Read Ngowili Yekpei Numu Kpɛlɛɛ Va 1 PITA 1 Bible Online

1 PITA 1 - Ngowili Yekpei Numu Kpɛlɛɛ Va bible

1 PITA 1

¹Nya Pita, tomɔ a nge Yesu Kristi va, nya mia ngi kɔlɛi ji nyɛinga Ngewɔ nungaa wumbungɔi nasia gama ti gbuanga ti yee ti heiheini hotaya hu Pɔntɔsi plɔvinsi hu, kɛɛ Galesia kɛɛ Kapadosia kɛɛ Esia kɛɛ Bitinia.

²Mu Kɛkɛ Ngewɔ i wu wumbuilɔ kia hugbatɛngɔ yɛla ngi nɛmahu, Ngewɔ Yafei i pie wu wote a pɔɔnablaa aako wu golo Yesu Kristi wɛ, tawao wu yɛ sɛwɛ a ngi ŋamɛi. Ngauwanda kɛɛ ndiilɛli i yɛ wu hu ndavengɔ kpauŋ.

³A mu siɛgbua Ngewɔ ma, mu Lemɔi Yesu Kristi ngi Kɛkɛ! Jifa ngi manumangɔ waa, i ndɛvu nina veilɔ mu wɛ a ji i Yesu Kristi vuluni i ngi wumbu hee hu. Na Ngewɔ i pieni, ta lɔ i pienga mu liilomɛi na gulɔgbema i yeya mu va na ɛɛ gbɔyɔ;

⁴famia mu lii lɔ ma kpekpeya wai nasia majɔɔva Ngewɔ i ndamagbatɛnga feva ngi nungeisia wɛ. I ndamagbatɛnga ngelegoohu wu va tawao ɛɛ lula, ɛɛ nyani tawao ɛɛ lohu.

⁵Ti na wu va lɔ, wua Ngewɔ gbayei i wu mahugbema jifa wu langɔ a Kristi aako wu mbawoyei na majɔɔ Ngewɔ magbatɛngɔ na magɛva kɛlɛma volei ma.

⁶A goohunɛɛ ji va, kia bɛɛ kiahuna hinda hugutungɔ va hinda gbɔugbɔu laasi gbotoi nasia va ti lama wu ma.

⁷Kpaalɛi jisia ti lama wu ma gbuava pooma mia ina wu langɔe a Kristi a tɔnya. Nungaa ta gulɔ a kanigbɔlui vulii nyanila, kɛɛ ta gbua pooma a ngɔmbui lɔ tɔva ina kpekpengɔe; hii mahoungɔ gbuava wu lalei wooma na baagɔma i ma tewengɔ kanigbɔlui ma, aako i lɛmbi. Na wiengaa, wa tato majɔɔlɔ kɛɛ ngɔlɔya kɛɛ mbɛlɛhei Folei na ma Yesu Kristi a ta yekpe gɛ a numui gbi.

⁸Wu longɔe a ngie kia bɛɛ wɔɔ gba wuii yaa ngi lɔni, tawao wu langɔe a ngie, kia bɛɛ wuɛɛ gu a ngi lɔla kiahuna. Faale wa koohunɛɛ lakpa waa wielɔ na numu gbi ɛɛ gu i hungɛ,

⁹ajifa wu langa a ngie, na vamia wu yafeisia ti mbawoyei majɔɔnga.

¹⁰Ngewɔ lutuisia ti mbawoyei ji hinda hugbɛkpɛilɔ a, tɔmbɛyama wee, tawao i loni kulɔma lɔ ti mbawoyei na hinda hugɛ Ngewɔ a fe wu wɛ gbama.

¹¹Ti lapilɔ kɔɔva migbe lɔ mbawoyei ji a wa tawao a yee wa. Watii ji lɔ Kristi Yafei na i ti hu i loko loni ma ji i yɛ kpaalɛi nasia hinda hugɛma i wama lama Kristi ma kɛɛ ngɔlɔyɛi na a majɔɔ na wooma.

