Read Ngowili Yekpei Numu Kpɛlɛɛ Va 1 PITA 4 Bible Online

1 PITA 4 - Ngowili Yekpei Numu Kpɛlɛɛ Va bible

1 PITA 4

¹Jifa ti kpaalɛ lani Kristi vulii ma mu va, mahoungɔ wua bɛɛ wu magbatɛngɔ i yɛla kpaalɛ majɔva kia ngi magbatɛngɔ yɛla kpaalɛ majɔva, gbamaile numu gbi lekee kpaalɛ a la ngi gbuhɛi ma kia i lani Kristi ma, i wounvenga jumbu wiela ma.

²Faale, i hiye watii ji ma i to wu lɛɛvui gɛlɛmɛi dunyei ji hu, mahoungɔ wu golo Ngewɔ liima hindei wiela bu, waa golo wu liima hindeisia bu.

³Wu lɛmbinga wɔɔ hindei nasia wiema nungei nasia tii Ngewɔ gɔɔ ti longɔ a piela. Wu wu lɛɛvui kpɛlɛɛ wuaani puegbua hindei hu lɔ kɛɛ hinda nyamu wie-manii kɛɛ ndɔhou pɛɛpɛi kɛɛ ndɔ gbɔle gomɛisia kɛɛ nɔmɔli vɛlila gɛwɛgɛwɛisia.

⁴Kiahuna na kualangɔe nasia ma tii Ngewɔ gɔɔ ji wuɛɛ yaa gbɛɛ ti ma yeehinda nyamu hulewengɔ yakpei jisia wieva, famia ta nde tɛɛ numu nyamungaa lɔ a wue.

⁵Kɛɛ Ngewɔ a ti gbɛmbolɔ ti wiehindeisia va, Ngewɔ na i wama fuublaa kɛɛ haablaa gbɛmboma hugutungɔ.

⁶Sabui na va lɔ Kristi i Ngowili Yekpei leni haablɛisia bɛɛ ma nasia Ngewɔ i ti gbɛmboni pɛiŋ ti yaa haa kia Ngewɔ a nuuvui kpɛlɛɛ gbɛɛmbo la; i Ngowili Yekpei leilɔ ti ma kɔɔ ti yafeisia ti luva kia Ngewɔ a luvala.

⁷Hani gbi ti gɛlɛmɛi hugutunga; faale wu lii aa wulima tawao wu nɛmahui i yɛ wu gbla aako wu gu a Ngewɔ vɛlila a yeepelei.

⁸ Tewengɔ hindei gbi ma, a lo a wu nyɔunyɔ hulewengɔ, ajifa wu longaa a wu nyɔunyɔ, wu magbatɛngɔ a yɛla kpele gbi manuva nungaa wekɛisia ma hinda nyamui nasia va ta pie a wue.

⁹A loko hei wu nyɔunyɔ bu a koohunɛɛ wu wɛleisia bu tawao waa gbonyɛ.

¹⁰Ngewɔ i wu Kristimableisia gbi a ngilangila gɔnga a mboya hanisia tawao mahoungɔ numu gbi i gu a yee mboya hanii na houla pandaa Ngewɔ i fenga ngi wɛ, i ngayenge numui kpɛlɛɛ ti gbekpeyɛi va.

¹¹Numu gbi lekee a Ngowili Yekpei le, i Ngewɔ Wowili vulii le; numu gbi lekee tia Kristimableisia ti yengema, i yenge a kaahui na Ngewɔ a fe ngi wɛ aako hinda gbi hu numui gbi ti Ngewɔ lato Yesu Kristi biyɛi hu, na ngi woo a ngɔlɔyɛi kɛɛ kpayei kunafɔ kɛɛ kunafɔ. Amiina.

¹²Nya liima ndiamɔisia, hinda yaagbalɛngɔi jisia ti wu wiema wu hugɔɔva, aa guala wu ma bi tɔaa bɛɛ hinda nina mia i wu wiema.

¹³Kia na aa wie, a goohunɛɛ ajifa kpaalɛ i lama wu ma kia i lani Kristi ma, aako wu goohu i nɛɛ ji a ngi wɔlɔyei magɛ.

¹⁴Mahoungɔ wu goohu i nɛɛ ji nungaa ta wu bɛlɛ nyani jifa Kristi woomablɛisia a wue; ji a pielɔ wu kɔɔ kɛ Ngewɔ Yafa gabandengɔ wai lɔ heini wu hu.

¹⁵Nungaa ti kpaalɛ langaa wu yilayee gbi ma, aa yɛ ajifa numu-waamɔ a ngie ɔɔ humamɔ ɔɔ hinda nyamu wiemɔ ɔɔ numui na a loko wili nungaa ti hindeisia hu.

¹⁶Na hu gbi, nungaa ti kpaalɛ langaa bi ma jifa Kristimamɔ a bie, baa yeengufe wie kɛɛ siɛgbua Ngewɔ ma jifa Kristi biyɛi i bi ma.

¹⁷Ngewɔ a tɔɔtolɔ hugungɔ a numui gbi gbɛmbola tawao ngi nda nungeisia yese lɔ a ti gbɛmbo. Ina kpɛmboi i lɔɔtoma mua lɔ ma, nasia tii lani a Ngowili Yekpei na Ngewɔ i njoyoni ta yee wie?

¹⁸ Kia Ngewɔ Gɔlɛi ndeni la yɛ, “Ina kpaukpaungɔi pɔɔnableisia va ti bawo, gbɔɔ hɔɔ a jumbublɛi nasia wie tii gbeweni Ngewɔ va?”

¹⁹Faale naa, nasia kpaalɛ a la ti ma jifa hii i nɛni Ngewɔ wɛ ti va, mahoungɔ kpekpei nasia ta pie a nungaa wekɛisia i pie ti ti yafeisia loko wuaa ti Gbatɛmɔi yeya, na ngi Lahei wumbungɔi hu ɛɛ nyani.