Read Ngowili Yekpei Numu Kpɛlɛɛ Va 1 PITA 3 Bible Online

1 PITA 3 - Ngowili Yekpei Numu Kpɛlɛɛ Va bible

1 PITA 3

¹ Hii mahoungɔ wu nyahangeisia wu golo wu hiningeisia wɛ aako ina ti lɛɛnga tii lani a Ngowili Yekpei, wu luvayii a pielɔ ti la la kiaa bɛɛ wuii yeenjɛpɛ gbi leni ti ma,

²ajifa ta bagɔɔmɛi na lɔlɔ wa fe ti wɛ kɛɛ pɔɔnɛi na wa yɛ hu.

³ Waa hanihani gboto yilingili wu ma aako wu nyande, kia nyɔkɔ ngundia baagbangɔisia ɔɔ kanigbɔluisia ɔɔ kula baagbangɔisia wa wu mayili la.

⁴Kia waa lapi wu luwuma nyandei va, wu nyandei i yɛ a wu yɛyii yeekpekpei na ndɔwungɔ wu bu numu ɛɛ tɔ. Yeenyandei ɛɛ jambo tawao a yɛ nungei nasia lɔ ma ti lii gɔlɛngɔ tawao tɛɛ jɔlɛ. Nyandei ji nyɔkɔ lɔ Ngewɔ i baa gɔɔngɔ ma.

⁵Gbamaile Ngewɔ vɛli nyahangɛi nasia wɔɔ ti liiloni Ngewɔ ma, ti yɛ a tia yekpe nyande a ji lɔ ti yɛ golo ti hiningɛisia wɛ.

⁶ Hii Sera i yɛ na; i goloilɔ Ebraham wɛ, a ngi loli a ngi Kaamɔ. Wu yɛnga na a ngi leengeisia lɔ ina wu pɔɔna hindei wieilɔ tawao wuɛɛ luwa hinda gbi ma ta wu huluwa la.

⁷Wua wu nyahableisia, mahoungɔ wua wu nyahangeisia wu hei wu kɔɔngɔ vuli kɛ hingaa ti gbayani nyahangaa ma. A baagɔma ve ti wɛ ajifa wua tieni lɔ wa kunafɔ lɛɛvui na majɔɔ Ngewɔ a fe gbama. A ji wie aako Ngewɔ i wu hɛisia mɛni.

⁸Njɛpɛi ji yakpuava gbɛɛ ngi ji le wu ma: mahoungɔ wu kpɛlɛɛ wu giliyii i yɛ yakpe, wu lii i nyani ji wu mbaangaa ta wɔɔ, wu goohunɛɛ ji ti goohu a nɛɛ; a lo a wu nyɔunyɔ kia mahoungɔ njekohungaa ti pie, wu gbewe vulii wu nyɔunyɔ va tawao waa wua yekpe huwɔlɔ.

⁹Waa hinda nyamu hunyɔɔ numu gbi ma a hinda nyamu, tawao waa mbɛlɛnyani hunyɔɔ a mbɛlɛnyani; kia waa na wie, a Ngewɔ vɛli i gbekpe a tie, ajifa ji nyɔkɔ wieva lɔ Ngewɔ i wu lolini aako wu poohani na majɔɔ i Lahei wumbuni feva wu wɛ.

¹⁰Kia Ngewɔ Gɔlɛi i ndeni la yɛ, “Numu gbi lekee ngi longɔ i lɛmbi dunyei hu koohunɛ hu, tawao ngi longɔ nɛnɛɛ i lɛ ngi ma, aa njia nyamu le nungaa wekangaa ma tawao i gbe a ndɛisia gualala;

¹¹i wounve hinda nyamu wiela ma i pɔɔna hinda wie; i ndiilɛli gɔkɔli i to pooma.

¹²Gbamaile Ndemɔi a kpekpe wieblɛisia mahugbelɔ i woolo ti hɛɛwoi ma; kɛɛ ngi wounvengɔe nyamu wieblɛisia ma.”

¹³Ye lɔ a kpaalɛ la wu ma ina wuaa lapima vulii hinda yekpe wieva watii gbi?

¹⁴ Kɛɛ kia bɛɛ nungaa ta kpaalɛ lalɔ wu ma jifa wa pɔɔna hindei wie, koohunɛɛ a yɛlɔ wu ma. Waa luwa numu gbi ma, tawao wu lii aa hɛlɛ.

¹⁵Kɛɛ mbɛlɛya waa i yɛ wu liisia hu Kristi va, wu baagɔɔ ngi ma jifa ta yakpe lɔ Ndemɔi a ngie. Numu gbi lekee a wu mɔli gbɔɔ wu kulɔgbema, wu magbatɛngɔ i yɛla watii gbi hugɛva a ngie.

¹⁶Kɛɛ wu yaa yeemɔli gbɛmboma waa kpɔnda numu gbi ma lava a Kristi tawao wu bagɔɔ na ma a yɛ tia bɛɛ nɛmahu. Wu wiehindei i kɛ kɛ wuii yaa hinda gbi wieni wu lii aa nde yɛ nyamungɔe aako nasia ta nde tɛɛ nungaa nyamungaa lɔ a wue kia bɛɛ wa hinda yekpe lekee wie jifa Kristi woomablɛisia a wue, ti wufe na va ta nde wu ma.

¹⁷Ajifa fesangɔ kpaalɛ i la numu ma hinda yekpe wieva, ina ji lɔ a nɛɛ Ngewɔ wɛ, i lewe na ma kpaalɛ a la numu ma hinda nyamu wieva.

¹⁸Mahoungɔe wu luma kpaalɛ i la wu ma ji wa hinda yekpe wie, ajifa Kristi vulii, ii jumbu yakpe bɛɛ wieni, i haailɔ yakpe mu jumbuisia kpɛlɛɛ va. Hee na i pieni ta lɔ i yɛni a sabu Ngewɔ i guni a manula mu jumbuisia ma, faale i pienga mu pele jɔnga livaa Ngewɔ gaama. Nuuvu yɛla a Kristi watii na ti ngi waani; watii na Ngewɔ i ngi vuluni i ngi wumbu hee hu, i yɛni a ngafa lɔ, na ɛɛ haa,

¹⁹i loni yeengafayei hu lɔ i li i Ngewɔ yiɛi le ngafangei nasia ma ti makpangɔ yɛla.

²⁰Ngafangei jisia mia a nungei nasia tii yɛ goloni Ngewɔ wɛ ji i ti mawuloni kaka watii na Noa i yɛ ngi lɛndɛi gbatɛma. Numu sɛkɛngɔi nasia ti yɛ ndɛndɛi hu, ti kpɛlɛɛ ti yɛ wayakpa, ti bawoilɔ njavei yeya.

²¹Njɛi na i yɛni a tɔmaseli lɔ nguɛi na va ta wu wua la tawao i pienga Ngewɔ i wu bawonga na jumbui yeya. Yeenguɛi ji ii yɛni a manɔhɔ wuala lekee luwuma, i yɛni a Lahei na lɔ wu mbumbuni Ngewɔ gama a kiliya sɛwɛsɛwɛ hu we. Yeenguɛi ji a pielɔ wu bawo jifa Kristi i hiyeilɔ hee hu;

²²na i lɛnga ngelegoohu i heinga Ngewɔ yejei hu, tawao Ngewɔ i ngi yɛnga a Maha malikeisia gbi maahu kɛɛ mahubleisia, kɛɛ nasia kpaya i ti yeya ti ngi bu.