¹²Ngewɔ kɛilɔ a ngi lutui jisia kɛ tii ti yengei wiema ti yekpe nafava kɛlee wua, ji ti yɛ yɛpɛ kɔlooni hindei nasia ma wu mɛninga na a nasia ti Ngowili Yekpei hugɛni a wue Ngewɔ Yafei na Ngewɔ i ngi yoyoni a gbua ngelegoohu ngi gbayei hu. Jisia ti yɛni a hindangaa lɔ malikeisia vulii bɛɛ ta yɛ loni ti mbugɔɔ.

¹³Faale naa, a wu lii huyili yengeva. Wu ya aa lema, wu valangɔ i yɛla, wu mbawoyei na yakpe gulɔgbe Yesu Kristi a fe wu wɛ gbama watii na a ta yekpe magɛ a numui kpɛlɛɛ.

¹⁴A golo Ngewɔ wɛ tawao waa luma mani nyamui nasia ti yɛ wu lɔ watii lɛ wɔɔ wuii yɛ Ngowili Yekpei hinda hugɔɔ kɔlooni Kristi ma.

¹⁵Kia waa na wie, a joowi hinda nyamu laasi gbi ma wu wiehindei kpɛlɛɛ hu kia lɔɔ Ngewɔ na i wu lolini ngi yengei wieva ngi lolongɔ a hinda nyamu.

¹⁶ Ngewɔ ndeilɔ ngi Gɔlɛi hu yɛ, “Jumbu gbi aa yɛ wu ma ajifa jumbu gbi ii nya ma.”

¹⁷Wa Ngewɔ loli a wu Kɛkɛ, ji wa yɛ ngi vɛlima; ta lɔ a numui gbi gbɛmbo ngi wiehindeisia ma. Ɛɛ topooma wie. Faale naa, a baagɔma waa ve ngi wɛ wu lɛɛvui yeemɔni hu gbi mbei ngelebu.

¹⁸Gbamaile wu kɔɔlɔ Ngewɔ i yee wu wumawoni i wu gbua wu luvayii wovei hu, tuva huwopongɔ gbamɛi na wu maadani ti ndoni a wue. Ngewɔ ii wu wumawoni a na a nyani kia nyɔkɔ kanigole ɔɔ kanigbɔlu,

¹⁹kɛɛ i wu wumawoni a saa baagbangɔ waa lɔ i kpuani a Kristi na i wieni kia mbaalɛi na mbɛ gbi ii ma.

²⁰Pɛiŋ wɔɔ Ngewɔ i yaa dunyei gbatɛ, i loko loilɔ Kristi ma kɛ ngi sabui hu lɔ a wu bawo; famia Kristi i wani kɛlɛma volei jisia ma kɔɔ i wu bawo.

²¹Ta lɔ i yɛni a sabu wu lani a Ngewɔ na i ngi vuluni, i ngi wumbu hee hu, i ngi gɔ a ngɔlɔya waa; faale wu langɔ a Ngewɔ lɔ, wu lii i looni ngi ma.

²²Kia naa wu sawei nasia hounga Ngowili Yekpei kɛni tawao na i pienga Ngewɔ i manunga wu jumbui ma wu yafeisia ti yɛnga sɛwɛ, ji lɔ i pienga wu ndoma yekpe wienga a wu mbaa Kristimableisia, a lo a wu nyɔunyɔ a wu lii gbi.

²³Ngewɔ layia vulungɔe na a yɛ na kunafɔ, i ndɛvu nina venga wu wɛ, wu wienga kia ndeengɛi nasia ti lemɔi ɛɛ haa kunafɔ kia mu nda leblɛisia ta haa.

²⁴ Kia Ngewɔ Gɔlɛi ndeni yɛ, “Nuuvui kpɛlɛɛ ti wiengɔe kia kpitii i na, tawao ti wɔlɔyɛi gbi wiengɔe kia ngulu-wuɛisia ti na. Kpitii a belɔ, tawao ngulu-wuɛisia ta gulalɔ ti nyani,

²⁵kɛɛ njɛpɛi na Ndemɔi i ndenga a yɛlɔ na kunafɔ.” Njɛpɛi ji i yɛni a Ngowili Yekpei na lɔ ti ndeni wu ma gbalauŋ.