔi i yama mbei. A tɔ lɛɛ kia kpaa lamɔi a liilo ji a yɛ tuhani yekpe mawuloma majɔɔva ngi lɔlɔmɛi. A haama-yɛi mawulolɔ a ndiilo haaŋ i wua.

⁸Mahoungɔe wua bɛɛ wu liilo. Wu gahu aa gbɔyɔ gbamaile Ndemɔi wa-Volei magutungɔe.

⁹Waa gboonyɛ a wu nyɔunyɔu, nya mbaa Kristimableisia, aako Ngewɔ aa wu gbɛmbo. Numui gbi ti Gbɛmbomɔi wala hugutungɔe.

¹⁰Nya mbaa Kristimableisia, a gili a Ngewɔ lutui nasia ti yɛ Ndemɔi wowili le nungaa ma. Ti guyii hinda gbɔugbɔu bu i yɛni a tɔmaseli lɔ mahoungɔ wu pookɔɔ.

¹¹ Ma ndelɔ muɛɛ mahoungɔe mu nasia lato ti guni hinda gbɔugbɔu bu. Wu mɛninga kia Job i liiloni, tawao wu kɔɔlɔ gbɔɔ Ngewɔ pieni ngi wɛ kɛlɛmɛi. Ajifa Ndemɔi manumangɔ tawao ngi hindawandangɔ.

¹²Tewengɔ ji kpɛlɛɛ ma nya mbaa Kristimableisia, wu yaa Lahei wumbuma waa jondu ngelegoohu ma ɔɔ dunyei ɔɔ hani weka gbi. Luma lekee ji bi lii a yɛ tumɛi ma, bi mawali ji bi lii a mawali ma, na lɔ a wie Ngewɔ ɛɛ bi lɛɛ.

¹³Numu lɔ wu lia hinda gbɔugbɔu i ngi ma? Mahoungɔ i Ngewɔ vɛli. Numu lɔ na ngi goohunɛngɔ? Mahoungɔe i siɛgbua Ngewɔ ma ngule hu.

¹⁴ Numu lɔ wu lia ngi heegbɛngɔ? Mahoungɔ i Kristimableisia yeekpakoleisia loli ti Ngewɔ vɛli ngi va, ti ɔlivi wulɔi jia ngi ma a mu Lemɔi biyeihu.

¹⁵Kristimableisia yeekpakoloisia ti langɔ yɛngaa la kɛ Ngewɔ a ti hɛɛwoi mɛnilɔ, heegbɛmɔi na a bawolɔ; Ndemɔi a kahugbua velɔ ngi ma, i manu ngi ma jumbui nasia va i pienga.

¹⁶Faale na, a gaye a wu jumbuisia wu nyɔunyɔu gama, wu Ngewɔ vɛli wu nyɔunyɔu va aako Ngewɔ i wu bawo. Hɛɛ na numu yekpei a pie Ngewɔ ma a gulɔ a hinda waawaa wiela.

¹⁷Ilaija i yɛni wɔɔ a nuuvu lɔ kia mu na. I nɔɛilɔ Ngewɔ vɛlila ma yɛ nja gbi aa wua, tawao nja gbi ii wuani aa wu ndɔlei ma foo sawa kɛɛ yeekutu va.

¹⁸Na wooma i gbɔma Ngewɔ vɛlilɔ kɛ njɛi i tɔtongɔ a wuala, tuhanisia ti gbɔma gbekpe kpaalɛisia hu.

¹⁹Nya mbaa Kristimableisia, wu yilayee i gbuangaa tɔnya welei ma, numu wekei i yama a ngie tɔnya welei ma,

²⁰ a ji la nɛmahu; numu gbi lekee a jumbumɔi gbua kaka-welei ma i ngi yama tɔnya welei ma, a yeejumbumɔi na yafei mabawolɔ kunafɔ hee yeya, i pie Ngewɔ i manu jumbu gboto ma.