Read Ngowili Yekpei Numu Kpɛlɛɛ Va 1 PITA 5 Bible Online

1 PITA 5 - Ngowili Yekpei Numu Kpɛlɛɛ Va bible

1 PITA 5

¹Nya vulii bɛɛ Kristimableisia ti gbakolo a nge, nyaa yɛpɛma a nya lii gbi Kristimableisia ti gbakolei nasia gama ti wu lia. Ngi kpaalɛi nasia hulɔilɔ i lani Kristi ma, tawao Kristi wɔlɔyɛi na Ngewɔ i wama kɛma a numui gbi, nga nya ndɛi majɔɔlɔ. Nyaa wu manɛnɛma,

² wu yɛ a Kristimablei nasia mahugbe Ngewɔ i ti veni wu wɛ kia mbala mahugbemɔi a pie a ngi baalangɛisia tawao wu ti mahugbe a koohunɛɛ kia Ngewɔ longɔ wu pie bi tɔaa bɛɛ ti kpɔndangalɔ wu ma. Waa Kristimableisia ti mahugbe yengei ji wie aako ti wu pawa a navoo, a pie jifa mani vulii i wu ma gbɔva ti ma.

³Waa lapi mahaya mɛva nasia maahu Ngewɔ i ti loko wuaanga wu yeya ti mahugbeva, tawao wu luvayii i yɛ a tɔmaseli ta lo ti pookɔɔ.

⁴Tawao watii na Mbala Mahugbemɔi na tewengɔ mbala mahugbeblɛisia kpɛlɛɛ ma a gbua nga, wa ngɔlɔya maha-bɔlɔ gabandengɔi na majɔɔlɔ a lo vooma kunafɔ.

⁵ Wua wu kɔɔngɛisia bɛɛ, mahoungɔe wu golo kpakoleisia wɛ, tawao mahoungɔe wu Kristimableisia gbi wu yɛngaa hinda yekpe wiema a wu nyɔunyɔ wu wua yekpe mayei tawao waa pie a mamani; ajifa Ngewɔ Gɔlɛi ndeilɔ yɛ, “Ngewɔ a mamaniblɛisia ti ma hindei hunyanilɔ, kɛɛ a kpekpe lɔ wie a nasia tii mamanini.”

⁶ Faale a wua yekpe mayei Ngewɔ gulɔ, Ngewɔ na ngi gbayangɔ wu mahugbeva, aako i wu lɛ watii na ma i kɛnga.

⁷A wu liihɛlɛmɛisia kpɛlɛɛ lukpe ngi ma ajifa ngi gbewengɔi wu va.

⁸Wu magbatɛngɔ i yɛla na gbi va a wie! Wu juwui Seitana lɔ lewetewema ngi laawongɔ kia njalɛi a yɛ gbelema a numu gɔkɔli hunyivinyivi va.

⁹Gbɛogbɛ aa pie wu layii a Kristi maahu aa gbua, tawao waa hinda gbi wie Seitana a wu lo piema ajifa wu kɔɔlɔ kɛ kpaalɛi nasia ti lama wu ma, yeekpaalɛ yakpei lɔ lama wu mbaa Kristimablei nasia ma ti vayangɔ dunyei hu gbi.

¹⁰Kɛɛ kpaalɛi i langaa wu ma watii wulo va, Ngewɔ na ngi yauwandangɔ a wue hulewengɔ, tawao i wu lolinga kunafɔ wɔlɔyɛi wu ndɛi majɔva jifa wua Kristi-ni wu wilingɔ hu, a wu hinda hugbatɛlɔ a nina, i pie wu layii a Kristi maahu aa gbua, i wu liisia gbaya, i pie wu hapi wuaa, waa jɛɛjia wu lalei hu a Kristi.

¹¹Ngewɔ i lo ngi mahayɛi ma kunafɔ kɛɛ kunafɔ va! Amiina.

¹² Sailas na ngi mbumbunga a nya ndewe jifa nya longɔ a ngie, tamia i gbɔni nya ma kɔlɔ gutui ji yoyova wu gama. Nya longɔ ngi wu lii nɛpɔ tawao nyaa seli wuaama kɛ ji kpɛlɛɛ ngi punga kɔlɛi ji hu kɔloongɔ ngauwandei na ma lɔ Ngewɔ a pie a wue jifa ngi longɔ a wue hulewengɔ. A hou kpaŋ wu lalei ma a Kristi, waa yɔkɔ.

¹³Wu mbaa Kristimablei nasia ti heini Babilɔn, Ngewɔ i tia bɛɛ wumbuni, tɛɛ ta va wu ma; tawao nya hindoloi Maaki bɛɛ yɛ a va wu ma.

¹⁴A va wu nyɔunyɔ ma, wu wu nyɔunyɔ gulu kɛva kɛ wu longɔe a wu nyɔunyɔ. Ngewɔ i ndiilɛli ve wu kpɛlɛɛ wɛ Kristi woo a wue.